|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Azərbaycan
Milli Elmlər Akademiyasında Heydər Əliyevin 85 illik
yubileyinə həsr olunmuş tədbirdə təhsil
naziri cənab Misir Mərdanovun çıxışı
Hörmətli
konfrans iştirakçıları! Hər bir tarixi mərhələdə
cəmiyyətin tərəqqisi bilavasitə elm və
təhsilin inkişafından, onun əhəmiyyətinin düzgün
qiymətləndirilməsindən asılı olmuşdur.
Bütün dövrlərdə cəmiyyətin tələbatı
elmin və təhsilin inkişafını sürətləndirmiş,
elmi-texniki tərəqqi isə təhsil sistemi qarşısında
həlli vacib daha mürəkkəb vəzifələr qoymuşdur.
Qloballaşmanın geniş vüsət aldığı
informasiya cəmiyyətində sosial-iqtisadi
fəaliyyət sahələrində rəqabətin gücləndiyi,
habelə zaman ötdükcə təbii resursların azaldığı
müasir dövrdə hər iki amilin rolu artmaqdadır. Onu da
qeyd etmək lazımdır ki, yüksək intellektə malik
insan kapitalının formalaşmasında, davamlı inkişafa
zəmin yaradan güclü iqtisadiyyatın qurulmasında elmin
və təhsilin rolu indiki qədər heç vaxt aktual olmamışdır.
İnkişaf etmiş ölkələrin
təcrübəsinə nəzər salsaq görərik ki, yalnız
o dövlətlər inkişaf edir ki, orada təhsilin
əhəmiyyəti cəmiyyət tərəfindən
kifayət qədər dərk olunur və təhsilə
hərtərəfli ictimai dəstək formalaşır.
Məhz belə bir yanaşma ilə ölkənin davamlı
inkişafına yönəlmiş
rəqabətqabiliyyətli təhsil sistemi formalaşdırmaq
mümkündür. Təcrübə göstərir ki, təbii
sərvətlərin bolluğu dövlətin inkişafının
əsas göstəricisi deyil, başlıcası, bu
sərvətlərin cəmiyyətin
hərəkətverici qüvvəsi olan insan kapitalına çevrilməsini
təmin etməkdir. Bu, hazırkı
mərhələdə elmin və təhsilin əsas
vəzifələrindən biridir. ABŞ, Yaponiya,
Cənubi Koreya və digər inkişaf etmiş ölkələr
malik olduqları maddi resurslardan daha çox təhsil sisteminin
yetişdirdiyi insan kapitalından böyük gəlirlər
əldə etmişlər. Bu ölkələrdə inkişafa
təsir göstərən amillər içərisində
təhsilin çəkisi hissolunacaq dərəcədə yüksəkdir
və təxminən 70 faiz təşkil edir.
Dünya
Bankının apardığı tədqiqatın
nəticələri göstərir ki, ABŞ-ın milli
sərvətinin 76 faizini insan kapitalı, 19 faizini istehsal,
5 faizini təbii resurslar təşkil edir. Avropa ölkələrində
insan kapitalı 74, istehsal 24, təbii resurslar yalnız 2
faiz təşkil edir. Rusiyada isə insan kapitalı 50,
istehsal 10, təbii resurslar 40 faiz səviyyəsindədir.
Hörmətli konfrans iştirakçıları! Məlumdur ki, Azərbaycan təbii resurslarına
görə zəngin bir ölkədir, lakin uzun müddət bu
resurslar ölkənin milli maraq və mənafeyinə
xidmət göstərməmiş, əsasən keçmiş
İttifaqın cari ehtiyaclarına yönəldilmişdi.
