Heydər Əliyev Fondunun təşəbbüsü ilə Bilik günündə bir sıra təlim-tərbiyə ocaqları istifadəyə verilib

Heydər Əliyev Fondunun təşəbbüsü ilə sentyabrın 15-də Bilik günü münasibətilə Bakının bir sıra qəsəbələrində təlim-tərbiyə ocaqları istifadəyə verilmişdir.

Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyeva Bakının Nərimanov rayonunda görkəmli oftalmoloq alim, akademik Zərifə xanım Əliyeva adına uşaq bağçasının açılışında iştirak etmişdir.

Burada Azərbaycanın birinci xanımını uşaqlar gül-çiçəklə qarşıladılar.

Mehriban xanım Əliyeva bağçanın əvvəlki görkəmini əks etdirən fotoşəkillərə baxdı. O, rəmzi açılışı bildirən lenti kəsdikdən sonra bağçada akademik Zərifə xanım Əliyevanın büstünü açdı, onun önünə gül dəstələri düzdü.

Uşaq bağçasının yenidən qurulmasına bu ilin əvvəlində başlanılmışdı. Bina tam yararsız vəziyyətdə olduğundan sökülərək yenidən tikilmişdir. Ən müasir standartlara malik bağça 3 yaşdan 6 yaşadək 120 nəfər uşaq üçün nəzərdə tutulmuşdur. Foyedə ümummilli lider Heydər Əliyevin və Heydər Əliyev Fondunun uşaqlara diqqət və qayğısını əks etdirən fotostendlər qoyulmuşdur.

Uşaqlar bağçada ingilis dili ilə yanaşı, bədii gimnastikanın sirlərini də öyrənəcəklər.

Mehriban xanım Əliyeva gimnastika salonunda balacaların çıxışlarını izlədi, onlarla səmimi söhbət etdi, uğurlar arzuladı.

Daha sonra Mehriban xanım bağçanın qrup, yataq otaqları, oyun zalları, hovuzu, müasir üslubda yeməkxanası ilə tanış oldu.

Böyük mərasimlər üçün nəzərdə tutulan salonda iri formatlı monitor, səs və görüntü üçün xüsusi avadanlıq qoyulmuşdur.

Binada mərkəzləşdirilmiş təhlükəsizlik və istilik sistemləri quraşdırılmışdır. Həyətyanı sahədə uşaqlara yol hərəkəti qaydalarının öyrədilməsi üçün xüsusi meydança yaradılmışdır. Mehriban xanım Əliyeva otaqların təzə avadanlıqla təchiz edilməsini, yaradılmış rahat şəraiti yüksək qiymətləndirdi.

* * *

Elə həmin gün Heydər Əliyev Fondunun təşəbbüsü ilə Badamdar qəsəbəsində Tofiq Məmmədov adına 239 nömrəli orta məktəbin təmirdən sonra açılışı olmuşdur.

Məktəbin direktoru Sədaqət Əzimova bildirmişdir ki, təmirdən əvvəl məktəbdə 1200 nəfərdən artıq şagird dörd növbədə oxuyurdu. İndi isə uşaqlar bir növbədə təhsil alacaqlar. Fondun təşəbbüsü ilə məktəbin birinci sinif şagirdlərinə çantalar və 16 adda müxtəlif ləvazimat paylanılmışdır.

Məktəbə ən böyük hədiyyə isə süni örtüklü futbol meydançasının açılışı olmuşdur. Burada nümunəvi məşqlər edən Azərbaycanın 15 yaşadək futbolçulardan ibarət yığma komandası məktəbə 50 futbol topu və idman geyimləri hədiyyə etmişdir.

* * *

Sentyabrın 15-də Heydər Əliyev Fondunun təşəbbüsü ilə Ələt qəsəbəsindəki 105 nömrəli əsas məktəbin də yenidən qurulmuş binasının açılışı olmuşdur.

"Yeniləşən Azərbaycana yeni məktəb" layihəsi çərçivəsində yenidən qurulan məktəb 250 şagird üçün nəzərdə tutulmuşdur. Məktəbin fizika, biologiya, xarici dil kabinetləri, kompüter otağı, geniş idman salonu vardır.

AzərTAc

Heydər Əliyev Fondunun təşəbbüsü ilə Azərbaycanda 237 məktəb istifadəyə verilib

Son illərdə Heydər Əliyev Fondunun təşəbbüsü ilə Azərbaycanın müxtəlif bölgələrində istifadəyə verilən məktəblərin sayı 237-yə çatmışdır. Fondun "Yeniləşən Azərbaycana yeni məktəb" layihəsi çərçivəsində həyata keçirilən genişmiqyaslı işlər Lənkəran, Masallı, Göyçay, İmişli, Neftçala, Kürdəmir, Beyləqan rayonlarında, habelə paytaxtın Qaradağ, Səbail, Əzizbəyov, Yasamal rayonlarında yeni məktəb binalarının istifadəyə verilməsinə imkan yaratmışdır.

Fonddan AzərTAc-a bildirmişlər ki, Kürdəmirdə inşa olunan 300 şagird yerlik məktəb binası, Göyçay rayonunun Qarabağlar və Mirzəhüseynli kənd orta məktəbləri şagirdlərin yüksək təhsillə təmin olunmasına imkan verəcəkdir. Neftçala rayonunda Kürqarabucaq, Masallı rayonunda isə İkinci Yeddioymaq kəndlərindəki yeni məktəb binaları tədrisin keyfiyyətini yüksəltməyə kömək edəcəkdir. Son dövrlərdə Heydər Əliyev Fondunun təşəbbüsü ilə Lənkəranın Səpnəkəran, Daştatük, Tatoba, Tuado kənd orta məktəbləri, Beyləqan və Astara şəhərlərində yeni təhsil ocaqları inşa olunmuşdur.

Bundan əlavə, Fond tərəfindən xüsusi sifariş əsasında hazırlanmış 130 min çanta və məktəb ləvazimatı bu il birinci sinfə gedəcək şagirdlərə paylanılmışdır. Hər bir çantaya 16 adda məktəb ləvazimatı - fənn dəftərləri, albomlar, rəngli karandaşlar və digər əşyalar qoyulmuşdur.

Heydər Əliyev Fondu yeni dərs ili ərəfəsində Gəncədə birinci sinfə gedən 462 şagirdi məktəbli geyimi ilə təmin etmişdir.

ötən bir il ərzində mütəxəssislər qrupu tərəfindən hazırlanan 140 adda plakat məktəblərdə tədrisin keyfiyyətini yüksəltməyə xeyli kömək edəcəkdir.

2005-ci ildən başlayaraq "Yeniləşən Azərbaycana yeni məktəb" layihəsi çərçivəsində ölkəmizin ən müxtəlif bölgələrində, o cümlədən ucqar dağ kəndlərində məktəblər tikməklə Heydər Əliyev Fondu müasir gəncliyin savadlı yetişməsinə, ümumən, respublikamızın inkişafına öz töhfəsini verir.