|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Müəllimlər qərəzli tənqidlərə etiraz edir, yeni dərslik komplektlərini bəyəndiklərini bildirirlər Məlum olduğu kimi, "Pedaqogika"
nəşriyyatının direktoru Əlövsət Osmanlı
və ona dəm tutanlar I siniflər üçün yazılmış
dərslik komplektləri haqqında mətbuatda
qərəz dolu silsilə tənqidi yazılar dərc
etdirirlər. Bununla əlaqədar son günlər redaksiyamızın
poçtuna xeyli oxucu məktubu daxil olmuşdur. Həmin
məktublarda ölkəmizin müxtəlif bölgələrində
çalışan təhsil işçiləri yeni
dərsliklərə qarşı məqsədli şəkildə
aparılan qərəzli tənqidə etiraz edir,
dərsliklərin üstünlüklərindən,
məziyyətlərindən söz açırlar. Məktubların
hamısını ayrı-ayrılıqda dərc etmək
imkanımız xaricində olduğundan onların bir
qismini icmal şəklində oxucuların diqqətinə
çatdırırıq. Yeni fənn kurrikulumları əsasında
hazırlanmış dərsliklərin haqsız və
qərəzli tənqidi Cəlilabad rayonunun təhsil işçilərini
də hiddətləndirib və onlar öz etirazlarını
redaksiyamıza göndərdikləri "özü yıxılan
ağlamaz və yaxud ustadına kəm baxanın gözlərinə
qan damar" başlıqlı yazıda bildiriblər.
Cəlilabad RTŞ-ın müdiri Ədalət Əsgərovun,
rayonun Günəşli kənd 2 nömrəli orta
məktəbinin direktoru, əməkdar müəllim Kəramət
Həsənovun, Ocaqlı kənd 1 nömrəli orta
məktəbinin riyaziyyat müəllimi, əməkdar müəllim
Allahbağış Muradovun, Cəlilabad şəhər
8 nömrəli orta məktəbin ibtidai sinif müəllimi,
əməkdar müəllim İltifat Bağırovun, Göytəpə
şəhər 1 nömrəli orta məktəbin ibtidai sinif
müəllimi Aybəniz Qasımovanın, Privolnoye
kənd 1 nömrəli orta məktəbin ibtidai sinif müəllimi
Asiya Orucovanın, Cəlilabad şəhər 2 nömrəli
orta məktəbin ibtidai sinif müəllimi Şəmsiyyə
Qasımovanın, Uzuntəpə kənd 1 nömrəli
orta məktəbin ibtidai sinif müəllimi, "Ən yaxşı
müəllim" müsabiqəsinin qalibi Tahir Tahirzadənin,
RTŞ-ın ibtidai siniflər üzrə metodisti Vaqif Süleymanovun
imzaladığı məktubda deyilir: "Biz - Cəlilabad rayonunun təhsil işçiləri
- saç-saqqalını sinif otaqlarının divarları arasında
ağardan, gözünün nurunu gələcəyimiz olan balalarımıza
bəxş edən insanlar Əlövsət Osmanlı adlı
başabəla naşir və "dərslik müəllifi"nin
artıq yarım ilə yaxın bir müddət
ərzində dayanmadan müxalifətyönümlü mətbuatda
dərc etdirdiyi tənqid, böhtan, çirkab dolu bədyanlarını
təəssüf və dərin narazılıq hissi ilə
qarşılamışıq. ölkəmizdə mətbuat, söz azadlığından
sui-istifadə edən Ə.Osmanlı təhqiramiz,
qeyri-etik ifadələr işlətməkdən çəkinməyərək
əsassız iddialar irəli sürür, guya ona qarşı
haqsızlıq edildiyini, müəllifi olduğu I sinif
"Riyaziyyat" və "Həyat bilgisi"
dərsliklərinin Dərslikləri
Qiymətləndirmə Şurası (DQŞ)
tərəfindən qeyri-obyektiv qiymətləndirildiyini