Hələ sovet dövründə bu vacib məsələ
Heydər Əliyevi daim düşündürürdü, lakin o zaman
hər hansı bir təşəbbüsün həyata keçirilməsi
imkanları məhdud idi. Yalnız müstəqillik
illərində bu təbii resursların ölkəmizin indisi
və gələcəyi üçün zəruri olan insan kapitalına
çevrilməsi imkanları yarandı. Bu amilin nə
qədər vacib olduğunu yaxşı bilən ümummilli
liderimizin müdrik siyasəti, dəmir məntiqi, polad
iradəsi nəticəsində daxili və xarici müqavimətlər
dəf olundu və Azərbaycanın müstəqilliyinin
əsas qarantı olan "Əsrin müqaviləsi"
imzalandı, bu tarixi hadisənin nəticəsi olaraq,
sonralar digər enerji və infrastruktur layihələrinin
gerçəkləşdirilməsi üçün şərait yaradıldı.
Hörmətli konfrans iştirakçıları! Tarixə nəzər salsaq, çox az dövlət
xadimi göstərmək olar ki, öz xalqının,
vətəndaşı olduğu ölkənin ictimai-siyasi,
sosial-iqtisadi, milli mənəvi tərəqqisindəki
xidmətləri ilə ulu öndərimiz
səviyyəsinə yüksələ bilsin. İnkarolunmaz həqiqətdir ki, ötən
əsrin 70-ci illərindən etibarən 30 ildən artıq
bir müddətdə Azərbaycanda iqtisadiyyatın, elmin,
təhsilin, mədəniyyətin dirçəlişi və
dinamik inkişafı, eləcə də dövlət müstəqilliyinin
möhkəmləndirilməsi, qısa bir zamanda Azərbaycanın
beynəlxalq aləmdə böyük nüfuz qazanması, sürətlə
dünya birliyinə inteqrasiyası bilavasitə Heydər
Əliyevin fəaliyyəti ilə bağlıdır, bu dövr
ölkəmizin inkişafında xüsusi mərhələ
təşkil edir. Ulu öndərin genişmiqyaslı, çoxcəhətli
fəaliyyətində elmin, təhsilin inkişafına
diqqət və qayğı prioritet sahə kimi daim mühüm
yer tutmuşdur. Təhsilin aktual problemlərini və
perspektivlərini incəliklərinə qədər
dərindən bilən, onun cəmiyyətin inkişafında
rolunu və şəxsiyyətin formalaşmasında
əhəmiyyətini yüksək qiymətləndirən
dahi rəhbərin təhsillə bağlı
dəyərli ideyaları, sözün əsl mənasında, müasir
təhsil tariximizin nadir incilərindəndir. Güclü
məntiqə, qibtə olunası uzaqgörənliyə
əsaslanmış həmin ideyalar, tarixi tövsiyələr
həm keçmiş SSRİ dövründə, həm də müstəqillik
illərində Azərbaycan təhsilinin inkişaf proqramına
çevrilmişdi. Bu böyük şəxsiyyətin hələ
sovet ideologiyasının hökm sürdüyü illərdə
təhsil sahəsi ilə bağlı irəli sürdüyü
fikirləri, gördüyü işləri bu günlə müqayisə
etdikdə, zamanı necə və hansı
səviyyədə qabaqladığının bir daha
şahidi oluruq. Təhlil göstərir ki, ulu öndər öz
fəaliyyətində təhsilin bütün pillələrinin
inkişafı, onun məzmunu, idarə olunması,
təlim-tərbiyə prosesinin mahiyyəti,
cəmiyyətdə müəllimin rolu barədə konseptual
müddəalar irəli sürmüşdür. Bu gün qətiyyətlə demək olar ki,
Heydər Əliyevin Azərbaycana uzunmüddətli
rəhbərliyinin ən sanballı göstəriciləri
təhsilin ayrı-ayrı pillələrinin geniş şəbəkəsinin,
maddi-texniki bazasının, güclü elmi-pedaqoji kadr potensialının
yaranması, həyata keçirilən genişmiqyaslı
təhsil quruculuğu, respublikada azərbaycançılıq
məfkurəsinin və milli ruhun yüksəlişi, milli özünüdərkin
təmin edilməsi, xalqın tarixi yaddaşının özünə
