İyunun 25-də keçirilən sertifikatlaşdırma imtahanında Abşeron-Xızı Regional Təhsil İdarəsi üzrə imtahan verən müəllimlər arasında yüksək nəticə göstərənlər az deyil.

“Azərbaycan müəllimi” onların sevincini oxucuları ilə bölüşür.

“Müəllim hər gün sinfə hazırlıqlı daxil olmağa borcludur”

Sumqayıt şəhəri 43 nömrəli tam orta məktəbin fizika müəllimi Vüsalə Alıhüseynova 59 bal toplayıb. Bildirir ki, 2006-2012-ci illərdə müəllim kimi işləyib, sonra müəyyən səbəblərdən işdən ayrılıb: “Ümumilikdə 13 ildir ki,  müəllim kimi fəaliyyət göstərirəm. 2018-ci ildən müəllimlərin işə qəbulu imtahanı verərək yenidən pedaqoji fəaliyyətə başladım. O vaxt mümkün 60 balın 53-nü toplamışdım”.

Onun sözlərinə görə, müəllim hər gün sinfə hazırlıqlı daxil olmağa borcludur: “Belə olduğu halda imtahan üçün ayrıca hazırlaşmağa ehtiyac qalmır. Suallar hər səviyyəyə uyğun idi. Əslində ixtisasımı çox sevirəm və orada çətin suallar da mənə xoş görünür. Metodika üzrə 2 sualda  variantların ikisi də mənə düzgün görünürdü, birini seçdim. Bu il az bal toplayan müəllimlərə Karol Dvekin açıq düşüncə tərzinə uyğun addımlar atmağı tövsiyə edirəm”. 

“Kağız testlərlə işləməkdənsə, onlayn testlərə müraciət etsinlər ki, vaxtlarını düzgün dəyərləndirə bilsinlər” 

Fəridə Həsənova Sumqayıt şəhəri 5 nömrəli tam orta məktəbin informatika müəllimidir, imtahanda 57 bal toplayıb. 25 ildir ki, müəllim işləyən Fəridə xanım daha öncə diaqnostik qiymətləndirmədə iştirak edərək 53 bal topladığını söyləyir. Fənnini çox yaxşı bildiyini söyləyən müəllim əsasən kurikulum üzrə müxtəlif saytlar üzərindən onlayn kurslara qoşularaq hazırlaşdığını deyir: “Sürətli işləməni təmin etmək üçün ixtisasım üzrə çoxlu testlər etmişəm”. 

Müəllim sertifikatlaşdırmaya münasibətinin çox yaxşı olduğunu vurğulayır: “Hesab edirəm ki, müəllimlərimizin əksəriyyətinin bilik səviyyəsi yüksəkdir, sadəcə, onlar imtahanda vaxt bölgüsünü düzgün edə bilmirlər. Əsasən də bu, kimya müəllimləri imtahan verəndə özünü biruzə verdi. Məsləhət görərdim ki, kağız testlərlə işləməkdənsə, onlayn testlərə müraciət etsinlər ki, vaxtlarını düzgün dəyərləndirə bilsinlər”. 

“Müəllimlər fənlərini sevsələr, işlərinə ciddi yanaşsalar, imtahanda uğur qazanacaqlar” 

Sumqayıt şəhəri İsmət Qayıbov adına 1 nömrəli tam orta məktəbin fizika müəllimi Gülcahan Musayevanın 62 yaşı var. O, könüllü iştirak etdiyi imtahanda 54 bal toplayıb. İlk dəfə sertifikasiyada iştirak edən müəllim bildirir ki, əziyyət çəkən müəllim mütləq zəhmətinin bəhrəsini görür: 

“Suallar hər bir müəllimin işləyə biləcəyi səviyyədə idi. Mən ümumiyyətlə, nə ixtisasım, nə kurikulum üzrə imtahana hazırlaşmamışdım. Kurikulum suallarına iş təcrübəmə əsasən cavab verdim. Öz fənnimdən 50 sualın hamısına düz cavab vermişdim, kurikulum üzrə isə 4 düz cavabım oldu”. 

Sertifikatlaşdırmaya münasibətini dilə gətirən müəllim bildirir ki, bu proses müəllimlərin peşələrinə qarşı məsuliyyətini daha da artırır: “Müəllimlər fənlərini sevsələr, işlərinə ciddi yanaşsalar, imtahanda uğur qazanacaqlar”.