|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
NDU-da ötən ilin yekunları və qarşıda duran vəzifələr müzakirə olundu Naxçıvan Dövlət Universitetində
üçüncü çağırış Naxçıvan Muxtar Respublikası
Ali Məclisinin altıncı sessiyası və universitetin
qarşısında duran vəzifələrə həsr
olunmuş yığıncaq keçirildi. Rektor, akademik İsa
Həbibbəyli "üçüncü çağırış Naxçıvan
Muxtar Respublikası Ali Məclisinin altıncı sessiyası
ilə əlaqədar NDU-da ilin yekunları və qarşıda
duran vəzifələr" barədə məruzə
etdi. Rektor bildirdi ki, Ali
Məclisin növbəti sessiyasında ölkədə keçirilən
prezident seçkilərində ümummilli lider Heydər Əliyevin
siyasi kursunun layiqli varisi İlham Əliyevin yekdilliklə
Prezident seçilməsi 2008-ci ilin ən böyük hadisəsi kimi
dəyərləndirilmişdir. Millət vəkili vurğuladı ki,
sessiyada son zamanlar irəli sürülən demokratik konstitusion
dəyişikliklər də dəstəklənmişdir.
Rektor sessiyada Naxçıvan özəl Universitetinin, Naxçıvan
Müəllimlər İnstitutunun, regiondakı orta ümumtəhsil
və orta ixtisas məktəblərinin illik
fəaliyyətinin ümumiləşdirildiyini də qeyd etdi.
Natiq muxtar respublika rəhbərliyi tərəfindən
regionda yeganə dövlət ali təhsil ocağı olan
NDU-da tədris və təhsil işlərinin illik yekununun
müsbət qiymətləndirildiyini bildirdi. İsa Həbibbəyli ölkəmizin 108
hektarlıq ali məktəb kampusuna malik olan yeganə
universitetində yeni tədris korpuslarının
tikilməsini, maddi-texniki bazanın gücləndirilməsini
dövlət qayğısının bəhrəsi adlandırdı.
Rektor ötən il beynəlxalq münasibətlər və
xarici dillər fakültəsi üçün beşmərtəbəli
binanın tikintisinə başlandığını, bu
fakültənin Azərbaycanda ilk elektron fakültəyə çevriləcəyini,
ən müasir texnologiyalar ilə təmin olunacağını
söyədi. Natiq 10 fakültənin, 43 ixtisasın mövcud olduğu
bu ali təhsil ocağında AMEA-nın 2 həqiqi, 5
nəfər müxbir üzvünün çalışdığını,
ötən il 3 əməkdaşın elmlər doktoru, 22
nəfərin isə elmlər namizədi alimlik
dərəcəsi aldığını söylədi. Məruzəçi yola saldığımız
il universitetdə məlum fakültələrin struktur
yeniliklərinə müvafiq olaraq beynəlxalq münasibətlər
və xarici dillər, təbiətşünalıq və
kənd təsərrüfatı fakültələri adlandırıldığını,
baytarlıq, orkestr alətləri, xalq çalğı
alətləri, bəstəkarlıq
kafedralarının yaradıldığını,
bakalavr pilləsi üçün 3, magistr pilləsi üçün 1
yeni ixtisasın açıldığını bildirdi. İsa
Həbibbəyli universitetin ötən
ilin qış-yay imtahan sessiyalarının
nəticələrinə görə 91-93% müvəffəqiyyət
göstəriciləri, 67 - 94% isə keyfiyyət göstəriciləri
əldə etdiyini, 2008-2009-cu tədris ili üçün
tələbə qəbulu planının 97,33% yerinə
yetirildiyini, 9 nəfərin 600-dən çox balla
universitetə qəbul olduğunu vurğuladı. Rektor universitetdə informasiya və
kommunikasiya texnologiyalarının tətbiqinə böyük
əhəmiyyət verildiyini bildirdi. "Uzaq regionlar üçün
səciyyəvi olan informasiya və kommunikasiya texnologiyaları
problemləri" mövzusunda Şimali Atlantika Birliyi
Mərkəzi və Şərqi Avropa Şəbəkələndirmə
Assosiasiyası Perspektiv Şəbəkələndirmə
üzrə NATO İşçi Elmi Seminarı, "İnformasiya
və kommunikasiya texnologiyaları və zaman"
mövzusunda elmi praktik konfrans keçirilmiş, Boloniya
prosesinə keçidlə əlaqədar NDU-da Təhsil
Qeydiyyatı Mərkəzi "İnformasiya
texnologiyaları laboratoriyası" təşkil olunmuşdur.
