Şirvan-Salyan Regional Təhsil İdarəsinin əhatə etdiyi rayonların şagirdləri də Respublika fənn olimpiadalarının (RFO) finalında nəticələri ilə fərqləniblər.

“Azərbaycan müəllimi” bir neçə qalib şagirdlə olimpiadaya neçə hazırlaşmaları, əvvəlki uğurları və gələcək planları barədə həmsöhbət olub.

“Hədəfim həm elmi tədqiqat aparmaq, həm də həkim kimi insanlara fayda verməkdir”

Müsahibəmə Xədicə Cabbarova ilə başlayıram. O, Şirvan şəhəri Elçin İmanov adına tam orta məktəbin 9-cu sinif şagirdidir. Bu il biologiya fənni üzrə RFO-da qızıl medal qazanıb. Xədicə deyir ki, 2023-cü ildə 7-ci sinifdə oxuyarkən Respublika fənn müsabiqəsində biologiya üzrə gümüş medal qazanıb, bu il isə "Sabahın alimləri" müsabiqəsində bürünc medal əldə edib:

“Elmə, xüsusilə biologiyaya olan marağım məni bu uğura aparan əsas motivasiya oldu. 7-ci sinifdə oxuyarkən Respublika fənn müsabiqəsində (RFM) biologiya fənni üzrə gümüş medal qazanmışdım. Həmin uğurdan sonra daha irəli getmək üçün axtarışa başladım və fənn olimpiadaları haqqında araşdırmalar etdim. Məlum oldu ki, bu olimpiadaların əsas məqsədi istedadlı şagirdlərin aşkar edilməsidir. Düşündüm ki, məqsəd istedadlı olanı üzə çıxarmaqdırsa, demək, bu yarışda iştirak etməliyəm, çünki nə gizlədim, istedadlıyam! Hazırlıq müddətində müxtəlif mənbələrdən və test tapşırıqlarından istifadə etmişəm. Gündəlik plan quraraq mütəmadi şəkildə çalışmışam və əldə etdiyim bilikləri təkrar edib möhkəmləndirmişəm. Bu yanaşma mənə həm mövzuları dərindən anlamağa, həm də suallara daha sürətli cavab verməyimə kömək etdi. Qalib olacağıma tam əmin idim. Hər mərhələdə özümə güvənirdim və nəticə etibarilə bu medala layiq olduğumu düşünürdüm. Çünki çox çalışmışdım, biliklərimə güvənirdim və məqsədimə fokuslanmışdım. O medal mənim haqqım idi. Gələcəkdə tibb sahəsi üzrə ali təhsil almaq istəyirəm. Hədəfim həm elmi tədqiqat aparmaq, həm də həkim kimi insanlara fayda verməkdir. Eyni zamanda, xaricdə təhsil aldıqdan sonra ölkəmə qayıdıb tibb sahəsində yeniliklər tətbiq etmək istəyirəm”.

“Qalib olacağıma tam əmin idim, çünki çox zəhmət çəkdim”

Növbəti müsahibim Malik Ələkbərzadədir. Malik Neftçala şəhər E.Həbibov adına 4 nömrəli tam məktəbin 9-cu sinfində oxuyur. O, coğrafiya fənnindən RFO-da qızıl medal qazanıb.

“Müsabiqəyə fənn müəllimim Elman Babaşov və məktəbin direktoru Şəfəq Balaşovanın məni həvəsləndirməsi sayəsində qoşuldum. Fənn müəllimim Elman müəllimlə hazırlaşmışam. Həmçinin müəyyən kitablardan istifadə etmişəm. Qalib olacağıma tam əmin idim, çünki çox zəhmət çəkdim. RFO-da 2023-2024-cü tədris ilində gümüş medal qazanmışam. Bu il "Əlaçı" verilişində iştirak etmişəm. Əvvəlki illərdə RFM-də iştirak etmiş və finala qədər yüksəlmişəm. II qrup üzrə hazırlaşıram, mühasib olmağı düşünürəm”.

“İnam uğurun əsas hissəsidir”

Cabir Bağırlı ilə də həmsöhbət oluruq. Cabir Salyan rayonu Maqsud İsmayılov adına Yolüstü kənd tam orta məktəbin 11-ci sinif şagirdidir. O, RFO-da coğrafiya fənni üzrə qızıl medal əldə edib:

“Uşaqlıqdan coğrafiyaya marağım bu müsabiqədə iştirakıma səbəb oldu. Bu olimpiadaya hazırlaşmağımda həm sinif rəhbərim, həm də coğrafiya müəllimim olan Sabir Mənsimov mənə dəstək olub. Olimpiadada qalıb olacağıma əmin idim, çünki inam uğurun əsas hissəsidir. Ötən il RFO-da coğrafiya fənni üzrə gümüş medal qazanmışam. Gələcək hədəfim yüksək səviyyəli bir universitetdə təhsil almaq və uğurlarımı davam etdirməkdir”.

“9-cu sinifdə medal qazanmağı hədəf qoymuşdum”

Daha müsahibimiz isə Mətin Bahadırlıdır. O, Salyan rayonu Yuxarı Noxudlu kənd tam orta məktəbin 9-cu sinif şagirdidir. Mətin RFO-da tarix fənni üzrə gümüş medal qazanıb:

“Tarix fənninə sevgim bu müsabiqədə iştirakıma səbəb oldu. Olimpiadaya fənn müəllimim Əli Novruzovla hazırlaşmışam. Final mərhələsində iştirak etdikdən sonra qalib olacağıma əmin idim. 8-ci sinifdə bu müsabiqənin yarımfinal mərhələsinə qədər yüksəlmişəm. Yarımfinal mərhələsindən finala çox az bal fərqinə görə keçə bilməmişdim. Bundan sonra daha çox çalışıb 9-cu sinifdə medal qazanmağı hədəf qoydum. Gələcək planım növbəti illərdə yenidən medal qazanmaqdır. Seçdiyim ixtisas tarix müəllimliyidir, gələcəkdə bu sahə üzrə təhsil almaq istəyirəm”.

Qalib şagirdlərin bu uğurlarını gördükcə onların gələcək arzularının istədikləri şəkildə olacağına əmin ola bilərik. Onlara – zəhmətkeş və istedadlı şagirdlərimizə bu yolda uğurlar diləyirik!