|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Şəxsiyyətyönümlü kurrikulumlar əsasında yaradılan dərsliklərin xüsusiyyətləri Müstəqil Azərbaycanın inkişafı
yolunda gedən quruculuq işləri cəmiyyətin bütün
sahələrini, o cümlədən də təhsili
əhatə edir. "Bütün qurumların fəaliyyətini
təhsil alanın mənafeyinə xidmət etmək
məqsədi ətrafında birləşdirən yeni
təhsil sisteminin yaradılması" (Azərbaycan
Respublikasının təhsil sahəsində İslahat
Proqramı. Azərbaycanın təhsil siyasəti
(1998-2004), I kitab. Bakı, "çaşıoğlu",
2005) istiqamətində həyata keçirilən
tədbirlər bilavasitə cəmiyyətin sosial sifarişlərinin
öyrənilməsinə yönəldilməklə daha
demokratik xarakter daşıyır. Təhsilin bütün
mərhələlərində, o cümlədən ümumi
təhsildə şəxsiyyətin maraq və ehtiyaclarını
ödəyə bilən təhsil sisteminin yaradılması mühüm
vəzifə kimi qarşıya qoyulur. Belə bir
tələb isə istər-istəməz, ilk növbədə,
təlimin məzmununun, ona uyğun metod, forma və
vasitələrdən ibarət strateji bir sistemin hazırlanmasını
tələb edir. Bütün bunlarla əlaqədar artıq
ənənəvi təhsil müasir dövrün tələbatını
ödəmədiyindən 2006-cı ildə mütərəqqi
dünya təcrübəsini özündə əks etdirən yeni bir
sənəd -
"Azərbaycan Respublikasında ümumi təhsilin
Konsepsiyası (Milli Kurrikulumu)" qəbul olunmuşdur.
Ona uyğun olaraq ibtidai təhsilin fənn kurrikulumları
yaradılmış, təsdiq edilərək
məktəblərin istifadəsinə verilmişdir. Əsas
və orta təhsil üzrə fənn kurrikulumlarının
ilkin variantı üzərində işlər başa çatdırılmışdır.
Hazırda yeni kurrikulumların
tələblərinə uyğun resursların hazırlanmasına
başlanılmışdır. Bu il birinci siniflər
üçün buraxılmış dərsliklər ilkin təcrübə
kimi istifadəyə verilmişdir. Proses davam
etməkdədir. Təbii ki, növbəti siniflərdə
yeni kurrikulumların ardıcıl olaraq tətbiq
edilməsi bilavasitə yeni dərsliklərin vaxtında
və keyfiyyətlə hazırlanmasından asılı
olacaqdır. ölkəmizdə aparılan təhsil islahatının
bir mühüm istiqaməti dərsliklərin yaradılması
sahəsində illərlə davam edən təcrübənin
öyrənilib ümumiləşdirilməsi, məhz bu dövrdə
Azərbaycanda ilk dəfə "ümumi təhsil
sistemində dərslik siyasəti"nin qəbul
edilməsindən ibarət olmuşdur. Bu
sənəddə ilk dəfə dərsliyin sosial statusu müəyyənləşdirilmişdir.
Göstərilmişdir ki, "Dərslik konkret fənn üzrə
tədris planı və proqramı əsasında hazırlanmış
nəzəri və praktik biliklərin əsaslarının
sistemli və anlaşıqlı şəkildə izah
olunduğu əsas vəsait"dir (ümumi təhsil sistemində dərslik siyasəti.
Azərbaycanın təhsil siyasəti (1998-2005), II kitab.
Bakı, "Təhsil", 2005). Təhsilin keyfiyyətli
olması və yeni kurrikulumlarda müəyyənləşdirilmiş
nəticələrə çatmaq üçün uğurlu
irəliləyişlərin əldə edilməsində
dərsliyin rolu əvəzsizdir. Aparılan pedaqoji, psixoloji araşdırmalar
da onu göstərir ki, demək olar, bütün zamanlarda
dərsliklərin təlim prosesindəki
əhəmiyyəti və rolu pedaqoq alimlərimizin
diqqətini cəlb etmişdir. Lakin onun şagirdə yönəlməsi,
şəxsiyyətyönümlü xarakter alması ötən
əsrin sonlarından bir problem kimi meydana çıxmışdır.