qaytarılması, milli dövlətçilik hisslərinin güclənməsi
gələcək inkişafın güclü təməlini
qoymuşdu. Həmin dövrdə Azərbaycanda
məktəbəqədər təhsil müəssisələrindən
tutmuş ali məktəblərədək bütün təhsil
ocaqları əvvəlki illərlə müqayisədə
yeni inkişaf pilləsinə yüksəlmiş, bu
istiqamətdə ardıcıl aparılan dövlət
siyasəti xalqımızın təhsil, ümummədəni
və intellektual səviyyəsinin yüksəldilməsində
müstəsna rol oynamışdır. Müstəqil Azərbaycan dövlətinin banisi
Heydər Əliyev bu dövlətin qurulması, inkişafı,
dünyada tanınması sahəsində çoxsaylı tarixi addımlar
atmışdır, fikrimizcə, bu addımların ən
uğurlusu ondan ibarətdir ki, həmin siyasət hazırda
Prezident İlham Əliyev tərəfindən böyük müvəffəqiyyətlə
davam etdirilir və Azərbaycan dünyada siyasi
cəhətdən ən stabil ölkələr sırasına
çıxaraq iqtisadi inkişaf tempinə görə lider ölkəyə
çevrilmişdir. Hörmətli konfrans iştirakçıları! ümumi təhsil pilləsinin vətəndaşların
müstəqil həyata hazırlanmasında mühüm rolu danılmazdır.
Məhz orta təhsil vasitəsilə cəmiyyətin
iqtisadi, mədəni və sosial inkişafının
həlledici qüvvəsi olan şəxsiyyətin formalaşdırılmasının
əsası qoyulur. Heydər Əliyevin uzaqgörən
siyasəti ilə respublikada aparılan genişmiqyaslı
məktəb tikintisi ümumi təhsil göstəricilərinin
yaxşılaşdırılmasına güclü təkan vermişdi.
Belə ki, 1970-75-ci illərdə Azərbaycanda ümumilikdə
849 ümumtəhsil məktəbi tikilib istifadəyə
verilmiş, nəticədə şagirdlərin bir növbədə
oxuma göstəricisi 75 faizə yüksəlmişdisə,
cənab İlham Əliyevin bu kursu uğurla davam
etdirməsi nəticəsində son illərdə 250
mindən çox şagird yerlik 1220 yeni məktəb inşa
olunmuş, 1600-dək məktəb müasir avadanlıqla
təchiz edilmisdir. Məktəblərin infrastrukturunun
yeniləşdirilməsi və təhsilin inkişafı
sahəsində ümummilli liderimiz Heydər Əliyevin adını
daşıyan və onun ideyalarının daşıyıcısı
olan Fondun əvəzsiz xidmətlərini də xüsusi qeyd
etməyi özümə borc bilirəm. ümumi təhsilin dövlət və
cəmiyyət qarşısında ən mühüm
vəzifələrindən biri də istedadlı şagirdlərin
vaxtında aşkara çıxarılması və onların
davamlı inkişafı üçün lazımi şəraitin
yaradılmasıdır. İstedadlı insanlar hər bir
ölkənin əvəzolunmaz intellektual sərvəti,
həm də həmin ölkələrdəki təhsil
səviyyəsinin real göstəricisidir. Ulu öndərimiz
Heydər Əliyevin sözləri ilə desək,
"Gələcək bilikli, elmli, istedadlı insanların
çiyinləri üstündə qurulur". Məhz ümummilli
liderimizin proqram xarakterli bu müddəası, eləcə
də XXI əsrdə davamlı insan inkişafına yönəlmiş
təhsil siyasəti möhtərəm Prezidentimiz İlham
Əliyevin təsdiq etdiyi 2006-2010-cu illəri əhatə
edən "Xüsusi istedada malik olan uşaqların
(gənclərin) yaradıcılıq potensialının
inkişafı üzrə Dövlət Proqramı"nın
əsasını təşkil etmişdir. Təsadüfi deyil ki, ümummilli liderimizin müəllimə,
müəllim peşəsinə və öz müəllimlərinə
münasibəti hər zaman diqqətəlayiq olmuşdur. Ulu
öndərimiz "Müəllim adı ən yüksək addır.
