Mərkəzləşdirilmiş qaydada keçirilmiş buraxılış imtahanlarının nəticələri açıqlandı

İyunun 6-da mərkəzləşdirilmiş qaydada keçirilmiş buraxılış imtahanlarına 50279 şagird cəlb olunmuş, onlardan 47780 nəfəri imtahanda iştirak etmişdir. İmtahan vermiş şagirdlərin 37601 nəfəri bütün fənlərdən müvəffəq olmuş, 5124 nəfəri 1 fəndən, 1791 nəfəri 2 fəndən, 2400 nəfəri isə 3 və daha çox fəndən "2" qiymət almışdır.

16.06.2008-ci il tarixində şagirdlərin yekun attestat qiyməti nazirliyin rəsmi İnternet səhifəsində (www.edu.gov.az) yerləşdiriləcəkdir.

Onbirincilər mərkəzləşdirilmiş qaydada buraxılış imtahanı verdilər

İyunun 6-da ölkənin 19 bölgəsində orta təhsil üzrə mərkəzləşdirilmiş qaydada buraxılış imtahanı keçirildi. İmtahanlarda həmin bölgələrdəki ümumtəhsil məktəblərinin onbirinci sinif şagirdləri ilə yanaşı, məcburi köçkün rayonlarının bu bölgələrdə yerləşən orta məktəblərinin, peşə liseylərinin, Təhsil Nazirliyinin bilavasitə tabeliyindəki lisey və gimnaziyaların, ali məktəblərin nəzdindəki ümumtəhsil müəssisələrinin məzun olmağa hazırlaşan gəncləri də iştirak edirdilər.

ölkə üzrə 133 mərkəzdə keçirilən imtahanlara 52 minə yaxın şagird cəlb olunmuşdu. ötən il attestat ala bilməyən 1500-ə yaxın məzun da həmin gün təkrar imtahan vermək hüququndan istifadə edirdi. Onların mərkəzləşdirilmiş qaydada test imtahanı vermələri üçün 4 mərkəz yaradılmışdı. ötən il imtahana buraxılmayanlar bu mərkəzlərdə bütün fənlərdən, qeyri-kafi qiymət alanlar isə kəsildikləri fənlərdən imtahan verirdilər.

İmtahanların təşkili və gedişi barədə ictimaiyyətə operativ və doğru-dürüst məlumat vermək üçün Təhsil Nazirliyi İctimaiyyətlə əlaqə şöbəsinin təşəbbüsü və təşkilatçılığı ilə elektron KİV nümayəndələrindən ibarət qrup yaradılmışdı. Həmin qrupla birlikdə 2 mərkəzdə olub imtahanlardan qısa müşahidələr apardıq. Reydə çıxmazdan əvvəl KİV nümayəndələri Təhsil Nazirliyi Şagird nailiyyətlərinin qiymətləndirilməsi şöbəsiin müdiri Təranə Hacıyeva ilə görüşərək imtahanların təşkili barədə ondan qısa müsahibə aldılar. T.Hacıyeva bildirdi ki, əvvəlki illərdən fərqli olaraq bu il mərkəzləşdirilmiş buraxılış imtahanları daha geniş coğrafiyanı - 29 şəhər və rayonu əhatə edir. 8 fənn üzrə keçirilən imtahanda onbirinci sinif şagirdləri 125 suala cavab verməlidirlər. Test tapşırıqları 7 variantda hazırlanıb. Cavabların yoxlanması prosesi Təhsil Nazirliyində təşkil olunacaq. Optik qurğu tərəfindən cavab kartları oxunandan sonra qiymətləndirmə aparılacaq. Cavablar bir həftə ərzində Təhsil Nazirliyinin İnternet saytında yerləşdiriləcək. Eyni zamanda şagirdlərin adlı siyahısı məktəblərə göndəriləcək. T.Hacıyeva onu da dedi ki, attestata yazılacaq yekun qiymətin əsas faizini məhz buraxılış imtahanının nəticələri təşkil edəcək və imtahanda 8 fənnin hər hansı birindən qeyri-müvəffəq qiymət alan şagird attestat ala bilməyəcək.