"Şagirdlərin təfəkkürünü inkişaf
etdirməklə əqli fəaliyyətin əsas üsullarını
formalaşdırmaq" (İlina T. Pedaqoqika. Kurs lekçii.
M., "Prosveşeniye", 1984) dərsliyin hazırlanmasında
mühüm didaktik prinsiplərdən biri kimi
dəyərləndirilmişdir. Son vaxtlar psixopedaqogika
sahəsində tədqiqatlar aparan professor Ə.Əlizadə
bu məsələ ilə bağlı belə
nəticəyə gəlmişdir: "Şagird şəxsiyyətinin
formalaşdırılmasında dərsliklərin rolunun
hər vasitə ilə artırılması
zəruridir" (Əlizadə Ə. Yeni pedaqoji
təfəkkür: ideyalar, prinsiplər, problemlər. Psixoloji
araşdırmalar. Bakı, "Adiloğlu", 2001). Göründüyü kimi, pedaqogika və psixologiya
sahələrində tədqiqat aparan alimlərdən
bəziləri dərslik probleminə toxunaraq onun bir sıra
xüsusiyyətlərini şərh etməyə çalışmışlar.
Lakin müasir təhsil müstəvisində mövcud olan
ənənəvi araşdırmalar get-gedə öz aktuallığını
itirməyə başlamış, əvəzində yeni
yanaşmalarla zəngin olan müddəalar meydana çıxmışdır.
Bunlar bilavasitə dərsliklərin hazırlanmasının
mühüm pedaqoji problem kimi qoyulması, istiqamətləndirici
məzmuna malik olması, inteqrativ xarakter daşıması
və s. ilə əlaqədardır. İlkin araşdırmalar
onu göstərir ki, bu xüsusiyyətlərin şərh
edilməsi dərsliklərin şəxsiyyətyönümlü,
inteqrativ cəhətinin aydın təsəvvür olunmasına
imkan yaradır. Dərsliyin yaradılmasına pedaqoji problem kimi yanaşılması Dərsliklərin yaradılması
sahəsində əldə olunmuş təcrübələr
göstərir ki, ənənəvi qaydada əksər
dərsliklərin hazırlanmasına müvafiq elm
sahəsinin nailiyyəti kimi yanaşılmışdır.
Ona görə də dərsliklərin ümumi quruluşunun müəyyən
olunmasında daha çox elmi-nəzəri materialların
mənimsənilməsi ardıcıllığı
əsas götürülmüşdür. Bu fikri əsaslandırmaq üçün
hazırda istifadə edilən hər bir dərsliyi misal
gətirmək mümkündür. Məsələn,
"Azərbaycan dili" dərslikləri fonetika, leksika,
sözün tərkibi və söz yaradıcılığı,
morfologiya, sintaksis, nitq mədəniyyəti və üslubiyyat
materiallarının ardıcıllığı
sistemində qurulmuşdur. Yaxud, biologiyadan təlim
materiallarının sıralanmasında botanika, zoologiya,
insan və onun sağlamlığı, ümumi biologiya
materiallarının ardıcıllığı gözlənilmişdir.
