Uşağın ev tapşırığına qarşı çıxmasını qınamaq çətindir. Axı, o, artıq məktəbdə uzun bir gün keçirib, dərsdən sonra müxtəlif məşğələlərə qatılıb və indi axşam saatlarında qarşısında tapşırıq yığını var. Şagirdlər kimi valideynlər üçün də bu, günün sevimli vaxtı deyil.

Hərçənd ev tapşırığına qarşı mənfi yanaşma geniş yayılsa da, demək olar ki, bu, uşaqların müstəqil işləmək bacarığının formalaşmasında mühüm rol oynayır. Düzgün planlaşdırılmış tapşırıqlar sinifdə öyrənilən biliklərin daha dərindən mənimsənilməsinə kömək edir. Hətta sadə iş vərəqləri belə uşaqlarda nizam-intizam və əsas bacarıqları möhkəmləndirə bilər. Ev tapşırığı həm də dözümlülüyün və məsuliyyətin gündəlik sınağıdır.

Birgə mühitdə tapşırıq yerinə yetirmək

Harvard Universitetinin araşdırmasına görə, 13 yaşa qədər uşaqlar üçün ev tapşırığını yataq otağında təkbaşına deyil, ailənin birgə olduğu məkanda, məsələn, yemək və ya mətbəx masasında yerinə yetirməsi tövsiyə olunur. Bu, uşağın özünü tənha hiss etməsinin qarşısını alır və diqqəti artırır.

Valideynin rolu: “Layihə meneceri”

Valideynlər ev tapşırığı prosesində sadəcə müşahidəçi olmamalıdırlar. Onlar uşağı motivasiya edən, planlaşdırmaya kömək edən, diqqətin yayılmasının qarşısını alan “layihə meneceri” rolunu oynaya bilərlər. Bu, uşağa məsuliyyət hissini və iş prosesini idarə etməyi öyrədir.

Tapşırıqdan öncə uşağa portfelini açıb nələri etməli olduğunu sadalamaq və “Bitdi/Ediləcək” siyahısı hazırlamaq məsləhətdir. Bu yanaşma həm motivasiyanı artırır, həm də qarşıda hansı işlərin olduğunu aydın göstərir.

Tapşırıqları uşağın seçiminə uyğun planlamaq

Uşağa tapşırıqları öz seçdiyi ardıcıllıqla yerinə yetirməyə icazə vermək ona prosesi idarəetmə və öz iş tərzini anlama imkanı yaradır. Bu da stresi azaldır və diqqəti artırır.

Taymerdən istifadə və müsbət reaksiya

Tapşırıqları yerinə yetirərkən taymerdən istifadə diqqəti cəmləməyə və problemi müstəqil həll etmə bacarığını inkişaf etdirməyə kömək edir. Uşaq təxmini müddəti özü müəyyən edir və həmin vaxt ərzində fasiləsiz işləyir. Hər tapşırıq bitdikdən sonra “Afərin, bu işi də bitirdin və çox yaxşı alındı!” kimi ifadələrlə müsbət reaksiya uşağın motivasiyasını gücləndirir.