Qarabağ Universitetinin ilk tədris ili başa çatmaq üzrədir. Bu təhsil ocağına yüksək balla daxil olan və digər univeristetlərdən gələn tələbələr də az olmayıb. Heç şübhəsiz ki, onları buraya gətirən Qarabağ sevgisi, vətən sevdasıdır. Universitetin ilk tələbələri ilk ili necə keçirdilər, Qarabağ mühitinə alışdılarmı, şəraitlərindən razıdırlarmı? Bütün bunlarla bağlı gənclərin fikrini öyrəndik. 

Xatırladaq ki, 2024-cü ildə fəaliyyətə başlayan universitetin 6 fakültəsində 27 ixtisas üzrə 1154 tələbə təhsil alır.

Nümunəvi tələbələrdən biri Həmidə Muradovadır. Balakəndə doğulub, tam orta təhsilini də rayonun Qabaqçöl qəsəbəsində alıb. 2024-cü ildə 537.9 balla Qarabağ Universitetinin İqtisadiyyat fakültəsinə daxil olub. Maliyyə ixtisasına yiyələnəcək. Onunla təkcə təhsildən deyil, Qarabağdan da danışdıq, buraya necə alışa bildiyini, yataqxananın şəraitindən bəhs etdik, Qarabağın soyuq qışının necə keçdiyini soruşdum:

“Mənim doğulub böyüdüyüm Balakən də sərt iqlimə sahibdir, orada qış soyuq keçir, odur ki, heç əziyyət çəkmədim. Mənim yüksək balla İqtisadiyyat Universitetinə qəbul olmaq, orada oxumaq imkanım vardı. Amma məndə uşaqlıqdan Qarabağa maraq vardı. Gözümü açandan bu torpaqların işğal altında olduğunu görür və bilirdim. Hər zaman maraqla düşünmüşəm buraları. Odur ki, fürsəti dəyərləndirdim, yəni Qarabağı görmək və orada yaşamaq, təhsil almaq fürsətini.

Bu torpaqlarda neçə-neçə gəncin arzuları yarımçıq qalıb, şəhid olublar, torpaqlarımızı canları-qanları bahasına alıblar. Onlar bu torpaqları bizim üçün azad ediblər. Azad ediblər ki, bu torpaqların üstündə xoşbəxt yaşayaq. Odur ki, tərəddüd etmədən burada oxumağa qərar verdim. Qoy şəhidlərimizin ruhu şad olsun!”

– Yaz sessiyasına necə hazırlaşırsan?

– Təkcə mən yox, bütün tələbələr məsuliyyətlə hazırlaşırlar. Dərsdən sonra günümüz kitabxanada keçir. Yaz sessiyasında yüksək nəticə əldə etmək, dil biliyimi artırmaq niyyətindəyəm. Yarışlarda iştirak edirəm, əlbəttə, uğurlar qazanıram. Dahi Sokratın bir kəlamı var: “Bildiyim tək şey, heç nə bilməməyimdir”. Bilmədiyimiz çox şey var, bunun üçün də daima öz üzərimizdə çalışmalıyıq. Öyrənmək üçün ən münasib vaxt indidir.

– Yataqxana şəraitinizdən razısanmı? Necə həyat tərzi keçirirsiniz orada?

– Çox rahat və uyğundur, yataqxanamız tərtəmiz, səliqəlidir, hər bir imkan var. Burada bir həyat məktəbi keçirik. Bilirəm ki, mənim kimi bu həyatı keçənlər sərbəst yaşamağı, harada olsalar, ayaq üstə durmağı bacaracaqlar. Keçirdiyim hər gün universitet seçimimlə bağlı doğru qərar verdiyimə bir daha əmin oluram. Burada mən bir çox uğurlara imza atmışam, layihələrə qoşulmuşam, dil biliyimi artırmışam. Universiteti bitirdikdən sonra da Qarabağda qalıb işləmək istəyirəm.

Elmira Cəfərova da tələbədir. Vətəndən uzaqlarda – Moskvada doğulub, Mingəçevirdə böyüyüb, orta təhsilini də orada alıb. Elmira 2023-cü ildə Bakı Dövlət Universitetinin Hüquq fakültəsinə daxil olub. 2024-cü ildə SABAH qruplarında imtahan verərək Qarabağ Universitetinə keçib. Hazırda “Hüquqşünaslıq” ixtisası üzrə 2-ci kurs tələbəsidir. Onun da arzusu Həmidə kimi Qarabağda qalıb yaşamaq və işləməkdir. O, öz fikirlərinə belə başlayır: 

- Buraya köçürülən insanların şübhəsiz ki, hüquqşünaslara ehtiyacı olacaq. Onlara kömək etməkdən, haqq və hüquqlarını qorumaqdan zövq alacağam. Bir Azərbaycan vətəndaşı kimi Qarabağ iqtisadi rayonunun qurulması və inkişafında fəaliyyət göstərmək istəyirəm.

