Aprelin 30-da Bakı Pedaqoji Kadrların
İxtisasartırma və Yenidənhazırlanma
İnstitutunda görkəmli elm xadimi, tanınmış
oftalmoloq Zərifə xanım Əliyevanın anadan
olmasının 87-ci ildönümünə həsr olunmuş
elmi-praktik konfrans keçirildi. Mərasimdə
Zərifə xanım Əliyevanın xatirəsi bir dəqiqəlik
sükutla yad edildi.
Rektor Asəf Zamanov konfransı giriş sözü ilə
açaraq Zərifə xanım Əliyevanın tibb elminin
inkişafındakı xidmətlərindən, bu sahədə
yaratdığı fundamental əsərlərdən, qazandığı
misilsiz nailiyyətlərdən söz açdı. Bildirdi ki,
Zərifə xanım Əliyeva aspiranturanı bitirib elmi
əməkdaş kimi fəaliyyət göstərdiyi illərdə
respublikanı traxoma xəstəliyi ağuşuna almışdı.
O vaxtlar bu xəstəliyə qarşı təsirli müalicə
üsulların olmasından onunla mübarizə təkcə
oftalmologiya elmi üçün deyil, bütövlükdə
ölkənin səhiyyəsi üçün vacib idi. Belə bir
dövrdə Zərifə xanım traxoma xəstəliyinə qarşı
aparılan müalicəvi və profilaktik tədbirlərin
keçirilməsində fəal iştirak edirdi. Beləliklə,
Zərifə xanımın ilk elmi araşdırmalarının
mövzusunu həyat özü müəyyənləşdirdi.1960-cı ildə
uğurla müdafiə etdiyi "Traxomanın digər terapiya
üsulları ilə birlikdə sintomitsinlə müalicəsi"
mövzusunda namizədlik dissertasiyasını müdafiə
etdiE Görkəmli oftalmoloq-alim, 12 monoqrafiya,
dərslik və dərs vəsaitinin, 160-a yaxın elmi
işin, 1 ixtira və 12 səmərələşdirici təklifin
müəllifidir.
Azərbaycan Tibb Universitetinin oftalmologiya
kafedrasının müdiri, professor Paşa Qəlbinur
"Alim, həkim, insan" adlı məruzəsində Zərifə
xanım Əliyevanı fenomen adlandırdı,
Azərbaycanda nadir şəxsiyyətlərdən biri,
çoxşaxəli istedad sahibi kimi səciyyələndirdi.
Qeyd etdi ki, Azərbaycan oftalmologiya elmi
bilavasitə Zərifə xanımın adı ilə bağlıdır. Bu
elmin ən zəngin çalarları görkəmli alim
tərəfindən öyrənilmiş və elmə məlum olmayan bir
çox yeniliklər ixtira edilmişdir. Professor elm
sahəsində qazandığı uğurlara görə Zərifə
xanımın ixtiralarından bəhrələndiyini qeyd
etdi.
Bakı PKİYİ-nin kitabxanasının müdiri Güldanə
Mehdiyeva "Nur və həyat rəmzi" mövzusunda
geniş məruzəsində qeyd etdi ki, çox vaxt
insanın dünyaya gəldiyi fəsillə onun təbiətində
uyğunluq olur. Bu cəhətdən akademik Zərifə
xanım Əliyevanı "bahar təbiətli" adlandırmaq
olar. Çünki görkəmli oftalmoloq-alim, qayğıkeş
həkim, ən yaxşı ana, fədakar həyat yoldaşı
Zərifə xanım Əliyeva təbiətin oyandığı,
torpağın canlandığı, istinin və işığın artdığı
bir fəsildə dünyaya göz açmışdır. Onun elmi
fəaliyyətinin istiqamətlərindən biri gözün
oftalmoloji, histomikroskopik və histokimyəvi
tədqiqinə həsr edilmişdir. Zərifə xanımın elmi
fəaliyyətinin digər sahələrindən biri
klinik-diaqnostik istiqamətdə apardığı
tədqiqatlardır ki, onların da nəticələri
həkimlər üçün yazılmış dərs vəsaiti və
monoqrafiyalarda cəmlənmişdir.
ATU-nin Oftalmologiya kafedrasının dosenti
Solmaz İsayeva Zərifə xanımla bağlı
xatirələrindən, psixologiya elmləri namizədi
Hökümə Əliyeva, Təbiət elmləri kafedrasının
müdiri Zərifə Dəmirova, pedaqoji elmlər
namizədi Fikrət Əliyev çıxışlarında böyük
alim, zəkalı qadın, qayğıkeş ana, nəcib və
xeyirxah şəxsiyyət Zərifə xanım Əliyevanın tibb
elminə verdiyi tövhələrdən söz açdılar.
Sonda rektor Asəf Zamanov böyük
oftalmoloq-alim, akademik Zərifə xanım
Əliyevanın xatirəsinin daim qəlblərdə
yaşayacağını, yaddaşlardan heç vaxt
silinməyəcəyini vurğulayaraq, dedi ki, dahilər
heç vaxt ölmürlər, onlar ən sevimli bəndələr
kimi Tanrı dərgahına qovuşurlar.
Sifai SƏFƏROVA |