Əslində, bu sistem həmin fənlər üzrə
proqramlara uyğun olaraq yaradılmışdır. Nəticədə dərsliklərin
belə bir sistemlə hazırlanması onun daha çox
deklarativ xarakterli materiallarla yüklənməsinə
gətirib çıxarmışdır. Bundan əlavə,
həmin dərsliklərin müəllifləri elmin daxili
məntiqinə tabe olmaqla onu daha çox monoqrafik üslubda yazmağa
meyil göstərmişlər. Bu proses ayrı-ayrı
elmlərin sisteminə uyğun olan, anlayışlarla yüklənmiş
kitabların (dərsliklərin) meydana çıxması
ilə nəticələnmişdir. Ona görə də çox
hallarda ümumtəhsil məktəblərinin
dərsliklərindən danışarkən onun
keyfiyyətinə, oradakı anlayışların
təhlilinə, nəzəri mülahizələrin doğruluğuna
elmin nailiyyəti baxımından yanaşılır,
qiymət verilir. Heç şübhəsiz, dərsliklər öz
məzmununda fənnin tələbinə uyğun olaraq müəyyən
nəzəri anlayışları ehtiva edir. Onun tərtib
olunmasında elmilik zəruri prinsiplərdən biri kimi
əsas götürülür. Elmin son nailiyyətlərinin
dərsliklərə gətirilməsi, onlardan həyati
bacarıqların formalaşdırılmasında
istifadə edilməsi mühüm tələb kimi qarşıya
qoyulur. Lakin bu, elmin əsaslarının kursun məzmununa
daxil edilməsinə, dərsliklərin bütövlükdə
nəzəri anlayışların mənbəyinə çevrilməsinə
heç də əsas vermir. ümumiyyətlə, dərsliklərin hazırlanması
ciddi pedaqoji problemdir. Onun həll edilməsi üçün
cəmiyyətin real tələbatlarına uyğun
təhsil standartlarının yaradılması, bu prosesi
tənzimləyən didaktik prinsiplərin müəyyənləşdirilməsi
vacib hesab edilir. Yalnız bundan sonra mükəmməl
dərsliklərin hazırlanmasından danışmaq olar.
Dərslik özünün mahiyyəti və
məzmununa, funksiyalarına görə digər
vəsaitlərdən, kitablardan fərqlənir. Uzun zaman
ona məlumat mənbəyi kimi baxılsa da, illər keçdikcə
dərsliyin struktur elementlərinə şagirdlərin
bacarıq və vərdişlərini formalaşdırmaq
üçün lazım olan təlim materialları daxil edilmişdir.
Bu dəyişmə və təkmilləşdirmə onun
əhəmiyyətinin artması və rolunun dəyişməsi
ilə baş vermişdir. Xüsusilə də indiki vaxtın
dərsliyinin funksiyasında daha əsaslı dəyişikliklər
etmək, onun hazırlanmasını ciddi pedaqoji problem kimi
tənzimləmək, elmi, nəzəri əsasda başa
çatdırmaq tələb olunur. "ümumi təhsil
sistemində dərslik siyasəti"ndə göstərildiyi
kimi, "ümumtəhsil məktəbi dərslikləri,
əsasən, müvafiq iş dəftəri və müəllim
üçün metodik vəsaitlə birlikdə qəbul olunur" (ümumi
təhsil sistemində dərslik siyasəti.
Azərbaycanın təhsil siyasəti (1998-2005), II kitab.
Bakı, "Təhsil", 2005). Belə olan halda isə
həmin dərslik dəstinin nümunəsində müəllim-şagird-valideyn
üçlüyünün bağlılığı yaranır.
Beləliklə də, dərsliyin təlim prosesində
əlaqələndirici funksiyası daha da güclənmiş
olur. Məlum olduğu kimi, nəticəyönümlü
kurrikulumların meydana gəlməsi, təhsil standartlarının
yaradılması, nailiyyətlərin
dəyərlərlə müəyyənləşdirilməsi
diqqətin daha çox təlim nəticələrinə yönəldilməsini
tələb edir. Bu isə öz növbəsində
nəticələrə çatmaq üçün hər hansı
strategiyanı seçməkdə müəllimə
sərbəstlik verir. Müəllim bu strategiyaları özü müəyyənləşdirməlidir.
Bir sıra xarici ölkələrdə olduğu kimi, resurslar
çox olduqda müəllimlərin, eləcə də şagirdlərin
seçim imkanları genişlənir. Onlar
məqsədlərinə uyğun hər hansı
vasitə və ya iş üsuluna müraciət etməkdə
sərbəst olurlar. Belə şəraitdə
dərsliklər bir təlim vasitəsi kimi
digərlərindən o qədər də
fərqlənmir. Ona görə də dərsliklərin
təlim prosesindəki əvvəlki
"əvəzolunmaz" roluna münasibət dəyişir.
