Bu gün Azərbaycanın bütün ümumi təhsil müəssisələrində “Son zəng” tədbiri keçirilir.

“Azərbaycan müəllimi” bu təhsil müəssisələrindən birində - Bakı şəhəri Ə.Mahmudov adına 220 nömrəli məktəb-liseydə təşkil olunan “Son zəng” tədbirində iştirak edib. 

Tədbirdə Elm və Təhsil Nazirliyinin Aparat rəhbəri Mətin Kərimli, Nizami Rayon İcra Hakimiyyətinin başçısı Coşqun Cəbrayılov, məzunlar və digər qonaqlar iştirak ediblər.

Tədbir Azərbaycan Respublikasının Dövlət Himninin səsləndirilməsi və Vətən uğrunda canından keçmiş şəhidlərin xatirəsinin bir dəqiqəlik sükutla yad olunması ilə başlayıb.

Məktəbin direktoru Lətifə Əzimova açılış nitqi ilə çıxış edərək məzunları təbrik edib, valideyn və müəllimlərin zəhməti ilə yetişən bu nəslin ölkənin inkişafına töhfə verəcəyinə inandığını bildirib.

Nizami Rayon İcra Hakimiyyətinin başçısı Coşqun Cəbrayılov çıxışında qeyd edib ki, bu günün məzunları ölkənin bugünkü inkişafının canlı şahidləridir və dövlətin yaratdığı imkanlarla dünyanın istənilən yerində təhsil alaraq Azərbaycanı layiqincə təmsil edə bilərlər.

Elm və Təhsil Nazirliyinin Aparat rəhbəri Mətin Kərimli isə çıxışında vurğulayıb ki, dövlətimiz hər zaman gənclərimizin ali təhsilə əlçatanlığının artmasına çalışır. Onun sözlərinə görə, 2022-ci ildə 54 min məzun ali təhsil müəssisəsinə qəbul olunmuşdusa, bu il 75 min məzun ali təhsil müəssisələrinə qəbul ola biləcək.

O bildirib ki, bu gün ölkə üçün xüsusi əhəmiyyət daşıyan gündür: “Təkcə Bakıda deyil, Qarabağda da 3 məktəbdə “Son zəng” tədbirləri keçirilir. Hazırda Qarabağda 20 məktəb fəaliyyət göstərir və 3000-dən çox şagirdimiz orada təhsil alır”.

Müəllim və valideynlərin əməyinə diqqət çəkən Mətin Kərimli məktəbin yalnız bilik deyil, vətənpərvərlik, milli dəyərlər və insani keyfiyyətlərin də aşılandığı məkan olduğunu vurğulayıb.

Tədbirin bədii hissəsində məzunların ifasında musiqi nömrələri, şeirlər və kompozisiya nümunələri təqdim olunub.