İsa Həbibbəyli universitetin inkişafında
beynəlxalq əlaqələrin xüsusi əhəmiyyət
kəsb etdiyini, Türkiyə, İran İslam Respublikası
ilə yanaşı, burada Nigeriyadan, Koreyadan, Banqladeşdən,
Misirdən, Polşadan olan tələbələrin
təhsil aldığını vurğuladı.
Məruzəçi bildirdi ki, NDU Azərbaycanın yeganə
universitetidir ki, tələbələri hər il xarici ölkələrdə
təcrübə keçir. İl ərzində 5 beynəlxalq
simpoziumun keçirildiyini xatırladan rektor "Beynəlxalq
iqtisadi əlaqələrin inkişafında regionların
rolu və əhəmiyyəti" mövzusunda,
fizika, riyaziyyat və texnika elmləri üzrə keçirilən
beynəlxalq elmi konfranslarda, Türk Dünyası Pediatrlarının
səkkizinci konqresində dünyanın tanınmış ali
məktəblərinin təmsil olunduğunu qeyd etdi. Qarşıda duran
vəzifələrdən danışan İsa
Həbibbəyli rektorluq üçün üçmərtəbəli binanın,
tələbə məişət evinin inşa olunmasının
nəzərdə tutulduğunu, dekanlıq və kafedraların
müasir informasiya və kommunikasiya vasitələri ilə
tam təmin olunacağını, tibb fakültəsinin yeni
maddi-texniki təchizatının həyata keçiriləcəyini,
yeni kafedraların və ixtisasların yaradılacağını
qeyd etdi. çıxışının sonunda il
ərzində səmərəli elmi-pedaqoji
fəaliyyət göstərmiş, 60 -70 yaşlarını
tamamlamış əməkdaşlar fəxri fərmanlarla
təltif olundular. Universitetin elmi işlər üzrə
prorektoru, AMEA-nın müxbir üzvü Vəli Hüseynov elmdə,
təhsildə qazanılan uğurları Azərbaycandakı
sosial-iqtisadi tərəqqinin, siyasi stabilliyin bəhrəsi
adlandırdı. Məruzəçi vurğuladı ki, Naxçıvan
Muxtar Respublikasının 2009-cu il üçün dövlət büdcəsindən
elm xərclərinə 3.976042 manat, təhsil
xərcləri üçün 64.897412 manat, ali təhsil
xərclərinə 3.274943 manat ayrılmışdır
ki, bunun da 2.752853 manatı NDU-nun payına düşür. V.Hüseynov
çıxışını yekunlaşdıraraq söylədi
ki, Naxçıvan MR Ali Məclisinin son sessiyasında Naxçıvan
Dövlət Universitetinin illik fəaliyyətinə
verilən qiymət bir daha təsdiq edir ki, bu ali
məktəb muxtar respublikanın qabaqcıl elm və
təhsil mərkəzi rolunu oynayır. Universitet YAP ərazi təşkilatının
sədri, hüquq fənləri kafedrasının baş müəllimi,
tarix elmləri namizədi Elman Cəfərli, fiziki
tərbiyə və idman oyunları kafedrasının müdiri
Məmmədəli Rəhimov tibb fakültəsinin dekanı,
pedaqoji elmlər namizədi Bəhruz Məmmədov, memarlıq
kafedrasının müdiri, memarlıq elmləri namizədi
Qadir Əliyev, Universitet Tələbə Həmkarlar İttifaqı
Komitəsinin sədri Sərxan İsmayılov çıxış
edərək təmsil etdikləri fakültələrin il
ərzindəki nailiyyətlərindən söz açdılar. Yığıncaqda universitetin illik
fəaliyyətinin yekunları tarixi fotolardan, statistik
cədvəllərdən, diaqramlardan ibarət slaydlar
vasitəsi ilə tədbir iştirakçılarına
təqdim olunmuşdur. Mehriban SULTAN, NDU-nun mətbuat xidmətinin rəhbəri
|