hay-küylə nəzərə çarpdırmağa çalışır". Məktub müəllifləri Ə.Osmanlının
tənqid hədəflərindən biri olan Azərbaycan
Respublikasında ümumi təhsilin konsepsiyasını (Milli
Kurrikulumu) yüksək qiymətləndirərək onun
tətbiqini qloballaşan dünyamızda zamanın
tələbi olduğunu, Azərbaycan hökuməti
tərəfindən 2006-cı ilin oktyabrında təsdiq
olunmuş "Azərbaycan Respublikasında ümumi
təhsilin konsepsiyası (Milli Kurrikulumu)"
sənədində dövlətin təhsillə bağlı
siyasətinin, cəmiyyətin ehtiyac və
tələblərinin, eləcə də şagirdlərin
meyil və maraqlarının
nəzərə alındığını
bildirirlər. Məktubda "öz gözündə tiri görməyən,
başqasının gözündə isə qıl axtaran
cənab Ə.Osmanlının" "Riyaziyyat"
dərsliyinə də münasibət bildirir, onun 1964-cü ilin
"Hesab" dərsliyi ilə oxşarlıq təşkil
etdiyi, dərslikdə ardıcıllığın olmadığı
göstərilir. Dediklərini faktlarla sübut edən müəlliflər
yazırlar: "Müəllif"
1-dən 10-a
qədər ədədlər mövzusunda beşinci
dərsdən başlayaraq toplama və çıxma
əməlləri verir. Hərçənd ki, toplama və çıxma
mövzusuna 34 dərs qalmışdır. Aydındır ki,
bu, şagirdlər üçün artıq yükdür, onlarda heç bir
bacarıq aşılamır, əksinə, şagirdləri
əzbərçiliyə sövq edir. Toplama və çıxma əməlləri
17-ci dərsdən başlayaraq 108-ci dərsə
qədər hər dərsdə verilmişdir. Amma,
komponentləri haqqında məlumat 108-ci dərsdə
verilirdi. çox qəribədir, oktyabrın axırında
toplama və çıxmanı öyrənənlər aprelin
sonunda komponentlərin adlarını öyrənirdilər. Müəllimlər
Ə.Osmanlının bu səhvini düzəltmək üçün mövzunun
yerini dəyişməli olurdular. Ə.Osmanlının müəllifi
olduğu "Riyaziyyat" dərsliyində ilin birinci yarısına
qədər nə bir yazılı məlumat var, nə bir
məsələ". Ə.Osmanlının "Riyaziyyat"
dərsliyinin yeddi il dalbadal dəyişmədən, bağışlanılmaz
səhvləri təkrar edilərək çap olunduğunu, müəllifin
həmin səhvləri aradan qaldırmaq əvəzinə
qələmə sarılıb, Təhsil Nazirliyinə,
Dərslikləri Qiymətləndirmə Şurasına
və onun üzvlərinə böhtanlar atdığını
deyən məktub müəllifləri, nəhayət, Ə.Osmanlının
yazdığı başabəla kitablardan canlarını
qurtara bildiklərini söyləyir, onun - bir dəfə
də olsun belə ibtidai sinifdə dərs deməmiş,
ibtidai siniflərdə fənlərin tədrisi metodikasından
başı çıxmayan bir adamın körpə balalarımız
üçün dərslik yazmaq haqqının olmadığını
qeyd edirlər. Məktub müəllifləri sonra yazırlar:
"Ə.Osmanlının qəzetlərə verdiyi açıqlamalarda,
necə deyərlər, "xoruzun quyruğu" görünür.
Onun hay-həşiri, sən demə, Azərbaycan Respublikasının
Tender haqqında qanununa əsasən keçirilmiş
tenderdə məğlub olması imiş. Tenderdə
məğlub olmuş Osmanlı indi qələmə sarılıb
Təhsil Nazirliyinin ünvanına böhtanlar atmaqla məşğuldur.
