Heydər Əliyev Fondunun prezidenti Mehriban xanım Əliyeva Samux rayonunun Əliuşağı kənd orta məktəbində və Kəlbəcər rayonunun 67 nömrəli məktəbində olub

AzərTAc xəbər verir ki, Azərbaycan Prezidenti İlham Əliyevin Samux rayonuna səfəri çərçivəsində Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban Əliyeva martın 3-də Mirzə Fətəli Axundov adına Əliuşağı kənd orta məktəbində olmuşdur.

2005-ci ildə Heydər Əliyev Fondunun dəstəyi ilə tikilmiş məktəbdə 200 şagird təhsil alır. 2007-ci ildə məktəbin 3 məzunu yüksək balla ali məktəblərə qəbul olunmuşdur. Mehriban Əliyeva Azərbaycan dili və tarix kabinetləri və kompüter otağı ilə tanış oldu. Bildirildi ki, kompüterlərin hamısı İnternet şəbəkəsinə qoşulmuşdur. Mehriban xanım məktəbin kollektivinə uğurlar arzuladı.

Heydər Əliyev Fondunun prezidenti həmin kənddə yerləşən Kəlbəcər rayonunun 67 nömrəli məktəbində də oldu. Mehriban xanıma məlumat verildi ki, 2004-cü ildə tikilmiş məktəbin on sinif otağı var. Burada Kəlbəcər rayonundan olan 40 şagird təhsil alır. Heydər Əliyev Fondunun prezidenti məktəbin kompüter otağı, ibtidai sinif otağı, kitabxanası ilə tanış oldu. Bildirildi ki, kitabxanada dərsliklərdən və bədii ədəbiyyatdan ibarət 1800 kitab var. Mehriban xanım Heydər Əliyev guşəsində ümummilli liderin həyat və fəaliyyətini əks etdirən fotostendə də baxdı.

Heydər Əliyev Fondunun prezidenti Mehriban Əliyeva Gəncə uşaq evində olub

Prezident İlham Əliyevin Gəncəyə səfəri çərçivəsində martın 3-də Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva Gəncə uşaq evində olmuşdur.

Burada uşaqlar Mehriban xanımı səmimiyyətlə qarşılayaraq, qarşıdan gələn 8 Mart qadınlar bayramı münasibətilə onu təbrik etdilər.

1997-ci ildən fəaliyyət göstərən Gəncə uşaq evi ötən il əsaslı təmir olunmuşdur. Hazırda burada 83 uşaq tərbiyə alır.

Mehriban xanım Əliyeva burada yaradılan şəraitlə tanış oldu, uşaqların qida rejimi ilə maraqlandı, kompüter otağına baxdı. Bildirildi ki, buradakı 10 kompüterin hamısı İnternetə qoşulmuşdur. Azərbaycan Prezidentinin xanımı uşaq evinin "Banuçiçək" ansamblının hazırladığı konsert proqramına, ədəbi-bədii kompozisiyaya baxdı. "O olmasın, bu olsun" musiqili komediyasından fraqment xüsusilə xoş təsir bağışladı.

Heydər Əliyev Fondunun prezidenti uşaqlarla xatirə şəkli çəkdirdi.

AzərTAc