Yeni dərsliklərlə bağlı aparılan
araşdırmalardan alınan ilkin nəticələr ondan
ibarət olmuşdur ki, kurrikulumlara uyğun
dərsliklərin əvvəlkilərdən fərqli
qaydada hazırlanacağı, tədris vahidlərindən
ibarət hissələrə malik bir vəsait kimi formalaşdırılacağı
nəzərdə tutulur. ümumi təhsilin şəxsiyyətyönümlülüyü,
şagirdlərdə nəticələrə uyğun
səriştələrin formalaşdırılması
dərsliklərin tədris vahidlərindən, hər bir
tədris vahidinin paraqraflardan ibarət olması, onların
qiymətləndirmə vasitələri ilə
tənzimlənməsi, habelə dərsliklərə uyğun
iş dəftərlərinin hazırlanıb şagirdlərin
istifadəsinə verilməsi zərurətini doğurur. Dərslik və iş dəftəri üzərində
müəllimin fəaliyyətini nizamlamaq üçün müəllim
kitabı hazırlanır. Mahiyyət etibarilə bu kitab
yalnız müəllimlərə aid olduğundan burada
müəllimin bütün irəliləyişlərini
tənzimləyən materiallar verilir. Dərslikdəki
sualların, tapşırıq və çalışmaların
açılışları bu kitabda öz əksini tapır. Ona
görə də metodik vəsaitin yalnız müəllimlərə
paylanması normal hal kimi qəbul olunur. Məlum olduğu kimi, bütün təhsil
standartlarında şagirdlərin fəaliyyət
istiqamətləri əsas götürüldüyündən təlim
nəticələri bütövlükdə şagirdlərə yönəldilmişdir.
Təhsilin hər hansı pilləsində şagirdin inkişafını
izləmək, onu istiqamətləndirmək üçün imkanlar
yaradılmışdır. Elə buna görə də
kurrikulumların hazırlanmasında şagirdyönümlülüyün
nəzərə alınması xüsusi prinsip kimi qeyd edilmişdir. Yeni fənn kurrikulumlarının xüsusiyyətləri,
özünəməxsus cəhətləri barədə danışan
təhsil naziri Misir Mərdanov qeyd edir ki, "Təhsil
prosesində əhatəlilik daha geniş miqyas almalı,
məzmun, texnologiya və ya qiymətləndirmə
problemlərinin həllində ona diqqət
yetirilməlidir. Təhsil şəraitinin qurulmasında
şəxsiyyət modelinin bütün parametrlərdə
tələbləri ödənilməlidir" (ümumtəhsil
məktəblərinin I-IV sinifləri üçün fənn
kurrikulumları. Bakı, "Təhsil", 2008). Analoji
olaraq bu cəhətlərin dərsliklərin hazırlanmasında
da nəzərə alınması vacib hesab edilir. Onun
hər bir materialının seçilməsində, yaxud hazırlanmasında
şagirdlərin arzu və istəkləri, maraq
dairələri, eləcə də yaş və anlaq
səviyyəsi əsas götürülməlidir. Bundan
əlavə, şagirdlərin fiziki imkanları diqqət
mərkəzində saxlanılmalıdır. Dərsliklərin istiqamətləndirici məzmuna malik olması Dərsliklərin yaradılması
tarixində ondan istifadə edənləri məlumatlandırmaq,
onlara elmin sahələri ilə bağlı müəyyən
biliklər vermək ön planda dayanmışdır. Bu
səbəbdən də bəzi pedaqoji
ədəbiyyatlarda dərsliyin informasiya vermək funksiyasından
danışılmış, bir xüsusiyyət kimi
mahiyyətindən bəhs olunmuşdur. Təbii ki, bir
tədris kitabı kimi dərsliklərin informasiya
mənbəyi olması zərurətdir. Lakin hazırkı
dövrdə informasiya mənbələrinin çoxalması
və çeşidli informasiyaların içərisindən ən
lazım olanın seçilməsi onu göstərir ki, dərslik
əsas dərs kitabı kimi informasiya mənbəyi
olmaqdan daha çox istiqamətləndirici mahiyyət kəsb
etməlidir. Onun materiallarının məzmununda, ardıcıllığında
və sistemində şagirdi fəaliyyətə sövq
edən, istiqamətləndirən bir məntiq dayanmalıdır.
