Ölkədə keçirilən qəbul imtahanlarının nəticələrinə əsasən, Naxçıvan şəhərində fəaliyyət göstərən Qızlar Liseyinin məzunu Sehrin Cəfərova Muxtar Respublika üzrə ən yüksək nəticəni əldə edib. O, imtahanda ümumilikdə 690 bal toplayıb.

"Azərbaycan müəllimi" ilə həmsöhbət olan Sehrin yüksək bal topladığı üçün çox sevincli olduğunu və ailəsinin onunla fəxr etdiyini deyir. Onun uğurları bununla bitmir:

"11-ci siniflə yanaşı, 9-cu sinfi də fərqlənmə attestatı ilə bitirmişəm. Bir çox olimpiadalarda iştirak edərək sertifikatlar, diplomlar əldə etmişəm. 2024-cü ildə Amerika Riyaziyyat Olimpiadasında (AMO) olimpiadasında qızıl, 2025-ci ildə SASMO olimpiadasında gümüş medal qazanmışam".

Məzun deyir ki, imtahanlara planlı şəkildə hazırlaşıb: "Sınaq imtahanlarında iştirak da bu məsələdə çox əhəmiyyətlidir. Uğura gedən yolda ailəmin, müəllimlərimin dəstəyi əvəzolunmazdır".

Sehrin əlavə edib ki, uğur qazanmaq üçün çox oxumaq yox, düzgün şəkildə oxumaq lazımdır.

Onun sözlərinə görə, hər bir abituriyent öz potensialına uyğun plan qurmalı, vaxtdan səmərəli istifadə etməlidir:

"Mən gün ərzində dərsləri bölüşdürərək çalışırdım. Ən çətin mövzuları səhərlər, diqqətimin daha yüksək olduğu vaxtlarda oxuyurdum. Dəstək olan müəllimlərimin rolu böyükdür. Onların motivasiyalı yanaşması, izah etdikləri dərslər imtahanda uğur qazanmağıma ciddi təsir göstərdi".

Sehrinin uğurlarında valideynlərinin də rolu diqqətəlayiqdir. O deyir ki, ailəsi hər zaman onun yanında olub, ruhdan düşməsinə imkan verməyib:

"Ailəm daim mənə güvəndi. Onların mənə inamı və verdiyi mənəvi dəstək bu yolda motivasiyamı artırdı. Uğur yalnız şəxsi səylə deyil, ətrafındakı insanların müsbət təsiri ilə də formalaşır".

Uşaqlıqdan kimya dərsinə xüsusi həvəs göstərdiyini deyən Sehrinin ən böyük arzusu Bakı Ali Neft Məktəbində təhsil alaraq kimya mühəndisi olmaqdır. O, gələcəkdə bu sahədə dərin biliklər əldə edib, ölkənin sənaye və elmi inkişafında iştirak etmək istəyir:

"Məqsədim təkcə yaxşı təhsil almaq deyil, həm də bu biliklərlə cəmiyyətə fayda verməkdir. Kimya sahəsi daim yenilənən, araşdırma tələb edən bir sahədir və bu məni cəlb edir. Gələcəkdə elmi layihələrdə iştirak etmək, innovativ həllər təqdim etmək arzusundayam".

Sehrin Cəfərova kimi gənclər Azərbaycan təhsil sisteminin və müəllim əməyinin real nəticələrini göstərir. Onun timsalında bir daha aydın olur ki, sistemli hazırlıq, düzgün istiqamət və mənəvi dəstək olduqda uğur qaçılmazdır.