– Yay sessiyası ilə bağlı fikirləriniz də maraqlıdır.

– Müəllimlərimizin peşəkarlığı və dərs keçmə metodları sayəsində çox faydalı biliklər əldə etmişik. Ümid edirəm ki, yüksək nəticələr əldə edəcəyik.

– İlk dəfə bu şəhərə qədəm qoyduğun günü necə xatırlayırsan?

– Həmin gecə səhərə kimi yata bilmədim. Sevinclə kədərin ağuşundaydım. İnandırıcı gəlmirdi, dünənə qədər bu günlərin xəyalını yaşayırdıq. Ali Baş Komandanımızın qətiyyəti və müzəffər ordumuzun şücaəti nəticəsində həsrətində olduğumuz torpaqlar işğaldan azad olundu. Bundan böyük sevinc olmazdı. Kədərləndim ki, neçə-neçə igidimizin ömrü yarıda qırılıb.

Gələcəyin hüquqşünası olaraq, ədalətə xidmət etmək istəyirəm. Belə yüksək şəraiti olan universitetdə təhsil almaq xoşbəxtlikdir. Müasir dövrün standartlarına cavab verən avadanlıqlarla təmin olunub, yataqxana şəraitimiz idealdır. Universitetdə və yaşadığımız bu gözəl şəhərdə bizə yaratdıqları şəraitə görə ölkə başçısına, elm və təhsil nazirinə təşəkkür edirəm. Universitetin rektoru Şahin Bayramov tələbələrin dostu, qardaşıdır. Çox səmimi və əsl ziyalıdır.

Sonuncu müsahibimiz İman Zərbiyevdir. O da nümunəvi tələbədir. Tələbəlik həyatı, uğurları, dərslərinin gedişatı ilə bağlı söhbətləşdik. 2023-cü ildə 568 bal toplayaraq UNEC-ə daxil olub. Maliyyə ixtisasına yiyələnirdi. FA (Financial Accounting) beynəlxalq mühasibat sertifikatından 94 bal toplayıb. Bu qədər uğurlarına baxmayaraq, 2024-cü ildə imtahan verərək Qarabağ Universitetini seçib.

İman burada dərslərin daha yüksək səviyyədə keçirildiyini söyləyir. Müəllimlərdən söhbət düşəndə Elxan onlardan ağızdolusu danışır:

- Proaktiv metodlarla dərs keçirlər. Yaddaşımızda tez qalır. Dərsdən kənar vaxtlarda da bizimlə olur, bilmədiklərimizi öyrətməyə çalışırlar. Səmimidir, onunla dost-qardaş kimiyik. Firudin müəllim isə bizim ixtisas müəllimimizdir, maliyyənin incəliklərini öyrədir. Tez-tez onlayn görüşlər təşkil edir ki, bu da ixtisasımızın dərindən öyrənilməsində böyük rol oynayır”.

– Yay imtahanlarına hazırlaşırsanmı?

– FA imtahanında uğur qazanmış iki yoldaşımla birlikdə yay imtahanına ciddi hazırlaşırıq. Yüksək nəticələr əldə etmək üçün gecə-gündüz çalışırıq. Bu universiteti yüksək qiymətlərlə bitirib xaricdə təhsil almaq niyyətindəyik.

- Qarabağ univeristeti sizə nələri qazandırır?

– Evimizdə  rahat idik, univeristetin yataqxanasında qalanda isə məsuliyyətimizi dərindən hiss etdik. Bura bizə sərbəst yaşamağı öyrətdi. Müəllimlərimizin biz tələbələrə yanaşma üsulu bam başqadır. Onlar bizimlə dost, qardaş kimi davranırlar. İxtisasımızı dərindən öyrənmək üçün əllərindən gələni əsirgəmirlər. Bilmədiklərimizi də dərsdən sonra  öyrədirlər. Bu bizə ən böyük dəstəkdir.

– Təhsilinizi başa vurduqdan sonra harada işləyəcəksiniz?

– Bakıda  və ya xarici ölkələrin birində işləmək istəyərdim. Qarabağda iş yerləri açılsa, burada da böyük həvəslə qalıb işlərdim.