Mən müəllimdən yüksək ad tanımıram",
"Müəllim vəzifəsi ona görə şərəflidir
ki, o, cəmiyyət üçün ən dəyərli, bilikli,
zəkalı, tərbiyəli, vətənpərvər
vətəndaşlar hazırlayır" deməklə,
əslində, müəllimin necə yüksək statusa malik
olduğunu, müasir dövrdə müəllimin missiyasının
nədən ibarət olduğunu bəyan etmişdir. ümummilli
liderimizin bu ideyalarını uğurla davam etdirən möhtərəm
Prezidentimiz cənab İlham Əliyev 2007-ci ilin sentyabrında
müəllim əməyinin stimullaşdırılması
və təhsilin keyfiyyətinin yüksəldilməsinə
xidmət edəcək "Ən yaxşı ümumtəhsil
məktəbi və ən yaxşı müəllim mükafatlarının
təsis edilməsi haqqında" tarixi sərəncam
imzalamaqla, son illərdə 800-dən çox təhsil işçisini
dövlətin ən yüksək təltiflərinə layiq görməklə
Heydər Əliyevin ideyalarına sadiqliyini bir daha nümayiş
etdirir. Hörmətli konfrans iştirakçıları! Yeri gəlmişkən onu da qeyd etmək
istərdim ki, əvvəlki illərdən fərqli olaraq
müasir dövrdə müəllim hər bir dərsi təhsil
alanlarla pedaqoji əməkdaşlıq prosesinə çevirməyi,
onların təşəbbüskarlığını,
təlim müstəqilliyini layiqincə
qiymətləndirməyi, onları yaradıcı
fəaliyyətə, tədqiqatçılığa
istiqamətləndirməyi, onlarda öz potensial imkanlarına
inam oyatmağı bacarmalıdır. Müxtəlif
səviyyəli uşaqlar və gənclərlə işləmək,
onlara dövrün tələbinə uyğun həyati bacarıqlar
aşılamaq, onları düşünməyə, ən başlıcası,
qeyri-standart düşünməyə sövq etmək, bilikləri
müstəqil mənimsəməyə yönəltmək,
təlim prosesində qeyri-ənənəvi mütərəqqi
üsullar tətbiq etmək-fikrimizcə bütün bunlar indiki dövrdə
müəllimin pedaqoji ustalığını və metodik
kamilliyini şərtləndirən əsas xüsusiyyətlərdir.
Bu günün müəllimi daha çox təşkilatçılığı,
istiqamətvericiliyi ilə fərqlənməli, təhsil
alanlara "öyrənməyi öyrətməyi" bacarmalıdır.
Diqqətinizə onu da çatdırmaq
istəyirəm ki, həm sovet dövründə, həm də müstəqillik
illərində orta məktəb şagirdləri üçün
məzmun və poliqrafik cəhətdən dövrün
tələblərinə cavab verən dərsliklərin
hazırlanması və şagirdlərə pulsuz çatdırılması
ideyası da məhz Heydər Əliyevə məxsusdur.
Həmin kursun davam etdirilməsi nəticəsində bu gün
Azərbaycan MDB məkanında yeganə ölkədir ki,
birinci sinifdən onbirinci sinfədək bütün şagirdlər
dərsliklərlə pulsuz təmin edilir. Əlamətdar haldır ki, bir neçə il
bundan əvvəl ciddi problemə çevrilmiş,
məktəblərin latın qrafikası ilə çap olunmuş
dərs vəsaitləri, əlavə oxu materialları
və xəritələrlə təminatı
məsələsi də indi öz həllini tapmışdır.