Mərkəzləşdirilmiş qaydada buraxılış imtahanının təhsilin keyfiyyətinə müsbət təsir göstərdiyini söyləyən T.Hacıyeva onların şagirdlərin, müəllimlərin və valideynlərin məsuliyyətini artırdığını da diqqətə çatdırdı.

Qrupumuz öncə 202 nömrəli məktəbdə yerləşən mərkəzdə oldu. Biz mərkəzə gələndə imtahan verəcək onbirincilər  ikibir, üçbir  məktəbin həyətinə toplaşıb söhbət edirdilər. Apalarında valideynlər də gözə dəyirdi. Onların birinə yaxınlaşıb mərkəzləşdirilmiş qaydada keçirilən buraxılış imtahanı barədə fikrini soruşduq.

Tahirə İsmayılova övladının məcburi köçkün məktəbində oxuduğunu, onun yüksək qiymətlər alacağına inandığını bildirdi. Mərkəzləşdirilmiş qaydada keçirilən imtahanları və bu işə ciddi hazırlıq aparılmasını müsbət qiymətləndirdi.

Həmsöhbətimiz olan 258 nömrəli məktəbin şagirdi Namiq Dadaşov da yaxşı oxuduğunu, imtahandan qorxmadığını, qiymət ala biləcəyini söylədi. Mərkəzləşdirilmiş qaydada keçirilən buraxılış imtahanlarının məktəbdə yaxşı oxumadıqları, dərslərə müntəzəm gəlmədikləri halda attestat almaq istəyən şagirdlər üçün əsl maneə olduğunu deyən Namiq imtahanları təkcə onbirincilərin deyil, hətta X və IX sinif şagirdlərinin də məsuliyyətini artırdığını, onları tədris fənlərinin hamısına hazırlaşmağa sövq etdiyini bildirdi.

Saat 10-a 15 dəqiqə qalmış onbirincilər içəri buraxıldılar. Mərkəzdə imtahan rəhbəri Elmira Manafova idi.

Şagirdlər imtahan verəcəkləri otaqlarda yerləşdikdən sonra nəzarətçi müəllimlər Təhsil Nazirliyindən göndərilmiş içərisində test tapşırıqları və cavab kartları olan zərfləri açıb onlara payladılar. Bu prosesi məktəbin ikinci mərtəbəsində yerləşən 6 otaqda müşahidə etdik. Heç yerdə təşkilati hissə ilə bağlı problem olmadı. 19 otağın hər birində 18 nəfər olmaqla şəhərin müxtəlif məktəblərindən gəlmiş 342 şagird imtahan verirdi. Test kitabçaları paylanıb qurtardıqdan və onlarla işləmək qaydaları haqqında şagirdlərə məlumat verildikdən sonra onbirincilər tapşırıqlar üzərində işləməyə başladılar.

Nəzarətçilər öz vəzifələrini məsuliyyətlə yerinə yetirirdilər. Şagirdlərdən mobil telefonlar alınmışdı. İmtahan zamanı bir-birinə mane olan yox idi.

Reyd qrupumuz daha sonra Bağça-məktəb-lisey kompleksində oldu. Biz kompleksin tərkibinə daxil olan 200 nömrəli məktəbə gələndə imtahan artıq başlanmışdı. Burada imtahan rəhbəri, Təhsil Nazirliyinin şöbə müdiri Aydın Əhmədovdan öyrəndik ki, mərkəzdə 20 otaqda 360 nəfər şagird imtahan verir. İmtahan təlimata uyğun başlayıb, test kitabçaları və cavab kartlarının paylanmasında heç bir problem olmayıb.