Bunların reallaşmasının birinci əsasını
şagirdin stimullaşdırılması, onda təlim marağının
yaradılması, motivləşmə təşkil edir.
"Motivləşmə dedikdə orqanizmi fəallaşdıran
və həmin fəallığı
istiqamətləndirən təhriklər
nəzərdə tutulur" (Bayramov Ə., Əlizadə
Ə. Psixologiya. Ali məktəblər üçün dərslik.
Bakı, "Maarif", 1989). Psixoloqların gəldiyi
qənaət bundan ibarətdir ki, "qabiliyyətli uşaqların
bir çoxu motivasiya çatışmazlığı ucbatından
yaxşı oxumur" (Əlizadə Ə. İdrak
prosesləri və hisslər. Psixopedaqoji
məsələlər. Bakı, 2006). Ona görə də
təlim səviyyəsini yüksəltmək üçün uşaqların
öyrənmə marağına təsir göstərmək, onu
stimullaşdırmaq vacib hesab edilir. Bunun üçün mühüm
yollardan biri vasitələr sistemini həmin
tələbə uyğunlaşdırmaqdan ibarətdir. Bu
isə öz növbəsində dərsliyin motivasiya imkanlarını
genişləndirməyi tələb edir. Tədqiqat göstərir ki, dünyada bu problemin
həllinə iki istiqamətdə yanaşılmışdır.
Birinci, dərsliklərin maraqlı təlim
vəsaitinə çevrilməsi üçün təlim tapşırıqları
şagirdlərin yaş səviyyəsinə uyğun
olaraq daha çox oyun elementləri, mütəhərriklik
tələb edən maraqlı fakt və hadisələr üzərində
qurulur. İkinci, şagird dərsliklərini daha çox idraki
tapşırıqlarla zənginləşdirmək üstün
keyfiyyət kimi qəbul olunur. çünki bu pillədə şagirdlərin
təfəkkür fəallığını tələb
edən məsələlərə, tapşırıqlara
daha çox diqqət yetirilir. Şagirdlər bunların icrasından,
əldə etdikləri nəticələrdən həzz
alır, qürur hissi keçirirlər. Təbii ki, bu cəhətlərə ümumi
təhsilin bütün pillələrində eyni
səviyyədə yanaşmaq düzgün olmazdı. Belə
ki, ibtidai təhsildə deyilən cəhətlərin
hər ikisinin olması məqbul sayılsa da, həmin
pillədə şagirdləri maraqlandıran oyun
elementlərinə, müxtəlif məzmunlu fakt və
hadisələrə üstünlük verilməlidir. Əsas və
orta təhsil pilləsində isə şagirdlərin
idraki maraqlarının obyekti, təfəkkür tərzi
onların mürəkkəb tapşırıqlar üzərində
işləməsini və buna üstünlük verilməsini
tələb edir. Hətta ən müasir texnologiyalardan
- informasiya və kommunikasiya texnologiyalarından
istifadə imkanlarının genişləndirilməsinə
yer ayrılması yüksək dəyərləndirilir. çünki
təhsilin keyfiyyətinin mühüm göstəricilərindən
biri kimi artıq informasiya texnologiyalarından yox,
"informasiya və kommunikasiya texnologiyaları"ndan
istifadə bacarıqları aktuallıq kəsb edir.
Akademik M.Potaşkinin qeyd etdiyi kimi, "Hazırda yeni
"informasiya texnologiyaları" termini pedaqoqların
istifadəsindən çıxır. Onun əvəzində
"informasiya və kommunikasiya texnologiyaları"ndan danışılır.