Müasir dövrdə hər bir ölkədə
intellektual və elmi potensialın, yüksək
səviyyəli idarəetmənin, sosial-iqtisadi inkişafın
ən vacib göstəricisi məhz İKT-nin tətbiqi
ilə bağlıdır. İKT-nin cəmiyyətin
inkişafında rolunu yüksək qiymətləndirən
ulu öndərin tapşırığı ilə bu mühüm
sahə üzrə milli strategiya hazırlandı və 1997-ci
ildə qəbul edildi. İKT-nin təhsil sistemində daha
geniş tətbiqi isə möhtərəm Prezidentimiz İlham
Əliyevin bu strategiyanı ardıcıl olaraq davam
etdirməsi sayəsində mümkün olmuşdur.
Nəticədə ümumtəhsil məktəblərində
təhsil alan hər 29 şagirdə 1 kompüter nisbəti
təmin edilmiş, ölkəmizin təhsil tarixində ilk
dəfə olaraq elektron təlim materialları hazırlanıb
məktəblərə çatdırılmışdır.
Halbuki 2004-cü ildə hər 1000 şagirdə 1 kompüter düşürdü.
1999-cu il iyunun 15-də-Milli Qurtulus Gunu
Prezidentin sərəncamı ilə təsdiq olunmuş
təhsil sahəsində İslahat Proqramının
əsasını da Heydər Əliyevin təhsilimizin
gələcək inkişafı ilə bağlı
ideyaları, proqram xarakterli fikirləri təşkil etmişdir.
Proqramda təhsilin gələcək inkişaf konsepsiyası
və strategiyası müəyyənləşdirilməklə,
mərhələlər üzrə təhsil sisteminin
strukturunda, idarə edilməsində, məzmununda,
maddi-texniki bazasında, iqtisadiyyatında, kadr hazırlığı
və təminatında islahatların aparılması
nəzərdə tutulmuşdu. Həmin sənəd hazırlanarkən
ölkəmizdə təhsil sisteminin ayrı-ayrı inkişaf
mərhələləri, xüsusən 1970-1980-ci
illərdə təhsil sahəsində toplanmış
tarixi təcrübə ciddi şəkildə
nəzərə alınmışdı. O dövrdə islahatlar prosesinə Dünya Bankının
qoşulması, digər beynəlxalq təşkilatların
bu prosesdə fəal iştirakı, Azərbaycan
təhsilinin dünya təhsil sisteminə sürətli
inteqrasiyası, inkişaf etmiş ölkələrlə
təhsil sahəsində partnyorluq əlaqələrinin
genişləndirilməsi, əslində, Heydər Əliyev
şəxsiyyətinin beynəlxalq aləmdə böyük nüfuzu
ilə əlaqədar idi. Onu da nəzərinizə çatdırım
ki, vaxtilə ümummilli liderimiz tərəfindən
təsdiq olunmuş İslahat Proqramına əsasən
təhsilin məzmunu, təhsilalanların
nailiyyətlərinin qiymətləndirilməsi, müəllim
hazırlığı, təhsilin idarə olunması,
maliyyələşdirilməsi sahəsində islahatlar ölkə
başçısının diqqəti və qayğısı
nəticəsində bu gün uğurla davam etdirilir. Hörmətli konfrans iştirakçıları! Cəmiyyətin ahəngdar inkişafında,
onun intellektual potensialının formalaşmasında, maddi
sərvətlərin insan kapitalına çevrilməsində
ali təhsilin müstəsna əhəmiyyəti danılmazdır.
