|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Bilik yarışında ən istedadlı tələbələr fərqlənəcək Oktyabrın
21-də Azərbaycan Dövlət Pedaqoji Universitetində ali
məktəb tələbələrinin XIII respublika
fənn olimpiadasının açılış mərasimi keçirildi. Tanınmış alimlərin, ayrı-ayrı
fənlər üzrə münsiflər heyətinin,
tələbələrin və KİV nümayəndələrinin
iştirak etdiyi mərasimi açan Azərbaycan Respublikasının
təhsil naziri Misir Mərdanov ali peşə təhsili
sistemində mütəxəssis hazırlanmasının
keyfiyyətinin yüksəldilməsi məqsədi daşıyan
bu olimpiadanın Təhsil Nazirliyi tərəfindən
ənənəvi olaraq hər il keçirildiyini bildirdi. Təhsil naziri ölkəmizdə istedadlı
gənclərin inkişafına dövlət
tərəfindən daim böyük qayğı göstərildiyini
qeyd edərək bununla bağlı görülən işlərdən
söz açdı, təsdiq olunmuş sənədlər, o cümlədən
"Xüsusi istedada malik olan uşaqların
(gənclərin) yaradıcılıq potensialının
inkişafı üzrə Dövlət Proqramı (2006-2010-cu
illər)" və "2007-2015-ci illərdə
Azərbaycan gənclərinin xarici ölkələrdə
təhsili üzrə Dövlət Proqramı" çərçivəsində
həyata keçirilən tədbirlər haqqında mərasim
iştirakçılarına ətraflı məlumat verdi. O
bildirdi ki, respublikamızın orta ümumtəhsil və ali
təhsil müəssisələrində mövcud olan istedad
potensialını vaxtında müəyyənləşdirib
onun inkişafını təmin etmək
məqsədilə nazirlik tərəfindən çoxşaxəli
işlər görülür, olimpiadalar, özfəaliyyət
dərnəklərinin konsertləri, rəsm
əsərləri və yaradıcılıq işlərinin
sərgiləri, müxtəlif müsabiqə və yarışlar
keçirilir. Respublikamızda aparılan təhsil islahatı
nəticəsində gənclər üçün hazırlanan daha
səviyyəli, daha rəngarəng tədbirlərin sayı
və keyfiyyəti getdikcə artır. Yeni tipli ümumtəhsil
məktəblərində (liseylərdə) şagirdlərə
tədqiqatçılıq vərdişləri aşılanır,
onlar üçün elmi konfranslar təşkil olunur. Bu işin genişləndirilməsi
məqsədilə həmin təhsil müəssisələrində
Kiçik Akademiyalar yaradılır. Daha sonra Misir Mərdanov öz çıxışında
hazırda ən prioritet məsələlərdən biri
olan Azərbaycanın istedadlı gənclərinin ölkəmiz
üçün zəruri ixtisaslar üzrə xaricdə təhsilinin
təşkili istiqamətində atılmış real addımlardan
bəhs etdi. Nazir tədbir iştirakçılarının
diqqətinə çatdırdı ki, 2008-ci ildə
gənclərimizə dövlət qayğısını artırmaq
və onların sosial müdafiəsini gücləndirmək
məqsədilə ölkə başçısı
tərəfindən daha iki fərman imzalanmışdır.
Bunlar ali məktəblərə qəbul imtahanlarında
ən yüksək nəticə göstərmiş
tələbələr üçün Prezident təqaüdünün və
dövlət büdcəsinin vəsaiti hesabına təhsil alan
aspirantlar, dövlət ali, orta ixtisas, peşə
məktəbləri və peşə liseylərinin
tələbələri və şagirdləri üçün müəyyən
edilmiş aylıq təqaüdlərin məbləğinin
artırılması ilə bağlı olan
sənədlərdir. Respublikamızın ali
məktəblərində təhsil alan gənclərin
elmi-tədqiqat işinə cəlb olunması, onlarda
elmə həvəs oyadılması, biliklərinin artırılması
və nümayiş etdirilməsi üçün lazımi şəraitin
yaradıldığını deyən təhsil naziri bu
istiqamətdə aparılan işlər sırasında
tələbələrin fənn olimpiadasının önəmli
yer tutduğunu qeyd etdi. O nəzərə çatdırdı
ki, müstəqillik illərində 12 olimpiada keçirilmişdir.
