Naxçıvan məktəbliləri Qəbələ şəhərində Fövqəladə Hallar Nazirliyi tərəfindən təşkil olunan “Gənc xilasedici və yanğınsöndürən” XII ümumrespublika yarışının qalibi olublar. 

"Azərbaycan müəllimi" gərgin mübarizə şəraitində keçən yarışda birinci yerə layiq görülən Naxçıvan şəhəri 1 nömrəli tam orta məktəbin komanda heyətinin uğurunu işıqlandırmaq üçün  həmin təhsil müəssisəsində olub. 

İlk olaraq yarış haqqında məlumat verən Naxçıvan Təhsil Nazirliyinin əməkdaşı Elxan Babayev bildirib ki, 23–30 iyun tarixlərində Fövqəladə Hallar, Elm və Təhsil, Gənclər və İdman nazirliklərinin birgə təşkilatçılığı ilə keçirilən yarışda Naxçıvanı 7 nəfərlik komanda təmsil edib. Builki yarışda Azərbaycanla yanaşı, Qazaxıstan, Özbəkistan, Belarus və Rusiyanın komandaları da iştirak edib. Naxçıvan komandası bu yarışda ilk dəfə 2023-cü ildə iştirak edib və o vaxt Ordubad rayonu Sabirkənd tam orta məktəbi birinci yerə layiq görülüb.
Yarışların keçirilməsində məqsəd yeniyetmə və gənclərin fövqəladə hallara hazırlıq səviyyəsinin yüksəldilməsi, məktəblilər arasında sağlam həyat tərzinin, fərdi və ictimai təhlükəsizliyə məsuliyyətli yanaşma hissinin və milli-vətənpərvərlik ruhunun aşılanması, müxtəlif ölkələrin gənc xilasediciləri arasında dostluq və əməkdaşlıq əlaqələrinin formalaşdırılmasıdır.

Məktəbliləri yarışa hazırlayan müəllimin fikirlərini də öyrənirik.

Naxçıvan şəhəri İslam Səfərli adına 1 nömrəli tam orta məktəbin hərbi hissə müəllimi Coşqun Əliyev 2013-cü ildən bu fənni tədris edir. Yarışda qalib olduqları üçün çox həyəcanlı və sevinclidir. Deyir ki, nəticənin belə olacağını gözləyib: "Çünki şagirdlərim hədsiz dərəcədə güclü idi. Biz Naxçıvan şəhər mərhələsində birinci yerə layiq görüldük, sonra Muxtar Respublika üzrə birinci yerə layiq görüldük və Qəbələdə keçirilən yarışda da Azərbaycan məktəbləri arasında birinci yerin qalibi olduq. Müntəzəm olaraq şagirdləri dərsdən sonra bu yarışlara hazırlayırdım.

Gənclərimizin, demək olar ki, hər biri güclüdür. Lakin onlar arasından daha güclü olanları seçdik və onların həmin yarışda iştirakını təmin etdim".

Deyir ki, məktəbin hərbi müəllimi olaraq əsas vəzifə borclarından biri şagirdlərə vətəni sevdirmək, onları vətənpərvər ruhda yetişdirməkdir: "Bu yarışdan əlavə bir çox yarışlarda da iştirak etmişik. “Şahin” hərbi-idman oyunlarında dəfələrlə Naxçıvanımızı təmsil etmişik, hətta 2019-cu ildə “Heydər Əliyev Kuboku”nu Naxçıvana gətirməyə nail olmuşuq.

Həmin yarışda o həyəcanı yaşayıb gözəl hisslər keçirən şagirdlərimiz bizə müraciət edirlər ki, hərbi sahəyə necə yönələ, necə FHN-nin əməkdaşı kimi fəaliyyət göstərə bilərik. Biz növbəti illərdə şagirdlərimizi həmin istiqamətdə hazırlamağa başlayacağıq".

Komanda heyəti olan məktəblilərlə də söhbət edirik. Söhbətləşdikcə görürük ki, doğrudan da heyət olduqca həvəsli və mübarizdir. Komandanın qrup rəhbəri Sadiq Bayramlı adını çəkdiyimiz məktəbin 9-cu sinfini bitirib, yeni tədris ilindən 10-cu sinif şagirdi olacaq. Yoldaşlarının bəziləri ondan böyük olsa da, kapitanlıq etməyi bacarır. Deyir ki, yanğın estafeti, maneələr zolağı və meşə maneələri çox çətin idi: "Yanğın estafetində 56 saniyə ilə birinci yeri tutduq, maneələrdə bəzi zəifliklərimiz var idi, ona görə 2-ci yer tutduq. Meşədə isə Quba komandasını 4 saniyə ilə üstələyib 1-ci yeri tutduq. Bu yarışlar arasında ən çətini meşə mərhələsi oldu. Çox yorulsaq da, fikrimizdən dönmədik, bütün maneələri qısa müddətdə keçərək yarışın qalibi olduq".

Sadiq deyir ki, komanda olaraq bu yarışı çox sevib və yaxşı dostlar qazanıblar. Yarış ona mənəvi olaraq nə qazandırdı sualına gəlincə, əlavə edir ki, uşaqlıqdan hərbçi olmaq istəyib: "Bu yarışdan sonra hərbi sahəyə həvəsim daha da çoxaldı, gələcəkdə hərbçi olub vətənimi qoruyacağam".

Biz də məktəblilərə uğurlar arzulayıb oradan ayrılırıq. İnanırıq ki, gələcəkdə hər biri öz yerini tutacaq, istər silahı, istərsə də beyin gücləri ilə Vətənin keşiyində dayanacaqlar.

Qeyd edək ki, komandalar yarışlarda “Maneələr zolağı”, “Kombinə edilmiş yanğın estafeti”, “Axtarış-xilasetmə işi”, “Komandaların təqdimatı” və “Divar qəzeti” mərhələlərində güclərini sınayıblar. Yarışın ümumrespublika birinciliyində ikinci yerə Quba rayonu Qaraçay qəsəbə tam orta məktəbi, üçüncü yerə isə Sumqayıt şəhəri 4 nömrəli tam orta məktəbin komandası layiq görülüb.