İyunun 25-də keçirilən sertifikasiya imtahanında Quba-Xaçmaz Regional Təhsil İdarəsinin tabeliyində fəaliyyət göstərən ümumtəhsil müəssisələrinin müəllimləri yüksək bal toplayıblar.

“Azərbaycan müəllimi” uğur qazanan təhsilverənlərlə həmsöhbət olub.

“Sertifikasiyanın müsbət tərəfləri çoxdur...” 

Mehbarə Tağıyeva Siyəzən şəhər 2 nömrəli tam orta məktəbin fizika müəllimidir. 41 il məktəbdə işləyən 63 yaşlı müəllim könüllü olaraq sertifikasiya imtahanına qatılıb və 56 bal toplayıb: “Diaqnostik qiymətləndirmədə illər öncə iştirak edərək 55 bal toplamışam. 2015-2016-cı illərdə “Qabaqcıl təhsil işçisi” döş nişanı, daha sonra cənab Prezidentimiz tərəfindən “Tərəqqi” medalı ilə təltif olunmuşam”. 

Müəllimin sözlərinə görə, imtahanda suallar çox sadə idi və o, daha çətin suallarla qarşılaşacağını düşünüb: “Dərsliklərdə keçdiyimiz mövzular əhatə olunmuşdu. Kurikulum üzrə “YouTube” üzərindən hazırlaşmışdım. Sertifikasiyanın müsbət tərəfləri çoxdur, onlardan biri də müəllimlərin əməkhaqlarının artmasıdır”. 

“Müəllim öz ixtisasını mükəmməl bilməlidir ki, layiqincə də öyrədə bilsin” 
Sara Ağamalıyeva Siyəzən rayonu Böyük Həmyə kənd tam orta məktəbinin fizika müəllimidir. O, imtahanda 56 bal nəticə göstərib. 16 ildir müəllim kimi fəaliyyət göstərdiyini deyən müəllim daim öz üzərində işlədiyini, özünü inkişaf etdirdiyini qeyd edir. Kurikulum üzrə bir az çətinlik çəkdiyini bildirən müəllim sertifikasiyanı çox müsbət dəyərləndirir: “Məncə, təhsilverən öz ixtisasını mükəmməl şəkildə bilməlidir ki, layiqincə də öyrədə bilsin”.

Sara müəllimin fikrincə, müəllim hər dərsinə vaxtında, sərbəst, ciddi, vicdanla hazırlaşarsa mütləq uğurlu nəticə əldə edər: “Dünən və bu gün səhər tezdən şagirdim mənə yazıb uğurlar arzulamışdı və demişdi ki, ürəyimə damıb, bu gün yəqin ki, sizdən müsahibə alacaqlar, xahiş edirəm mənim adımı da xüsusi qeyd edin. Şagirdim dediyi kimi də oldu, onun adı Əliyusifdir, çox dəstək olur mənə. O da 11-ci sinif məzunudur,”- sevinc hissi ilə Sara Ağamalıyeva qeyd edir.  

 “Sertifikasiyada məktəb proqramından kənar suallar düşmür”

Şəhanə Qəmbərova Şabran rayon Əmirxanlı kənd tam orta məktəbinin fizika müəllimidir və imtahan nəticəsi 56 baldır. 7 illik pedaqoji təcrübəyə malik müəllim 2017-ci ildə MİQ imtahanında iştirak edərək 49 bal toplayıb. Mütəmadi olaraq fənni üzrə dərslikləri, kurikulum üzrə TAİM vəsaitini oxuduğunu deyən müəllim sualların onun üçün çətin olmadığını, imtahanın çox şəffaf keçdiyini vurğulayır. 

 “Düşünürəm ki, sertifikatlaşdırmanın keçirilməsi çox vacibdir. Müəllimlər öz üzərlərində işləməli, hazırlaşmalıdır. Sertifikasiyada məktəb proqramından kənar suallar düşmür və fənnini bilən müəllim 55-dən yuxarı nəticə göstərməlidir. Müəllimlər öz vəzifələrini düzgün icra etsələr, daima hazırlıqlı olsalar, keçdikləri dərslərə məsuliyyətli yanaşsalar hər bir imtahandan uğur qazanacaqlar,”- deyə Şəhanə müəllim bildirir.

“Göstərdiyimiz nəticəyə uyğun olaraq maaşımızın artımı gözlənilir”

Səyarə Mürsəlova Siyəzən rayon Balaca Həmyə kənd tam orta məktəbinin fizika müəllimidir və 53 bal nəticə göstərib. İmtahan haqqında təəssüratlarını bölüşən müəllim deyir ki, kurikulum üzrə bir az çətinliyi olub, fizikadan isə orta məktəb səviyyəsində suallar idi: “Özüm dərslikləri oxuyaraq və “YouTube” üzərindən videodərslərə baxaraq hazırlaşmışam”. 
Müəllim əlavə edir: “Sertifikasiyaya münasibətim çox yaxşıdır, çünki müəllim bütün yeniliklərə açıq olmalıdır. Göstərdiyimiz nəticəyə uyğun olaraq maaşımızın artımı gözlənilir. Mən özüm 2014-cü ildə MİQ imtahanı ilə işə qəbul olmuşam. Müəllim daim öz üzərində işləməli, özünü inkişaf etdirməlidir”.