“Təhsildə keyfiyyətli insan resursları uğurlu gələcəyin təməlidir. Bizim üçün müəllimlərin işə qəbulu imtahanı da bu baxımdan şərait yaradır ki, bilik və bacarıqları yüksək, perspektivli, eyni zamanda, müasir təhsil sisteminin tələblərinə cavab verən, daim öz üzərində çalışan müəllimləri, müəllimliyə namizədləri seçə bilək”.

“Azərbaycan müəllimi” xəbər verir ki, bu fikirləri müəllimlərin işə qəbulu üzrə müsabiqənin test imtahanı ilə bağlı təşkil olunan infotur zamanı Məktəbəqədər və Ümumi Təhsil üzrə Dövlət Agentliyinin İctimaiyyətlə əlaqələr sektorunun müdiri Zenfira Sevdimalı səsləndirib.

O bildirib ki, infoturun təşkilində əsas məqsəd imtahanın təşkili prosesi ilə bağlı ictimaiyyət nümayəndələrini daha yaxından və əyani şəkildə məlumatlandırmaq və ictimai nəzarətin təmin olunmasına şərait yaratmaqdır: “Bu gün müəllimlərin işə qəbulu imtahanı ilə yaxından tanış olmaq üçün ictimaiyyət nümayəndələrini imtahan mərkəzinə dəvət etmişik.

Müəllimlərin işə qəbulu prosesində şəffaflığın təmin edilməsi və ictimai etimadın möhkəmləndirilməsi də bizim üçün prioritetdir. Bugünkü infotur və sonrasında müzakirələrlə davam edən “dəyirmi masa”da  ictimaiyyətə açıq və hesabatlı fəaliyyət prinsipimizə uyğun olaraq həyata keçirilir. İnanırıq ki, bu cür təşəbbüslər cəmiyyətdə təhsilə olan inamın gücləndirilməsi, vətəndaş cəmiyyətinin də proseslə daha yaxından tanışlıq baxımından faydalıdır”, – deyə o əlavə edib.