Yeni Azərbaycan Partiyasında mətbuat konfransı

Martın 7-də Yeni Azərbaycan Partiyasının qərargahında təhsil naziri Misir Mərdanovla mətbuat konfransı keçirildi. YAP-ın mətbuat xidmətinin rəhbəri Hüseyn Paşayev tədbiri açaraq sözü Misir Mərdanova verdi.

Yeni Azərbaycan Partiyasının idarə heyətinin üzvü, təhsil naziri Misir Mərdanov təhsil sahəsində görülən işlərlə bağlı KİV-ə müntəzəm məlumat verildiyini xatırladaraq diqqətə çatdırdı ki, bu görüşdə qarşıda duran vəzifələrdən, 2008-ci ildə təhsil sistemində həyata keçiriləcək tədbirlərdən söhbət açılacaq.

Təhsil sahəsinin ayrı-ayrı pillələrində müəssisələrin maddi-texniki bazasının möhkəmləndirilməsi istiqamətində görüləcək işlər haqqında məlumat verən nazir bildirdi ki, cari ildə bu məqsədlə 196 milyon manat vəsait ayrılıb. İl ərzində 523 obyektdə iş aparılacaq. Onlardan 243-ü ümumtəhsil məktəblərinin istilik sistemlərinin təmiri və bərpa olunması ilə bağlıdır. Yeri gəlmişkən, ötən il təkcə Bakı şəhərində 270 məktəbin istilik sistemi bərpa olunub.

2008-ci ildə respublikada 115 yeni məktəbin, 32 əlavə korpusun, 4 rayonda təhsil şöbəsi üçün yeni binanın tikilməsi, 94 ümumtəhsil məktəbinin, 21 körpələr evi-uşaq bağçasının, 4 peşə məktəbinin əsaslı təmir olunması nəzərdə tutulub. Eyni zamanda yeni tikilən və əsaslı təmir olunan bütün təhsil müəssisələri müasir standartlara cavab verən avadanlıqlar və istilik sistemi ilə təmin olunacaq.

Kompüterləşmə ilə bağlı 3 illik proqramın başa çatdığını və artıq təsdiq mərhələsində olan yeni proqrama əsasən bu sahədə işlərin davam etdiriləcəyini bildirən Misir Mərdanov diqqətə çatdırdı ki, bu mərhələdə İKT avadanlıqları ilə təmin olunmuş müəssisələrdə onlardan səmərəli istifadəyə, müasir texnologiyaların yalnız ümumtəhsil məktəblərində deyil, bütövlükdə təhsil sistemində tətbiqinə, təhsil müəssisələrinin genişzolaqlı sürətli İnternet şəbəkəsinə qoşulmasına xüsusi önəm veriləcək.

2008-2009-cu dərs ilində respublikanın ümumtəhsil məktəblərinin I siniflərində tədrisin Milli Kurrikulum sənədinə əsasən aparılacağını xatırladan təhsil naziri bildirdi ki, həmin şagirdlər və onların müəllimləri üçün yeni dərsliklər və dərs vəsaitləri çap olunacaq.

Daha sonra təhsil naziri yeniliklərdən biri olan mərkəzləşdirilmiş üsulla aparılan buraxılış imtahanları haqqında danışaraq bildirdi ki, artıq 52 min şagirdi əhatə edən 2 sınaq imtahanı keçirilib və aprel ayında 3-cü yoxlama imtahanının təşkil edilməsi nəzərdə tutulub. İyunun 6-da isə XI-lər mərkəzləşdirilmiş qaydada son buraxılış imtahanı verəcəklər. Misir Mərdanov qeyd etdi ki, gələcəkdə hər bir təhsil pilləsindən digərinə keçid zamanı da mərkəzləşdirilmiş üsulla test imtahanının keçirilməsi nəzərdə tutulur və bu istiqamətdə artıq müəyyən işlər görülməkdədir.

Təlimin keyfiyyətinin yüksəlməsinə yönəlmiş 50 ən yaxşı ümumtəhsil məktəbinin və 100 ən yaxşı müəllimin seçilməsi haqqında sərəncamı ölkə başçısı cənab İlham Əliyevin bu sahəyə göstərdiyi böyük qayğı və diqqət kimi dəyərləndirən Misir Mərdanov müsabiqələrin keçirilməsi məqsədilə Təşkilat Komitəsi və işçi qrupları yaradıldığını, hər 2 müsabiqənin 3 mərhələdə təşkil ediləcəyini, hazırda Təhsil Nazirliyində I mərhələ üzrə sənəd qəbulu aparıldığını və bu prosesin martın 20-dək davam edəcəyini bildirdi.

Daha sonra təhsil naziri məktəbəqədər, peşə təhsili sahəsində dövlət proqramları çərçivəsində görüləcək işlərdən söz açdı və ali təhsillə bağlı hazırlanan proqram haqqında məlumat verdi. O, bu il ölkə Prezidentinin təsdiq etdiyi Proqram çərçivəsində artıq azərbaycanlı gənclərin dünyanın ən nüfuzlu ali məktəblərinə təhsil almağa göndərildiyini deyərək gələcəkdə bu işin daha geniş miqyasda davam edəcəyini diqqətə çatdırdı.

Hicran ZöHRABQIZI