Azərbaycanlı gənc, “2022–2028-ci illər üçün Dövlət Proqramı” çərçivəsində Birləşmiş Krallığın Kembric Universitetində beynəlxalq hüquq üzrə magistr təhsili alan Cavid Rəhimli növbəti uğura imza atıb.  

“Azərbaycan müəllimi” xəbər verir ki, C.Rəhimli Kembric Universitetinin Hüquq fakültəsi tərəfindən “Pro Bono Platinum” mükafatı ilə təltif olunub. 

Fakültənin sədri, İngilis hüququ üzrə Britaniya tarixində ilk qadın professor və Kral Vəkili olan Luiz Gulifer pulsuz hüquqi xidmət (pro bono) sahəsində fərqlənən tələbələri mükafatlandırıb. “Pro bono” ödənişsiz hüquqi xidmətdir. Mükafat kifayət qədər “pro bono” iş görən hüquqşünaslara verilir. Mükafat gənc hüquqşünaslar üçün prestijli hesab olunur. 

“Fakültənin aktiv tələbələrindən biri kimi ən yüksək “Platinum” mükafatını almaq mənim üçün qürurverici oldu” deyən C.Rəhimli ötən il ərzində Kral Vəkilinin köməkçisi kimi yerli məhkəmədə beynəlxalq hüquqla bağlı məhkəmə işində iştirak edib. “Amnesty International” təşkilatı üçün Haitidə uşaqların hərbi qruplara qoşulması ilə bağlı OSINT istintaqının aparılması və sübutların BMT-yə təqdim olunması, parlamentə təqdim ediləcək süni intellekt və cinayət ədaləti ilə bağlı QHT hesabatının hazırlanmasında dəstək göstərib, eyni zamanda Beynəlxalq hüquq üzrə bloqun redaktorluğunu həyata keçirib. 

Qeyd edək ki, 2024-cü ildə ABŞ-nin Corc Vaşinqton Universitetində xarici əlaqələr hüququ üzrə magistr dərəcəsi alıb, Oksford Universitetində insan hüquqları üzrə mübadilə proqramında iştirak edib. 

Hazırda Dövlət Proqramı çərçivəsində təhsil almaqla yanaşı, eyni zamanda Londonda beynəlxalq hüquq üzrə ixtisaslaşmış hüquq firması olan Volterra Fiettada hüquqşünas kimi çalışır. 

Cavid Rəhimlinin uğur hekayəsi göstərir ki, artıq azərbaycanlı gənclər dünyanın ən nüfuzlu universitetlərində təkcə təhsil almaqla kifayətlənmir, həm də öz bacarıqları ilə fərqlənirlər.