2003-cü ildən etibarən fənlərin sayı artırılmış
və ənənəvi dörd fəndən (riyaziyyat, fizika,
kimya, informatika) başqa həm də Azərbaycan dili,
Azərbaycan tarixi və xarici dillər (ingilis, fransız,
alman), 2004-cü ildən isə Azərbaycan coğrafiyası
fənni əlavə edilmişdir. 28 ali
məktəbdən 448 tələbə Təhsil Nazirliyi
və Azərbaycan Təhsil İşçiləri Azad
Həmkarlar İttifaqı Respublika Komitəsinin birgə
təşkil etdiyi bu
olimpiadanın II turunda iştirak etmək hüququ qazanmışdır.
Tələbələrin fənlər üzrə bölgüsü göstərir
ki, ən böyük maraq ingilis dilinədir. Yekun turunun iştirakçılarından
98 nəfəri (21,8 faiz) məhz bu fənni, 58
nəfəri (12,9 faiz) Azərbaycan dilini, 56 nəfəri
(12,5 faiz) riyaziyyatı seçmişdir. Qalan fənlər üzrə
tələbələrin sayı 10 faizdən aşağıdır.
Onların arasında Bakı ilə yanaşı, Sumqayıt,
Naxçıvan, Lənkəran, Gəncə və Mingəçevirin
ali məktəblərində təhsil alanlar da var.
Olimpiadanın I turunda qeyri-dövlət ali
məktəbləri də fəal iştirak etmiş
və onlardan Qafqaz Universiteti, Odlar Yurdu Universiteti, Bakı
Qızlar Universiteti və Bakı Avrasiya Universitetinin
tələbələri son tura vəsiqə qazanmışlar. Təhsil naziri Misir Mərdanov çıxışının
sonunda olimpiadanın keçirilməsində əməyi olan
hər kəsə təşəkkürünü bildirdi və ali
məktəb tələbələrinin XIII respublika
fənn olimpiadasının iştirakçılarına bilik
yarışında uğurlar arzuladı. Azərbaycan Həmkarlar İttifaqları
Konfederasiyasının sədri, millət vəkili
Səttar Mehbalıyev ölkənin gələcəyinin bugünkü
gənclərin intellektual səviyyəsindən asılı
olduğunu, bu mənada təhsil sahəsinə göstərilən
diqqət və qayğının böyük
əhəmiyyət kəsb etdiyini vurğuladı. S.Mehbalıyev
olimpiadanın respublika turunda yüksək bilik
səviyyəsi və istedadı ilə
fərqlənərək I yerə layiq görülən
tələbələr, eləcə də onların
fənn müəllimləri və münsiflər heyətinin
sədrləri üçün müəyyən məbləğdə
pul mükafatlarının ayrıldığını
diqqətə çatdırdı. Azərbaycan Dövlət Pedaqoji Universitetinin
rektoru, professor Yusif Məmmədov bilik yarışının
məhz burada - respublikanın ən qocaman ali təhsil
ocaqlarından birində keçirilməsini
əlamətdar hal kimi dəyərləndirdi. O, respublika
ali məktəblərində təhsil alan
tələbələrin müxtəlif fənlərə marağını
artırmaq və həmin fənlər üzrə hazırlıq
səviyyəsini nümayiş etdirmək üçün şərait
yaradan olimpiadanın hər bir iştirakçısına müvəffəqiyyət
və qələbə sevinci arzuladı. Ziya Mehdiyev, Xədicə Eminova və Arzu
Nəzərova tələbələr adından çıxış
edərək olimpiadanın təşkil edilməsi və
keçirilməsi üçün yaradılan şəraitə görə
minnətdarlıq etdilər və öz müəllimlərinin
etimadını doğruldacaqlarına söz verdilər. Təhsil nazirinin müavini İradə Hüseynova
olimpiadanın I turunda yüksək nəticələr
əldə etmiş tələbələri təbrik
edərək təşkilati məsələlərlə
bağlı ətraflı məlumat verdikdən sonra
informatika fənni üzrə son turun BDU-da, qalan bütün
fənlər üzrə isə ADPU-nun əsas binasında
təşkil edildiyini bildirdi və yarışların keçiriləcəyi
otaqların nömrəsini elan etdi. Hicran ƏKBƏROVA
|