Halbuki əvvəlki illərdə tender qalibi olarkən
bəh-bəhlə indi qılıncladığı
Təhsil Nazirliyini və Dərslikləri
Qiymətləndirmə Şurasını
tərifləyirdi və bu tərifnamələrdən dili
qabar olmuşdu. Hazırda isə Osmanlı məğlubiyyəti
ilə barışmayaraq ona-buna ağız atır. Onun bu
çabalarının məqsədi aydındır. Quba rayonunun bir qrup təhsil işçisi - RTŞ-ın
müdiri Süleyman Aslanov, rayonun Alıc-Digah kənd
orta məktəbinin riyaziyyat müəllimi Gülmirzə
Pənahov, Zizik kənd orta məktəbinin ibtidai sinif
müəllimi Saçlı Musayeva, RTŞ-ın ibtidai
siniflər üzrə metodisti Mülayim Orucova, riyaziyyat
fənni üzrə metodisti Ağababa Atakişiyev, Quba
şəhər 4 nömrəli humanitar fənlər təmayüllü
məktəb-liseyin ibtidai sinif müəllimləri Vəfa
Babayeva, Pərvanə Hüseynova, Alekseyevka kənd orta
məktəbinin ibtidai sinif müəllimi Xuraman Əlimərdanova
RTŞ-ın orqanı "Tərəqqi"
qəzetinin baş redaktoru, RTŞ-ın metodisti Şıxəmməd
Seyidməmmədov Əlövsət Osmanlıya ünvanladıqları
"Açıq məktub"da öncə ölkədə
həyata keçirilən təhsil islahatlarından, kurrikulum
islahatları çərçivəsində atılan addımlardan
bəhs edir, Qubanın təhsil işçilərinin
təhsil sahəsindəki yenilikləri müdafiə
etdiklərini bildirirlər. Sonra məktubda deyilir:
"Cənab Əlövsət Osmanlı! Sizin
"Həyat bilgisi -1" və "Riyaziyyat - 1"
dərslikləri barədə "Azadlıq"
qəzetində dərc etdirdiyiniz silsilə,
qərəzli, böhtan xarakterli yazılarınız reallıqdan,
hadisələrə, zamanın tələbinə açıq
gözlə baxmaqdan çox uzaqdır və bizim də
hiddətimizə səbəb olmuşdur. çox təəssüf
ki, sizin yazılarınızda mətləbdən çox
qərəzkarlıq öz əksini tapmışdır.
"Azadlıq"ın 28,11.2008-ci il tarixli sayındakı
məqalənizdə "Həyat bilgisi - 1"
dərsliyinin 23-cü səhifəsindən verdiyiniz şəkildə
"Mənim ailəm - mənim vətənimdir"
ifadəsinə irad tutursunuz. Məgər bu ifadə
"Mənim evim - mənim vətənimdir",
"Mənim kəndim - mənim vətənimdir" kimi
dəfələrlə işlənən, tanınmış
şəxsiyyətlərin möhürlədiyi
ifadələrdən fərqlənirmi və bunun nəyi
ironiya ilə qarşılanmalıdır?" Sonda məktub müəllifləri Ə.Osmanlını
obyektivlik hissini itirməməyə, pedaqoji ictimaiyyəti
çaşdırmamağa, təhsilimizə yad müstəvidən
baxmamağa çağırırlar. Redaksiyamıza Goranboy rayonundan daxil olmuş
"Alternativ dərsliklər - həqiqətin tək üzü"
sərlövhəli yazını da bir qrup təhsil işçisi
göndərib. Məktubu imzalayanlar - Goranboy RTŞ-ın müdiri
Elmar Əliyev, metodmərkəzin direktoru Faiq
Dosiyev, rayonun Safikürd kənd orta məktəbinin
direktor müavini, əməkdar müəllim İsgəndər
Səklikov, şəhər 1 nömrəli orta
məktəbin ibtidai sinif müəllimi Roza Namazova, şəhər
2 nömrəli orta məktəbin ibtidai sinif müəllimləri
Sona Məmmədova və Dürdanə
Məmmədova təhsilimizdə baş verən
yeniliklərə diqqəti cəlb edir, ölkəmizdə
yeni təhsil konsepsiyasının, Milli Kurrikulumun
tətbiqini görülmüş işlərin ən
əhəmiyyətlisi kimi qiymətləndirir, Milli
Kurrikulumun həyata keçirilməsinə xidmət edən
yeni dərsliklərin yazılmasını təhsilimizin
ən böyük uğurlarından sayırlar. Bu baxımdan müəllifləri
Aybəniz İbrahimova və Gülər Mehdiyeva olan birinci
siniflər üsün "Həyat bilgisi" və Nayma
Qəhrəmanova ilə Cəmilə Əsgərovanın
"Riyaziyyat - 1" dərsliklərini xüsusilə yüksək
dəyərləndirirlər. Müəlliflər yazırlar
ki, həmin dərslik
komplektləri şagirdlərin maraq dünyasını
təmin edə biləcək şəkildə tərtib
edilmiş və nəfis şəkildə çap olunmuşdur.
Kitablar asan öyrənməni, asan mənimsənilməni, çevik
istifadə olunma keyfiyyətlərini özündə birləşdirməklə
interaktiv təlim üçün hələlik alternativi olmayan
vəsaitdir. Kitablar müəllimlərin təlim prosesini
xeyli asanlaşdırmaqla öyrədənləri öyrətmək
funksiyasını da müvəffəqiyyətlə yerinə
yetirir. Haqqında söhbət gedən dərslik
komplektləri pedaqoji ictimaiyyət tərəfindən
birmənalı şəkildə qəbul olunsa da,
təəssüflər olsun ki, bir qrup pedaqoq
tərəfindən qısqanclıqla qarşılanır.
