|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Qafqaz Universitetinin məzun gecəsi Bu il Azərbaycanda fəaliyyətinin 15 ili
tamam olan Qafqaz Universiteti mayın 20-də Ş.Qurbanov adına
Musiqili Komediya Teatrında özünün 11-ci buraxılışına
həsr olunmuş məzun gecəsi keçirdi. Tədbirdə
təhsil naziri Misir Mərdanov, millət vəkilləri,
ziyalılar, Türkiyədən, Şimali Kipr Türk Cümhuriyyətindən,
Amerikadan qonaqlar, valideynlər iştirak edirdilər. Universitetin builki məzunlarının
qismətinə öz buraxılış bayramlarını
üç əlamətdar hadisə ilə bir vaxtda - ümummilli
liderimiz Heydər Əliyevin 85, Azərbaycan Demokratik Cümhuriyyətinin
90 illik yubileylərinin və təhsil aldıqları ali
məktəbin 15 illiyinin qeyd olunduğu
ərəfədə keçirmək xoşbəxtliyi düşmüşdü.
Məzun gecəsi də elə bu ildönümlərə
həsr olunmuşdu. Tədbirdə öncə türk dünyasının
liderləri Heydər Əliyevin və Mustafa Kamal Atatürkün
xatirələri bir dəqiqəlik sükutla yad olundu,
Azərbaycan və Türkiyənin dövlət himnləri ifa
edildi. Sonra Qafqaz Universitetinin
fəaliyyətindən bəhs edən film nümayiş
olundu. Məzun gecəsində təbrik nitqi söyləyən
Qafqaz Universitetinin rektoru, professor Ahmet Saniç ulu öndər
Heydər Əliyevin xeyir-duası və yaxından köməyi
ilə açılmış universitetin öz fəaliyyətini
ölkə Prezidenti cənab İlham Əliyevin diqqət
və qayğısı sayəsində etimada
sədaqətlə davam etdirdiyini bildirdi. Rektor 15 il
ərzində keçilən yola qısa nəzər salıb,
universitetin bugünkü durumundan söz açdı. 2400
tələbənin təhsil aldığı Qafqaz
Universiteti ölkəmizin qeyri-dövlət ali
məktəbləri arasında ən yüksək reytinqə
malik təhsil müəssisəsidir. Yarandığı
vaxtdan kredit sistemi ilə işləyən universitet 2007-ci
ildən Boloniya prosesinə qoşulmuş, Avropanın
və ABŞ-ın bir sıra ali məktəbləri
ilə sıx ikitərəfli əlaqələr yaratmışdır.
İş dünyası ilə yaranmış sıx
əlaqələr sayəsində universitetin məzunları
hər il işlə təmin olunurlar. Rektor rəhbərlik etdiyi ali
məktəbin 11-ci məzunları olan 350-dən çox
gənci təbrik edib onlara uğurlar arzuladı. Məzunları təbrik edən təhsil
naziri Misir Mərdanov çıxışında "çağ"
öyrətim Şirkətinin Azərbaycandakı
fəaliyyətini yüksək qiymətləndirib şirkətin
yaratdığı Qafqaz Universitetinin və türk
liseylərinin nəinki Azərbaycanda, hətta bütövlükdə
Qafqaz regionunda nümunəvi təhsil ocaqları olduğunu,
onların təcrübəsini öyrənməyin vacibliyini vurğuladı.
Təhsil nazirinin sözlərinə görə, Qafqaz Universiteti
ölkəmizdə yeganə ali təhsil ocağıdır
ki, ABŞ-ın 3 nüfuzlu universiteti ilə müqavilə bağlayaraq
tələbələrinə ikili diplom verilməsini
həyata keçirir. Millət vəkili, Atatürk Araşdırma
Mərkəzinin rəhbəri, professor Nizami
Cəfərov, Türkiyənin Azərbaycandakı
səfirliyinin təhsil məsələləri üzrə müşaviri
Səlahəddin Dikmən də gəncləri təbrik
edib onlara ən xoş arzularını çatdırdılar. Məzun gecəsində bölüm, fakültə,
universitet birincilərinə, "Araz" kurslarını
bitirib ali məktəblərə yüksək balla daxil olan
və Prezident təqaüdünə layiq görülənlərə,
il ərzində Amerika, Kanada, Türkiyə, İran, Gürcüstan,
Vyetnam, Tailand, Makedoniya, Bosniya və Hersoqovina, özbəkistan
və Qazaxıstanda keçirilən müxtəlif beynəlxalq
olimpiadaların və müsabiqələrin qaliblərinə
xatirə hədiyyələri təqdim olundu. Tədbir universitetin istedadlı
tələbələrinin ifasında konsert proqramı
ilə davam etdi. Yusif ƏLİYEV |