Burada da bir neçə otağa baş çəkib imtahanların gedişi ilə maraqlandıq. Birinci otaqda 1 nəfər şagird gəlməmişdi. Bu otaqda paytaxtın 64 nömrəli orta məktəbindən gəlmiş müəllim Mehriban Mikayılova və 210 nömrəli məktəbin müəllimi Lalə Müseyibova imtahana nəzarət edirdilər.

Olduğumuz digər otaqlarda da test tapşırıqlarının həlli ilə məşğul olan şagirdlər fəal görünürdülər.

Yusif ƏLİYEV

Salyan və Neftçalada imtahanlar müvəffəqiyyətlə keçdi

Digər bölgələrdə olduğu kimi, bu rayonlarda da XI sinif şagirdlərinin buraxılış imtahanları mərkəzləşdirilmiş qaydada test üsulu ilə keçirildi. Salyan Rayon Təhsil Şöbəsinin müdiri Əliəsgər Mehdiyevdən aldığımız məlumata görə, 2007-2008-ci tədris ilində rayon məktəblərinin XI siniflərində təhsil alan 1538 şagirdin 1478 nəfəri imtahanlara buraxılmışdır. İmtahanların müvafiq təlimata uyğun şəffaf keçirilməsi üçün şəhər məktəblərində 5 mərkəz yaradılmış, şəhər və kənd məktəblərindən qeyri-ixtisas fənn müəllimləri nəzarətçi qismində mərkəzlərə cəlb edilmişlər. Həmçinin imtahan və bina rəhbərləri təyin edilmiş, münaqişə və yoxlama komissiyaları yaradılmışdır. Nəzarətçi və yoxlayıcı müəllimlərlə təlimati seminarlar keçirilmişdir.

Biz müşahidə aparmaq üçün 7 nömrəli məktəbdə yaradılmış 5 nömrəli imtahan mərkəzinə çatanda saat 8.30 dəqiqəni göstərirdi. Məktəbin direktoru Fərqanə Cəbrayılova vəziyyətlə tanış olmaq üçün bizi siniflərə dəvət etdi. İmtahan aparılacaq otaqların nömrələri qapılarında qeyd edilmiş, siniflərdə səliqə-sahman yaradılmışdı.

Saat 9.30-da imtahan rəhbəri, RTŞ-ın məsləhətçisi Xudaverdi Piriyev 18 otaqda 8 məktəbdən gəlmiş 322 şagirdin verəcəyi imtahana nəzarət edəcək 36 nəfər qeyri-ixtisas fənn müəllimini təlimatlandırdıqdan sonra şagirdlərin siyahısını, test kitabçalarını onlara paylayıb təyin olunduqları otaqlara göndərdi. Test tapşırıqları 8 fənn üzrə olmaqla 3 variantda hazırlanmışdı.

İmtahanın gedişini müşahidə etmək üçün RTŞ müdiri Əliəsgər Mehdiyev və imtahan rəhbəri Xudaverdi Piriyevlə birlikdə bir neçə otağa baş çəkdik.

5 nömrəli otaqda imtahan verəcək 18 şagirdin hamısı yerində idi. Nəzarətçilər - ibtidai sinif müəllimləri Sədaqət Hüseynova və İradə Piriyeva məlumat verərək bildirdilər ki, şagirdlər çətinlik çəkmədən sərbəst işləyirlər. 11 nömrəli otaqda imtahana nəzarət edən ibtidai sinif müəllimi Ceyran Əhmədova, rus dili müəllimi Aynurə Rüstəmova da təşkilati hissədə heç bir çətinliklə qarşılaşmadıqlarını bildirdilər. 9 nömrəli otaqda da şagirdlər fəal görünürdülər.