Sürətli dəyişikliklərin baş verdiyi hazırkı
vaxtda məhz ali təhsil sosial-iqtisadi və mədəni
sahələrdə davamlı inkişafa təkan verən
real qüvvə hesab edilir. Ali təhsilin cəmiyyətin inkişafında
müstəsna əhəmiyyətini dərindən bilən
və həmişə onu diqqət mərkəzində
saxlayan Heydər Əliyevin göstərdiyi səylər
nəticəsində həmin təhsil müəssisələrinin
şəbəkəsinin genişləndirilməsi,
maddi-texniki bazasının möhkəmləndirilməsi,
keyfiyyətin yüksəldilməsi, sağlam mənəvi mühitin
formalaşdırılması, keçmiş İttifaqın
qabaqcıl ali məktəblərində azərbaycanlıların
təhsilinin, o cümlədən hərbi təhsilinin təşkili,
xalqın təkidli tələbi ilə ikinci dəfə
hakimiyyətə qayıtdıqdan sonra bu
ənənənin bərpası, müstəqilliyin ilk
illərində ali təhsil sahəsindəki ciddi
problemlərin həlli bu gün öz bəhrəsini
verməkdədir. Həmin ideyaların uğurla davam
etdirilməsinin nəticəsidir ki, bu gün dünyanın 40-a
yaxın ölkəsində 3000-dən artıq azərbaycanlı
gənc, Azərbaycanın ali
məktəblərində isə 6500-dən çox
əcnəbi tələbə təhsil alır. Qara qızılın
insan kapitalına çevrilməsini bəyan edən Prezident
İlham Əliyevin sərəncamı ilə təsdiq
olunmuş və 2015-ci ilədək 5000 nəfər
azərbaycanlı gəncin dünyanın aparıcı ali
məktəblərində təhsil almalarını
nəzərdə tutan Dövlət Proqramı da Heydər
Əliyev siyasətinin uğurlu davamıdır. Daha bir maraqlı məqam... Məlumdur ki,
Azərbaycan bu gün haqqında daha çox danışılan
və müzakirələr obyektinə çevrilən Boloniya
Bəyannaməsinə rəsmi olaraq 2005-ci ilin mayında
qoşulmuşdur. Lakin çox əlamətdardır ki, ulu öndərimiz
bu Bəyannamədə təsbit olunmuş əsas
məqsədlərin mahiyyətini hələ 6 il
əvvəl-1999-cu ilin martında keçirilmiş Təhsil
Sahəsində İslahatlar üzrə Dövlət Komissiyasının
iclasındakı yekun nitqində belə ifadə etmişdir:
"Azərbaycanın təhsil müəssisələrində
təhsil alan insanların və xüsusən ali
məktəbləri bitirənlərin bilik səviyyəsi
və onların biliklərini təsdiq edən
sənədlər gərək dünyanın inkişaf etmiş
ölkələrinin ali məktəblərinin bilik
səviyyəsinə uyğunlaşdırılsın.
Onların prinsiplərinə uyğunlaşdırılsın
ki, Azərbaycanda təhsil almış və mühəndis
diplomu almış bir insan başqa ölkələrdə
də həmin diplomla qəbul edilə və
fəaliyyət göstərə bilsin". Məhz ali təhsil pilləsinin inkişafı
zəruriliyini nəzərə alaraq, Azərbaycan
Respublikasının Prezidenti cənab İlham Əliyev
2008-ci ilin yanvarında "Azərbaycan Respublikasının
ali təhsil müəssisələrinin Avropa ali təhsil
məkanına inteqrasiyası ilə bağlı bəzi
tədbirlər haqqında" sərəncam imzaladı.
Sərəncama əsasən "2008-2012-ci illərdə
ali təhsil sistemində islahatlar üzrə Dövlət Proqramı"nın
layihəsi hökumətə təqdim edildi. Proqram layihəsində Boloniya
Bəyannaməsinə və beynəlxalq təhsil təcrübəsinə
uyğun olaraq, ali təhsilin normativ hüquqi bazasının
yeniləşdirilməsi, məzmununun təkmilləşdirilməsi,
müəssisələrin strukturunun və idarə olunması
sisteminin müasir tələblər baxımından
modernləşdirilməsi, keyfiyyətin təmin olunması,
kadr hazırlığı, elmi-tədqiqat işlərinin,
maddi-texniki bazanın müasir tələblərə uyğun
qurulması, yeni maliyyələşdirmə
mexanizmlərinin tətbiqi nəzərdə tutulmuşdur. Yeri gəlmişkən onu da qeyd edim ki, bu gün
ölkəmizdə fəaliyyət göstərən 1696
elmlər doktorunun 1150-si və ya 67,8 faizi, 8644 elmlər
namizədinin isə 5565 nəfəri və ya 64,4 faizi
təhsil müəssisələrində çalışır. Hörmətli konfrans iştirakçıları! Məlum həqiqətdir ki, təhsil elmsiz,
elm təhsilsiz inkişaf edə bilməz. Bu iki strateji
sahə biri-biri üçün tədqiqat və tətbiq obyektidir.