Belə pedaqoqlardan biri 2007-ci ildə Azərbaycan Respublikasının
ümumtəhsil məktəblərinin ibtidai siniflərinin
"Həyat bilgisi" və "Riyaziyyat"
dərsliklərinin həmmüəlliflərindən olan
Əlövsət Osmanlıdır". Daha sonra Goranboy təhsil işçiləri
Ə.Osmanlının hərəkətlərinin onlarda
təəssuf hissi doğurduğunu bildirir, Ə.Osmanlıya
məsləhət görürlər ki, "ənənəvi
təhsil problemləri ilə məşğul olmayan
mətbuat orqanlarında çıxış
etməkdənsə, bugünkü dərsliklərdən daha üstün
kitablar tərtib etsin". Daha sonra məktubda müəllifləri Əlövsət
Osmanlı və başqaları olan 2007-ci ildə nəşr
edilmiş dərsliklərlə yeni dərsliklər müqayisə
edilir, yeni dərslik komplektlərinin açıq-aşkar üstün
olduğu qeyd edilir. Hacıqabul rayonunun təhsil işçiləri
adından redaksiyamıza göndərdikləri məktubda RTŞ
müdiri, əməkdar müəllim Şükür
Məmmədov, şəhər 1 nömrəli orta
məktəbin tarix müəllimi, əməkdar müəllim Xədicə
Abasova, Atbulaq kənd orta məktəbinin riyaziyyat müəllimi,
Respublika Təhsil Şurasının üzvü Atarbəy
Soltanov, Rəncbər kənd orta məktəbinin
riyaziyyat müəllimi, qabaqcıl təhsil işçisi Qənimə
İsayeva, təhsil şöbəsi metodkabinetinin direktoru
Arifə Bunyatova, şəhər 4 nömrəli orta
məktəbin riyaziyyat müəllimi Almara Babayeva, şəhər
2 nömrəli orta məktəbin riyaziyyat müəllimi Hacıbədəl
Heydərov, Qubalı kənd orta məktəbinin
riyaziyyat müəllimi Ağaşərif Əzizov, şəhər
5 nömrəli orta məktəbin ibtidai sinif müəllimi Seyidzöhrə
İmanova və şəhər 3 nömrəli orta
məktəbin ibtidai sinif müəllimi Peykər Quliyeva yazırlar:
"Yeni fənn kurrikulumları əsasında yazılan
və 2008-2009-cu dərs ilindən tətbiq olunan yeni
dərsliklər müəllimlərin ürəyincədir. Uzun
illər arzusunda olduqları bir vəsaitin - müəllim
üçün vəsaitin həmin dərslik komplektində olması
hamımızı daha çox sevindirir. Yeni dərsliklər
əvvəlki dərsliklərdən bir çox üstünlüklərlə
fərqlənir, öz məzmun və keyfiyyətilə seçilir,
müəllim və şagirdlər tərəfindən yüksək
qiymətləndirilir. Yeni dərsliklərdə verilən
çalışmalar, suallar, testlər şagirdlərin
intellekt səviyyəsini yüksəldir, sual və tapşırıqların
şəkil, cədvəl və sxemlərlə
verilməsi şagirdlərin düşünmə
qabiliyyətini gücləndirir, onların müstəqil işləməsinə
daha çox şərait yaradır və eyni zamanda biz müəllimləri
də yaradıcı işləməyə sövq edir. Deyilən hər hansı əsassız
tənqid, şər, böhtan biz müəllimlərdə ciddi
narahatçılıq hissi yaradır. "Pedaqogika" nəşriyyatının
direktoru Əlövsət Osmanlının "Azadlıq"
qəzetinin səhifələrində "Riyaziyyat"
və "Həyat bilgisi" dərslikləri haqqında
yazılar dərc etdirməsi, bu yazılarda
dərsliklərdə yalnız nöqsan axtarması, ağa
qara deməsi onun nə qədər iddialı, özündən
müştəbeh, ambisiyalı olduğunu bir daha sübut etdi. Cənab Osmanlı, gözəl bir atalar sözünü
sizə xatırlatmaq istəyirik: "Ustadına kəm
baxanın gözlərinə qan damar". Zaman ən gözəl
hakimdir. Zaman sübut edəcək ki, bu gün başlanan
kurrikulum islahatı, yeni fənn kurrikulumları əsasında
