İmtahanda yüksək nəticə göstərən Şərqi Zəngəzur Regional Təhsil İdarəsinin tabeliyindəki ümumtəhsil müəssisələrinin müəllimləri də öz sevinclərini və həyəcanlarını "Azərbaycan müəllimi" ilə bölüşüblər. 

“Cəmi 1 balla hədəfdən yayındım”

İlk olaraq 10 ildir ki, əmək fəaliyyətinə başlayan Günay Məmmədli ilə söhbət edirik. O, Şərqi Zəngəzur üzrə azad olunmuş ərazilərdən imtahana qoşulan ilk müəllimdir. Cəbrayıl şəhəri M.Mehdizadə adına tam orta məktəbdə fəaliyyət göstərir. 

"Təkcə ona görə sevincli deyiləm ki, sertifikasiya imtanında yüksək nəticə əldə etmişəm. Həm də illərdir ki, həsrətini çəkdiyimiz, arzularını qurduğumuz torpaqlarda dərs deyirəm. Dövrün tələblərinə cavab verən, öz üzərində işləyən insanlar həmişə uğur qazanırlar. Adətən, yüksək nəticə insanı arxayınlaşdırır. Amma mən elə olmayacağam. Hədəfim 60 bal idi, az balla hədəfdən yayındım".

Laçın rayonunun Museyib Museyibov adına Bozlu kənd tam orta məktəbinin cografiya müəllimi olan Aytac İmanova da sertifikatlaşdırma imtahanında ilk dəfə iştirak edir. 

"5 ildir ki, müəllim kimi fəaliyyət göstərirəm, imtahanda 59 bal topladım. Bir müəllim kimi fikirləşirəm ki, sertifikatlaşdırma imtahanı mütəmadi olaraq öz üzərimizdə çalışmağımıza kömək edir. Hazırlıq müddətində həm dərsliklərdən, həm də əlavə vəsaitlərdən - xəritələrdən, müxtəlif müəlliflərin test tapşırıqlarından istifadə etmişəm. Çətin suallar yetərli qədər idi, amma işini bilən şəxs üçün bu çətinlik problem yarada bilməz. İmtahanda çətin sualların olmasını çox normal qəbul edirəm, çünki belə suallarla imtahan verənləri bir-birindən fərqləndirmək olur. Bu, müəllimləri oz ixtisasında daha da irəliləməyə sövq edir. Bundan başqa, müəllimlər peşəkar inkişafı üçün lazım olan boşluqları müəyyən edə bilirlər. Buna görə də sadəcə oxumaq, çalışmaq lazımdır".

Növbəti yüksək nəticə göstərən Səbinə İmanova 2015-ci ildən Laçın rayonu Şahin Abbasov adına Ərikli kənd ümumi orta məktəbində işləyir. 

O da imtahanda ilk dəfə iştirak edənlərdəndir. 

59 bal toplayan Səbinə müəllim deyir ki, imtahan bilik və bacarığının müəyyən səviyyədə olduğunu təsdiq etdi, maaşının artırılmasına imkan verir: “Sertifikatlaşdırma diferensial əməkhaqqı sisteminin tətbiqinə, uyğun əməkhaqqı artımı və sosial rifahın yüksəldilməsinə imkan yaradır. Sertifikatlaşdırmanın verdiyi bu imkanlardan, məncə, müəllimlər istifadə etməlidirlər”. 

Rəşad Əzizli Qubadlı rayonu İsa Məmmədov adına Aşağı Mollu kəndə tam orta məktəbin coğrafiya müəllimidir. 8 ildir ki, fəaliyyət göstərən Rəşad müəllim də imtahanda ilk dəfə iştirak edir. O, imtahanda 59 bal toplayıb. Rəşad müəllim nəticəsinin istədiyi kimi olduğunu və hazırlıq müddətinin uzun çəkmədiyini bildirir.

Özünüinkişafı dəstəkləyən Rəşad Əzizli düşünür ki, valideyn səriştəli müəllimə daha çox inam bəsləyir: 

“Hər bir valideyn gələcəkdə övladının uğurlu, savadlı şəxs kimi yetişməsini arzu edir. Müəllim bu prosesdə mühüm rol oynayır. Bunun üçün onun çox səriştəli, bilikli olması vacibdir. Bu baxımdan biz maksimum çalışmalıyıq ki, şagirdlərə daha səriştəli müəllimlərin dərs keçməsini təmin edək. Məncə, sertifikatlaşdırma bu baxımdan ən gözəl vasitələrdən biridir”.