2025-ci ilin əvvəlinə olan məlumata görə, ölkədə fəaliyyət göstərən doktoranturalarda 3304 nəfər təhsil alır.

“Azərbaycan müəllimi” Dövlət Statistika Komitəsinin məlumatlarına istinadən xəbər verir ki, təhsil alanların 50,2 faizi qadındır. 

Hazırda 114 ali təhsil və elmi müəssisədə fəlsəfə və elmlər doktoru proqramları üzrə təhsil davam etdirilir. Doktorantların 82,5 faizi fəlsəfə doktoru, 17,5 faizi isə elmlər doktoru proqramında oxuyur. Ən çox təhsil alanlar ali məktəblərin (68,4 faiz), qalanı isə elmi müəssisə və təşkilatların (31,6 faiz) payına düşür.

Fəlsəfə doktoru proqramında təhsil alanların 57 faizi 30 yaşadək gənclərdir. Elmlər doktoru proqramında isə bu rəqəm 28,4 faizlə 40 yaşadək şəxslərə aiddir.

İxtisas seçiminə gəlincə, fəlsəfə doktoru proqramında texnika (563 nəfər), iqtisad (550), filologiya (246), tibb (166), pedaqogika (165) və siyasi elmlər (155) üstünlük təşkil edir. Elmlər doktoru proqramında isə filologiya (134 nəfər), iqtisad (70), texnika (65), biologiya (58) və kimya (36) sahələri liderlik edir.

2024-cü ildə fəlsəfə doktoru proqramı üzrə buraxılış 18,4 faiz azalaraq 500 nəfərə düşüb. Əvəzində elmlər doktoru proqramı üzrə buraxılış 10,8 faiz artaraq 133 nəfərə çatıb. Həmin il müvafiq olaraq fəlsəfə doktoru proqramına 758, elmlər doktoru proqramına isə 106 nəfər qəbul olunub.

Bundan əlavə, ötən il 157 dissertant fəlsəfə doktoru proqramı üzrə təhkim edilib və onların 77,1 faizini qadınlar təşkil edib. Elmlər doktoru proqramına isə 231 dissertant təhkim olunub ki, onların 132-si qadındır. Ən çox dissertant tibb, biologiya, tarix, fizika, iqtisad, texnika və filologiya sahələrində qeydiyyata alınıb.