müasir dərsliklərin yazılması dövrünə görə
çox cəsarətli və düzgün addımdır". Poçtumuza daxil olmuş digər bir
məktubda Bakı şəhərindəki 289 nömrəli
orta məktəb - "Zəngi" liseyinin müəllimləri
Ariz Bağırov, Nazim Cəfərov, Rasim Əhmədov
(riyaziyyat), Gültəkin Mustafayeva, Nərgiz
Gəncəliyeva, Afaq Cəfərova, Zivər
Məmmədova, Rəna Quliyeva, Aysel Hüseynova (ibtidai
sinif) sözügedən məsələyə öz münasibətlərini
bildirmişlər. Məktubda deyilir ki, "Ə.Osmanlının
tənqid etdiyi N.Qəhrəmanova və C.Əsgərovanın
müəllifləri olduqları dərslik Azərbaycan
Respublikası Nazirlər Kabinetinin 30.10.2006-cı il tarixli
233 nömrəli qərarı ilə təsdiq olunmuş
"Azərbaycan Respublikasında ümumi təhsilin
konsepsiyası (Milli Kurrikulumu)" sənədinin
tələblərinə cavab verir. Bu dərslikdə mövcud
dünya təcrübəsinin öyrənilməsi və təhlili
əsasında riyaziyyat təliminin qəbul olunmuş
məzmun xətləri öz əksini tapmışdır. Dərslik şagirdlərin yaş, qavrama
və bilik səviyyələrinə uyğundur. Dərslik şagirdlərin yaradıcı
təfəkkürünü, idrakını, bilik və bacarıq
səviyyəsini, düşünmə və problemi həll
etmə qabiliyyətini inkişaf etdirir. Verilmiş tapşırıqlar
şagirdi düşünməyə sövq edir. Etiraf edək ki, əvvəlki
dərslikdə belə tapşırıqlara rast
gəlmirdik. Tapşırıqlar çox bəsit və
sadə idi. Riyazi məntiqi və təfəkkürü inkişaf
etdirən çalışmalar yox dərəcəsində
idi. Bu isə şagirdə yerində saymaqdan başqa heç
nə vermirdi". Sonra məktub müəllifləri dedikləri
fikirləri yeni dərslikdən gətirdikləri çoxlu
misalla əsaslandırırlar.
Qeyd edirlər ki, dərsliyin 10-cu
səhifəsində verilmiş heyvanxananın planı,
74-cü səhifədə verilmiş misallar şagirdlərin
məntiqi təfəkkürünün inkişafında mühüm rol
oynayır. Şagirdlər bu cür çalışmalar həll
etməklə cisim və ya əşyanın oxşar
və fərqli xüsusiyyətlərini dərk edirlər
və s. Dərslikdə verilmiş
qiymətləndirmə mexanizmini, fəal təlim metodları
ilə işləmək üçün əlverişli şərait
yaradan tapşırıqları da müəllimlər onun
məziyyəti hesab edirlər. Buna misal olaraq onlar 32-ci
səhifədə verilmiş Venn diaqramını xüsusi
qeyd edirlər. Məktubda dərsliyin digər
məziyyətləri də konkret misallara istinad
edilməklə sadalanır, burada getmiş bəzi
səhvlər qeyd olunur. Sonra məktub müəllifləri apardıqları
təhlillərə əsaslanaraq Ə.Osmanlının müəllifi
olduğu "Riyaziyyat - 1" dərsliyinin nöqsan və çatışmazlıqlarına
diqqəti yönəlir və göstərirlər ki, bu
dərslikdə Milli Kurrikulumda riyaziyyata qoyulan beş
məzmun xəttindən biri olan statistika və ehtimal,
habelə qiymətləndirmə vərəqi, ümumiyyətlə,
yoxdur, seçilmiş misal və məsələlər çox
bəsitdir və şagirdləri nə təşkilatçılığa,
nə də yaradıcılığa sövq etmir. Bakı Şəhəri üzrə Təhsil
İdarəsi metodmərkəzinin direktor müavini Sitarə
Məmmədova, paytaxtdakı 23 nömrəli orta
məktəbin müəllimi Solmaz Abdullayeva, 32 nömrəli
məktəbin müəllimi Sədaqət Qurbanova, 182
nömrəli məktəbin müəllimi Solmaz Yunisova və
212 nömrəli məktəbin müəllimi Mehriban Əkbərova
