Hər bir insanın müəyyən arzu, plan və məqsədləri olur. Lakin hər kəs məqsədinə asan çatmır. Uğur əldə etmək üçün təkcə istək kifayət etmir, düzgün planlama, əzm, ardıcıllıq və özünəinam da əsas şərtlərdəndir.

Bu gün "Azərbaycan müəllimi" ötən il tələbə adını qazansa da, istədiyi ixtisasa qəbul olmadığı üçün ondan imtina edən, bu il isə yenidən imtahan verərək arzusuna çatan bir abituriyentin həyat yolunu sizə təqdim edir.

Mahir Səlimov ötən il Salyan şəhəri 2 nömrəli tam orta məktəbin məzunu olub. Ötən il Naxçıvan Dövlət Universitetinin Stomatologiya fakültəsinə qəbul olub. Lakin Mahirin arzusu “Müalicə işi” ixtisası üzrə ali təhsil almaq idi. Ona görə də qəbul olduğu yerdən imtina edərək yenidən imtahana hazırlaşmağa başlayıb. Nəhayət, builki qəbul imtahanlarında 641 bal toplayaraq Azərbaycan Tibb Universitetinin arzuladığı “Müalicə işi” ixtisasına qəbul olub:

"Əvvəl qəbul olduğum yerdən ona görə imtina etdim ki, ora mənim gələcək məqsədlərimə uyğun deyildi. “Müalicə işi” ixtisasına isə uşaq vaxtından sevgim var idi. Onun üçün də dayanmadan çalışıb, öz məqsədimə çatdım. Buna görə çox sevincliyəm, hisslərim sözlə ifadə oluna bilməz".

Mahir təhsil aldığı müddət ərzində bir çox uğurlara da nail olub: "9 və 11-ci sinifləri fərqlənmə attestatı ilə bitirmişəm. Bununla yanaşı, müxtəlif yarışlarda nailiyyətlər də əldə etmişəm".

Qəhrəmanımız abituriyentlərə öz tövsiyələrini bildirirək qeyd edir ki, qarşılarına bir məqsəd qoysunlar və o məqsəd uğrunda çalışsınlar:

"Abituriyentlərə məsləhətim ola bilər ki, məqsədləri uğrunda çalışarkən idmanla da məşğul olsunlar, sosial tədbirlərdə aktiv iştirak etsinlər".

Bu il Mahirin bacısı Nuray da tələbə adını qazanıb. O, Bakı Dövlət Universitetində kimya üzrə ali təhsil alacaq. Nurayda öz təəssüratlarını bizimlə bölüşür:

"Kimya fənninə olan marağım məni bu sahəni seçməyimə səbəb oldu. Sevindirici haldır ki, qardaşımla birgə bu il tələbə adını qazanmışıq. 9 və 11-ci sinifləri fərqlənmə attestatı ilə bitirmişəm. Ali məktəbə hazırlaşan abituriyentlərə demək istəyirəm ki, xəyallarının ardınca getsinlər. Yol çətin ola bilər, amma arzularından imtina etməsinlər".

Mahirin həyat yoluna nəzər salanda görürük ki, məqsədə qısa bir yolla çatmaq mümkün deyil, bu, uzunmüddətli əmək tələb edir. Bu yolda ən əsas güc insanın öz iradəsi və mübarizliyidir. Hər bir çətinlik bir təcrübədir, hər bir uğur isə yeni hədəflər üçün başlanğıc nöqtəsidir.