Artıq bir neçə gün sonra Respublika fənn müsabiqələrinin (RFM) yarımfinal turu keçiriləcək. Məktəblilər bu mötəbər yarışın növbəti turuna böyük həvəs və həyəcanla hazırlaşırlar. Biləsuvar şəhəri K. Ağayev adına Texniki fənlər təmayüllü internat tipli məktəb-liseyin yarımfinal turuna keçən şagirdləri də onların sırasındadır. 

Sözügedən məktəb-liseyin 3 şagirdi – Mehin Səlimxanlı, Nigar Mehtili və Adil Məmmədli bu turda bütün suallara cavab verərək 100 balla növbəti tura vəsiqə əldə ediblər.

“Azərbaycan müəllimi” qəzeti həmin şagirdlərlə həmsöhbət olaraq onların yarımfinala hazırlıqları ilə maraqlanıb.

“Növbəti tura daha çox hazırlaşıram, çünki məni qabaqda çətin imtahan gözləyir”

Mehin Səlimxanlının sözlərinə görə, bu məktəbə 6-cı sinifdən 7-ci sinifə keçən zaman yüksək nəticə ilə qəbul olub. Mehin müsabiqədə iştirak etməsi və növbəti tura hazırlığı ilə bağlı danışır:

“Keçən il RFM-də yarımfinala keçdim, lakin finala keçə bilmədim. Bu il isə qarşıma məqsəd qoydum ki, medal qazanacağam. Müsabiqəyə sentyabr ayından kimya müəllimlə hazırlaşmışam. Yaydan başlayaraq hər gün kimyaya vaxt ayırıram. Yarımfinala keçəcəyimə inanırdım, çünki çox hazırlaşmışdım. 6-cı sinifdə riyaziyyat fənni üzrə RFM-də yarımfinala keçmişəm. Hər il sinif əlaçısı oluram. Növbəti tura daha çox hazırlaşıram, çünki məni qabaqda çətin imtahan gözləyir, rəqabət də yüksəkdir”.

“Müsabiqədə iştirakım kimya fənnini daha yaxşı öyrənməyimə kömək edəcək“

Nigar Mehtili hazırda 7-ci sinifdə oxuyur. Onun sözlərinə görə, ötən il məktəb-liseyə qəbul imtahanında yüksək nəticə göstərib:

“Hesab edirəm ki, müsabiqədə iştirakım kimya fənnini daha yaxşı öyrənməyimə kömək edəcək. Müsabiqəyə kimya müəllimimiz Günel Nuraliyevayla hazırlaşmışam. Hər gün davamlı olaraq testlər işləmişəm. 6-cı sinifdə riyaziyyat fənni üzrə RFM-dən yarımfinala keçmişəm. Hər il sinif əlaçısı olmuşam”.

“Qalib olacağıma inanıram, çünki bu dəfə daha əzmlə çalışıram”

Müsabiqədə maksimum bal toplayan şagirdlərdən biri də Adil Məmmədlidir. Adil də məktəb-liseyə ötən tədris ilində qəbul olub:

“Kimya fənninə uşaq yaşlarından maraq göstərmişəm. Buna görə bu il də kimya fənnindən müsabiqəyə getdim. Müsabiqəyə kimyadan testlər işləyərək və nəzəriyyəni oxuyaraq hazırlaşdım. Mənə kimya müəllimim İlkin Rüstəmov dəstək oldu. Onunla birgə hazırlaşdım. Mən birinci mərhələ imtahanına gedəndə həyəcanlı olsam da, özümə güvənirdim və nəticədə maksimum bal əldə etdim. Ötən il riyaziyyat fənnindən müsabiqənin yarımfinalına keçə bilsəm də, finala keçə bilməmişdim. Çox həvəslə növbəti tura hazırlaşıram. Qalib olacağıma inanıram, çünki bu dəfə daha əzmlə çalışıram”.

Qeyd edək ki, məktəb-liseyi RFM, eləcə də Lütfi Zadə adına riyaziyyat-məntiq olimpiadasının yarımfinal turunda 58 şagirdi təmsil edəcək. Lütfi Zadə adına riyaziyyat-məntiq olimpiadası V, fənn müsabiqələri isə VI-VII sinif şagirdləri üçün təşkil olunur.