Fikrimizcə, terminin yenilənməsi onunla bağlıdır
ki, kompüterə əsaslanmaqla təhsilin keyfiyyətini
tərəddüdsüz yüksəldən yeni didaktik
vəzifələr, qərarlar reallaşır" (Potaşkin
M. Kaçestvo obrazovaniya: problemı texnoloqiya i upravleniya
(voprosax i otvetax). M., Pedaqoqiçeskoe obşestvo Rossii,
2002). Şagirdlərin axtarışa, tədqiqatçılığa
sövq olunması dərsliklərin mühüm istiqamətverici xüsusiyyətinin
təzahür formalarından biridir. Bu cəhət bütün ümumtəhsil
məktəblərinin dərsliklərinə şamil
edilir. Onların hazırlanmasında mühüm tələb
kimi qarşıya qoyulur. Bunu müasir dövrün təhsil
tendensiyası, qlobal dünyanın informasiya bolluğu və
intellekt əsrinin inkişaf qanunauyğunluqları
diktə edir. Ona görə də "Müasir təhsil
konsepsiyası ənənəvi didaktik sistemdən
fərqli olaraq, koqnitiv strukturların inkişafı
problemini sadəcə olaraq hafizə məkanında deyil,
yeni psixoloji məkanda, təfəkkür və hiss məkanında
həll edir" (Əlizadə Ə. İdrak prosesləri
və hisslər. Psixopedaqoji məsələlər. Bakı,
2006). İlkin araşdırmalar da onu göstərir ki, şagirdlərin
axtarışlara sövq olunması, onların bir tədqiqatçı
kimi fəaliyyətə cəlbi dərsliklərdə
idrak fəallığını tənzimləyən
sistemli çalışmaların, eləcə də sual
və tapşırıqların olmasını
tələb edir. Ona görə də bu çalışma və
tapşırıqlar hazırlanaraq dərsliklərə
daxil edilərkən şagirdlərin fəaliyyətinin
mərhələləri diqqət mərkəzində
saxlanılmalıdır. Bilmə, anlama, tətbiqetmə,
analiz, sintez və qiymətləndirmə
mərhələlərinin bir-birinin davamından ibarət
məntiqi ardıcıllığı əsas kimi götürülməlidir.
Uşaqlarda əqlin genişliyini, konkretliyini,
dərinliyini, çevikliyini, fikrin sürətini, məntiqiliyini
inkişaf etdirmək üçün onları müxtəlif fikri
əməliyyatlara sövq edən iş formalarından
istifadə olunmalıdır (Bayramov Ə. Şagirdlərdə
əqli keyfiyyətlərin inkişaf xüsusiyyətləri.
Bakı, "Maarif", 1967).
"Bu, o məntiqdən irəli gəlir ki,
adətən, fikri fəaliyyət zamanı insan müxtəlif
əməliyyatlardan - təhlil, tərkib, müqayisə, ümumiləşdirmə,
mücərrədləşdirmə və sairdən
istifadə edir" (Bayramov Ə. Şagirdlərdə
əqli keyfiyyətlərin inkişaf xüsusiyyətləri.
Bakı, "Maarif", 1967). özünüreallaşdırma, özünütəqdimetmə
müasir insanın ən mühüm keyfiyyətlərindən
biridir. Təlim-tərbiyə prosesində bu işin
dəstəklənməsi, onun müəllim və şagird
fəaliyyətinin mərkəzinə gətirilməsi xüsusi
olaraq əhəmiyyətlidir. Bunun bir mühüm yolu
dərsliklərdə təfəkkür müstəqilliyini
təmin edən, onu daha qabarıq göstərən
materialların, o cümlədən çalışma və tapşırıqların
verilməsidir. Müasir dərsliklərin hazırlanması
ilə bağlı aparılan araşdırmalarda da
belə nəticəyə gəlinmişdir ki, şagirdləri
fəaliyyətə sövq etməklə tətbiqi xarakter daşıması
yeni dərsliklərin əsas keyfiyyətlərindən
hesab edilir, onlarda bacarıqları formalaşdıra
bilmək imkanının olması üstün cəhət kimi
dəyərləndirilir. Bunun üçün kifayət qədər
müxtəlif növ çalışma və tapşırıqlardan
istifadə edilməsi tələb olunur. Dərsliyin sistemində həm də
elə materiallar verilir ki, onların vasitəsilə şagirdlərin
inkişafını təmin etmək, izləmək mümkün
olur. Uşaqlar idrakın müxtəlif
mərhələlərində anlama, tətbiqetmə,
təhliletmə və s. kimi bacarıqlar nümayiş
etdirirlər. Dərsliklərin məzmununda bu sistemin gözlənilməsi
və hər tədris vahidindən sonra müvafiq test tapşırıqlarının
verilməsi şagirdlərin təlim nailiyyətlərinin
qiymətləndirilməsinə imkan yaradır.