2 nömrəli mərkəzdə də imtahanlar təlimata uyğun aparılırdı. Burada imtahan rəhbəri, RTŞ-ın əməkdaşı Rəna Şirəliyeva məlumat verərək bildirdi ki, mərkəzdə rayonun 7 məktəbindən 288 şagird imtahana qatılmışdır. 16 sinif otağı ayrılıb ki, onların da hər birində 18 şagird imtahan verir. 32 nəfər qeyri-ixtisas fənn müəllimi imtahanlara nəzarət edir.

Rəna müəllimlə birlikdə baş çəkdiyimiz 15 nömrəli otaqda imtahan verən Marışlı kənd orta məktəbinin şagirdi Günay Rzayeva sualların çətin olmadığını bildirdi və uğur qazanacağını qeyd etdi.

İmtahanlardan sonra məlum olmuşdur ki, rayon üzrə imtahanlara 45 şagird gəlməmiş, 62 şagird isə qeyri-müvəffəq qiymətlər almışdır.

***

Həmin gün Neftçala rayonunda da imtahanların gedişini müşahidə etdik. Şəhər 1 nömrəli məktəbdə yerləşən mərkəzə çatanda saatın əqrəbləri 12.20 dəqiqəni göstərirdi. Neftçala Rayon Təhsil Şöbəsinin müdiri Əjdər Kərimovla görüşdük. O, bu il rayon üzrə XI sinfi bitirən 1141 şagirdin 1117-nin imtahanlara buraxıldığını qeyd etdi. Həmçinin rayon mərkəzində beş imtahan mərkəzinin yaradıldığını, imtahan, münaqişə və yoxlama komissiyalarının təşkil edildiyini, şəhər və kənd məktəblərindən qeyri-ixtisas fənləri üzrə 90 müəllimin nəzarətçi qismində mərkəzlərə cəlb edildiyini, bina və imtahan rəhbərliyinin təyin edildiyini, onlarla hələ qabaqcadan təlimati seminarlar keçirildiyini, yaşayış yerlərindən, xüsusilə kəndlərdən şagirdlərin imtahan mərkəzlərinə gətirilməsi üçün lazımi tədbirlərin görüldüyünü diqqətə çatdırdı.

1 nömrəli mərkəzdə bina rəhbəri, məktəbin direktoru Əsəd Səlimov, imtahan rəhbəri isə RTŞ-ın aparıcı məsləhətçisi Asif Yadigarov idi. Bildirildi ki, bu mərkəzdə rayonun 5 məktəbindən 218 şagirdin imtahan verməsi üçün 8 otaq ayrılmış və hər otağa 2 nəfər olmaqla 16 nəzarətçi müəllim təyin edilmişdir.

Əjdər Kərimov və Asif Yadigarovla birlikdə baş çəkdiyimiz 6 nömrəli otaqda imtahan verən 30 şagirddən 16 nəfəri işini təhvil verərək getmişdi. Qalan 14 şagird isə işini tamamlamaq üzrə idi. Nəzarətçi müəllimlər İradə Yusifova və Fuad İmanov məlumat verərək bildirdilər ki, şagirdlər sərbəst işləmiş, heç bir neqativ hal baş verməmişdir.

7 nömrəli otaqda da 28 şagirdin hamısı imtahanda iştirak etmişdir. Saat 13.00-da imtahan başa çatdıqdan sonra şagirdlərin imtahan vərəqələri nəzarətçilər tərəfindən yığılaraq yoxlama komissiyasına təhvil verildi. Təhsil Nazirliyinin nümayəndəsi Zeynal Zeynalov yoxlama komissiyasının üzvlərinin iştirakı ilə zərfi açıb düzgün cavab kartlarını onlara payladı. Qiymətləndirmənin şəffaf aparılması üçün tövsiyələrini verdi. Bundan sonra yoxlama komissiyası öz işinə başladı.

Sonra aldığımız məlumata görə, rayon üzrə 15 şagird imtahanda iştirak etməmiş, 94 şagird isə qeyri-müvəffəq qiymət almışdır.

Nizami MİRZƏ