Onların vəhdətini, qarşılıqlı
zənginləşməsini, ümumi məqsədlərə
yönəldilməsini təmin etmədən
cəmiyyətdə davamlı inkişafa nail olmaq qeyri-mümkündür.
İnanırıq ki, möhtərəm Prezidentimizin
"Azərbaycan elmində islahatların aparılması
ilə bağlı dövlət komissiyasının yaradılması
haqqında" 10 aprel 2008-ci il tarixli sərəncamı
da məhz bu məqsədə xidmət edir və bu mühüm
sahənin inkişafında əsaslı dəyişikliklərə
səbəb olacaqdır. ümummilli lider Heydər Əliyevin yaratdığı
etibarlı zəmin əsasında müstəqil
Azərbaycanda təhsil sistemində irimiqyaslı islahatlar
prosesi artıq dönməz xarakter almış, Prezident İlham
Əliyevin təhsil sisteminə diqqət və qayğısı
sayəsində bütün təhsil pillələrini
əhatə edən İnkişaf Proqramları təsdiq
olunaraq reallaşdırılmağa başlanmışdır. Müsbət haldır ki, son illər
cəmiyyət tərəfindən təhsilin
əhəmiyyəti daha ciddi qəbul olunmağa başlanmışdır.
Fikrimizcə, bunun əsas səbəblərindən biri
cənab İlham Əliyevin bütün çıxışlarında
və fəaliyyətində təhsili prioritet
səviyyəyə qaldırması, "Təhsil
Azərbaycanın davamlı inkişaf strategiyasının
ən öncül istiqamətlərindən biridir", -
deməklə ölkənin inkişafında təhsilin müstəsna
rolunu bəyan etməsi ilə bağlıdır. Son illərdə təhsilin inkişafı
ilə bağlı həyata keçirilən dövlət
proqramları, bu sahədə aparılan məqsədyönlü
islahatlar, beynəlxalq təşkilatlarla
səmərəli əməkdaşlıq, xüsusilə ölkə
Prezidentinin təhsilə böyük diqqət və qayğısı
bir daha əmin olmağa əsas verir ki, müasir Azərbaycan
təhsili özunün zəngin mütərəqqi
ənənələrinə, milli mənəvi və ümumbəşəri
dəyərlərə, beynəlxalq təcrübəyə
əsaslanaraq ümummilli liderimiz Heydər Əliyevin müəyyənləşdirdiyi
və möhtərəm Prezidentimiz cənab İlham Əliyevin
uğurla davam etdirdiyi strateji kursla daha da inkişaf
edəcəkdir. Hörmətli konfrans iştirakçıları! Şübhəsiz, bir məruzə çərçivəsində
dahi şəxsiyyət Heydər Əliyevin təhsilin inkişafı
ilə bağlı tarixi xidmətlərini təfərrüatı
ilə açmaq qeyri-mümkündür. Heydər Əliyevin bizlərə və
gələcək nəsillərə ərməğan
etdiyi zəngin irs qiymətli bir xəzinədir. Əminəm
ki, illər ötəcək, nəsillər bir-birini
əvəz edəcək, Azərbaycan xalqının milli
iftixarı olan Heydər Əliyevin işıqlı
təfəkküründən süzülüb gələn
dəyərli ideyalar uğurlu gələcəyə
gedən yollarımızda əbədi məşəl
kimi daim şölələnəcəkdir. Diqqətinizə görə təşəkkür
edirəm.
|