Elm və Təhsil Nazirliyinin mətbu orqanı olan “Peşə təhsili və insan kapitalı” elmi-praktik metodiki jurnalının 2-ci nömrəsi çapdan çıxıb. Jurnalın bu nömrəsində də bir-birindən maraq doğuran elmi məqalələr yer alıb. Pedaqogika bölməsində - Azərbaycan Kooperasiya Universitetinin Elm və innovasiyalar üzrə prorektoru, Əməkdar elm xadimi, iqtisad elmləri doktoru, professor Bəyalı Ataşovun “Azərbaycan universitetlərində elmi fəaliyyətin inkişafına dair dövlət siyasətinin yeni prioriteti” sərlövhəli elmi məqaləsində müəllif Azərbaycanın elm sahəsində dövlət siyasətinin yeni prioriteti çərçivəsində müasir çağırışlar və öndə olan məqsədlərin öyrənilməsi, həmçinin dünya təcrübəsi kontekstində ölkə universitetlərində elmi fəaliyyətlə bağlı problemlərin aşkar həll edilməsi istiqamətində təkliflərin irəli sürülməsini əsas məqsəd kimi göstərib. 

İqtisadiyyat bölməsində - Naxçıvan Dövlət Universitetinin İqtisadiyyat və marketinq kafedrasının müəllimi Nihat Mehbalıyevin “İnnovativ sosial-iqtisadi inkişafın Naxçıvan Muxtar Respublikasında tətbiq istiqamətləri” adlı məqaləsi yer alıb. Müəllif məqalədə öncə NMR-nin sosial-iqtisadi inkişafından söz açıb, sonra isə muxtar respublikada iqtisadiyyatın inkişafının davamlılığının təmin edilməsi, infrastrukturun və sosial xidmətlərin daha da yaxşılaşdırılması, əhalinin məşğulluğunun və maddi rifahının yüksəldilməsi ilə bağlı həyata keçirilən tədbirlərdə innovasiyaların tətbiqinin təsir mexanizmini ortaya qoyaraq təhlil edib. 

Gəncə Dövlət Universitetinin İdarəetmə kafedrasının müəllimi, doktorant Könül Quliyevanın “Elm tutumlu istehsalın yaşıl iqtisadiyyatda rolu” başlıqlı məqaləsi də bu bölmədə verilib.  Müəllif qeyd edib ki, yaşıl iqtisadiyyat ölkənin iqtisadi inkişafı ilə yanaşı, istehsalatda tətbiq edilən elmi-texniki tərəqqinin köməyi ilə ekoloji və sosial problemlərə həllyönümlü yanaşmasıdır. Yaxın gələcəkdə tükənməsi proqnozlaşdırılan enerji mənbələrinin bərpa olunan enerji ilə əvəzlənməsi, qida və içməli su çatışmazlığı, əhalinin sosial rifahının yaxşılaşdırılması kimi məsələlər təklikdə bir ölkənin deyil, ümumdünya problemidir. Burada bütün ölkələr yaşıl iqtisadiyyata inteqrasiyada maraqlıdır və s. kimi həlli vacib bir sıra fartorlardan bəhs edilib.

Metodika bolməsində Təhsil İnstitutunun Təhsildə məzmun kurikulum və standartlar mərkəzinin Peşə və ömürboyu təhsilin proqramları şöbəsinin baş mütəxəssisi, BƏT-in Azərbaycandakı daimi eksperti, kurikulum üzrə ekspert Leyla Bahabova “Montessori təhsilinin prinsip və yanaşmasının peşə təmayül təhsilində faydaları” başlığı altında yazdığı məqaləsində “Montessori təhsil” anlayışını əhatəli təhlilini verib. Montessori sisteminin əsas prinsipləri, müsbət və mənfi tərəfləri, bu sistemin digərlərindən fərqli cəhəti nədir, eləcə də sistemin peşə təmayül təhsilində tətbiqi və bu sistem kimlər üçün uyğundur və s. kimi maraqlı məqamlara toxunub.

Bakı Dövlət Universitetinin müəllimi Nərminə Mirzəliyeva “Yeniyetmələrdə ailə dəyərlərinin formallaşdırılması: müasir yanaşmalar və metodlar” adlı məqaləsində yeniyetmələrə ailə dəyərlərinin aşılanmasında müasir yanaşmaların və metodların əhəmiyyətini araşdırıb, ailə yeniyetmələrin sosial və psixoloji inkişafında mühüm təsirə malik əsas amillərdən biri olmaqla yanaşı, həm də digər sosial mühitlər, o cümlədən məktəblər və cəmiyyətin digər standartlarının da bu prosesə daxil olmasını qeyd edib.

Texnika bölməsində Azərbaycan Texniki Universitetinin doktorantı Nuru Daşdəmirlinin “Enerji istehlakına ağıllı nəzarət sistemi: əşyaların interneti və mikrokontroller əsaslı həll” sərlövhəli məqaləsi də yer alıb. Müəllif məqaləsində enerji istehlakının real zamanlı monitorinqini təmin etmək üçün mikrokontroller əsaslı ağıllı cihazın və “Əşyaların interneti” şəbəkəsi ilə işləyən sistemin hazırlanması haqqında məlumat verib. 

Adlarını qeyd etmədiyim digər məqalələrlə tanış olmağı isə oxucularımızın ixtiyarına buraxıram.

Vüqar SƏLİMOVA, 
“Peşə təhsili və insan kapitalı” jurnalının şöbə redaktoru