Dərsliyin funksiyaları sırasına biliyin ötürülməsi,
qabiliyyət və səriştənin inkişaf
etdirilməsi, biliyin möhkəmləndirilməsi, biliyin
qiymətləndirilməsi daxil edilir (Dərslik necə
olmalıdır? Bakı, 2003). Bu müddəa isə yuxarıdakı
fikrin reallığını bir daha əsaslandırır.
Dərsliyin inteqrativ xarakterə malik olması Hər bir dərslik
yalnız nəzəri materiallardan ibarət deyildir. Yaxud
əksinə, dərsliklər yalnız praktik çalışmaları
ehtiva etmir. Bunlarda nəzəri və praktik materiallar
əlaqələndirilir, vahid bir istiqamətə yönəldilir.
Həmin materiallar üzərində işləyən şagirdlər
hiss etmədən müəyyən biliklərin bazasında
bacarıq və vərdişlərə,
qabiliyyətlərə sahib olmaqla əvvəlcədən
nəzərdə tutulmuş səriştələrə
yiyələnirlər. Beləliklə, nəzəri və
praktik materialların qovuşuğunda dərsliyin inteqrativ
xarakteri təzahür edir. Belə əlaqələndirmə
şəraitində hər şey təbii olaraq baş
verir. Belə ki, izah olunan nəzəri mülahizə və
ya müddəa müvafiq nümunə əsasında tamamlanır.
Bundan əlavə, uyğun nəzəri anlayışlar
arasında əlaqələrin olması diqqət
mərkəzində saxlanılır. Onlardan birinin üzərində
digəri aydınlaşdırılır. Yaxud hər hansı
deklarativ, yaxud prosedural biliyin şərhində müvafiq olan
biliyə istinad olunur. Dərslikdə müəyyən
fəaliyyətlərin əlaqələnməsi
nəzərdə tutulmuş biliklərin daha möhkəm
mənimsənilməsi baxımından
əhəmiyyət daşıyır. Əslində,
fəaliyyət öz-özlüyündə idrakla bağlı anlayışdır.
İdrak olmadan fəaliyyət yoxdur. "İdrak insan
şəxsiyyətinin bütün cəhətlərinə nüfuz
edir. Bu da ondan irəli gəlir ki, idrak, hər şeydən
əvvəl, fəaliyyətdir" (Bayramov Ə., Əlizadə
Ə. Psixologiya. Ali məktəblər üçün dərslik.
Bakı, "Maarif", 1989). Dərsliyi hazırlayanlar anlamaq, təqdim
etmək, tətbiq etmək, analiz etmək kimi hər hansı
fəaliyyət növünün mənimsənilməsi üçün, ilk
növbədə, onların arasındakı yaxınlığa
müraciət edirlər. Onların bir-birini stimullaşdıra
bilmək imkanlarını diqqət mərkəzində
saxlayırlar. Məsələn, oxu və yazı, danışma
ilə dinləyib-anlama fəaliyyət növləri
deyilənlərə misal ola bilər. Bütün bunlar onu göstərir ki, şəxsiyyətə
yönəlmiş müasir dərsliklər özünün bir sıra xüsusiyyətləri
ilə, o cümlədən pedaqoji xarakteri, istiqamətverici
məzmunu, inteqrativ xüsusiyyəti ilə əvvəlki
dərsliklərdən fərqlənir. Həmin
fərqlərin nəzərə alınması bu günün
reallıqları baxımından aktual hesab edilir. İsgəndər İSGƏNDƏROV, Təhsil nazirinin müavini, Təhsil Sektorunun İnkişafı Layihəsi üzrə milli koordinator, Aydın ƏHMƏDOV, Təhsil Nazirliyinin şöbə müdiri, "Kurrikulum islahatı" üzrə alt-komponent koordinatoru, Ənvər ABBASOV, TPİ-nin direktor müavini, Kurrikulum Mərkəzinin direktoru |