Artıq müəllimlərin işə qəbulu müsabiqəsinin (MİQ) test imtahan mərhələsi başa çatıb. Bu imtahanlarda yüksək nəticə göstərən müəllimlərdən biri də Gülnarə Dadaşovadır. O, iyulun 8-də verdiyi imtahanda 97,5 bal toplayıb.

Gülnarə müəllim bakalavr təhsilini “Kimya və biologiya müəllimliyi” ixtisası üzrə Azərbaycan Dövlət Pedaqoji Universitetində, magistr təhsilini isə biologiya istiqaməti üzrə Bakı Dövlət Universitetində alıb. Hazırda Mübariz İbrahimov adına Biləsuvar Bağça-Məktəb-Lisey Kompleksində kimya müəllimi kimi fəaliyyət göstərir:

"Mən MİQ imtahanında ilk dəfə iştirak etmirəm. 2024-cü ildə MİQ imtahanında 90 bal toplayaraq regionun kimya müəllimləri arasında ən yaxşı nəticəni əldə etmişəm".

Gülnarə müəllim iştirak etdiyi imtahanla bağlı təəssüratlarını da “Azərbaycan müəllimi” ilə paylaşır:
"Müasir dövrdə təhsil sistemində ən mühüm islahatlardan biri şəffaf və obyektiv keçirilən MİQ imtahanlarıdır. Mənim iştirak etdiyim imtahan da ədalətlilik prinsipinə uyğun, yüksək peşəkarlıqla təşkil olunmuşdu. Düşünürəm ki, müəllim seçiminin təşkilinə olan belə yanaşma cəmiyyətimizdə müəllim peşəsinə olan hörməti, onun nüfuzunu daha da artırır. İmtahanın elektron formada təşkilinin bir çox üstünlükləri var. İmtahanın sonunda nəticələrimizi monitorda görməyimiz elə şəffaflığın sübutudur. İmtahan sualları ixtisas və metodikanı tamamilə əhatə edirdi".

Müsahibimiz belə düşünür ki, MİQ müsabiqəsinin keçirilməsi məktəblərdə yüksək bilik və bacarıqlara malik müəllim kollektivinin formalaşmasına səbəb olur:
“Düşünürəm ki, MİQ imtahanı yalnız müəllim olmaq istəyən şəxslər üçün deyil, bütövlükdə ölkənin təhsil sistemi üçün böyük əhəmiyyət kəsb edir. Sağlam rəqabət əsasında aparılan bu seçim imtahanı yüksək peşəkarlığa, bilik və bacarıqlara malik motivasiyalı və səriştəli müəllim kollektivi formalaşdırır. Məhz bu səbəb təhsilimizin keyfiyyətinin yüksəldilməsi və effektivliyin artırılması üçün əsas zəmindir. MİQ, eləcə də sertifikatlaşdırma imtahanlarının digər üstün cəhəti müəllimləri müntəzəm olaraq öz üzərlərində çalışmağa, onları bilik və peşə hazırlıqlarını daim yüksəltməyə təşviq etməsidir. MİQ imtahanları müəllimlərin öz potensiallarını üzə çıxarması üçün də əvəzsiz sistemdir”.

Qeyd edək ki, Gülnarə Dadaşova Biləsuvar şəhəri Nizami Gəncəvi adına 1 nömrəli tam orta məktəbdə yaradılmış mərkəzdə imtahan verib.