redaksiyamıza göndərdikləri məktubda
təhsilin müasir tələblər zəminində
yeniləşməsində və kurrikulum islahatları çərçivəsində
aparılan işlərin daha mükəmməl olmasında
yeni dərsliklərin xüsusi rolu olduğunu, bu baxımdan
"Riyaziyyat - 1" dərsliyinin yüksək keyfiyyəti,
forması, gözəl dizaynı ilə seçildiyini qeyd
edirlər. Onlar yazırlar: "Burada verilmiş
məsələlər, çalışmalar, məntiqi
suallar,cədvəllər, rebuslar, mozaikalar, rəngli şəkillər,
düşündürücü fiqurlar o qədər maraqlıdır ki,
nəinki şagirdlər, eyni zamanda valideynlər də
kitabdakı çalışmalara biganə qalmır, uşaqlarla
birlikdə onları yerinə yetirir, oyun xarakterli riyazi
məsələləri həll edirlər". Məktub müəllifləri qeyd edirlər
ki, mövzuların düşündürücü olması, kurrikulumun
tələblərinə uyğun işlənməsi şagirdlərin
informasiyaları toplamaq, onların üzərində işləmək
qabiliyyətini təkmilləşdirməyə, təhlil
və təsdiq etmək bacarığına
yiyələnməyə, müstəqil qərarlar qəbul
etməyə, ideyalar irəli sürməyə, qoyulan
məsələlərə yaradıcı-tənqidi yanaşma
bacarığı əldə etməyə kömək edir. Müəlliflərə görə, dərsliyin
ən üstün cəhəti ondan ibarətdir ki, o, şagirdlərə
zəruri riyazi bilikləri əldə etməklə yanaşı,
onları həyata tətbiq etməyi də öyrədir. Daha sonra dərsliyin üstünlüklərindən
ətraflı söz açan müəlliflər bildirirlər ki,
"Riyaziyyat - 1" dərsliyində fənlərarası
inteqrasiya zamanı müxtəlif məzmun xətləri
və hər bölmədə öyrənilən biliklər
arasında əlaqə yaradılır, şagirdlərin müxtəlif
sahələr üzrə bilikləri formalaşdırılır
və dünyagörüşünün artırılmasına imkan yaradılır. Məktub bu sözlərlə bitir: "Biz
fəxr edirik ki, müasir tələblərə uyğun
şəkildə dərslik komplektləri ilə işləyirik.
Dərslik komplektləri təhsilə yenilik gətirmişdir". Bakıdakı 212 nömrəli orta
məktəbin direktoru Qurban Həsənovun, onun
təlim-tərbiyə işləri üzrə müavini Leyla
Qurbanovanın, sinif müəllimləri Nuriyyə Paşayevanın,
Qüdrət Rəsulovanın, Ramilə İsmayılovanın,
Solmaz Əliyevanın imzası ilə aldığımız
"Tənqid qərəzsiz olmalıdır" sərlövhəli
yazıda da yeni fənn kurrikulumları əsasında yazılmış
I sinif dərsliklərinin Ə.Osmanlı
tərəfindən haqsız tənqidi pislənir və
dərsliklərin bəyənildiyi bildirilir. Məktubda
deyilir ki, ölkənin bütün təlim-tərbiyə müəssisələrində
olduğu kimi 212 nömrəli məktəbdə də
kollektiv yeni dərs ilinə böyük fəallıqla başlayıb.
Xüsusən I siniflərdə yeni fənn kurrikulumlarının
tətbiqi sahəsində xeyli irəliləyişlər
əldə olunub. Artıq ilkin nəticələr götürülən
istiqamətin düzgün olduğunu göstərir. Bununla yanaşı, məktub müəllifləri
bildirirlər ki, Əlövsət Osmanlının "Azadlıq"
qəzetinin səhifələrində dərc olunan yazıları
pedaqoji kollektivimizdə narahatçılığa
səbəb olub. Ona görə də həmin yazıları
müzakirə etmişik və bu qənaətə gəlmişik
ki, Ə.Osmanlının "Azadlıq" qəzeti
səhifələrində ardı-arası
kəsilmədən dərc olunan təhqiramiz
ifadələrlə dolu çıxışları heç bir
elmi polemikaya uyğun gəlməyən, onun şəxsi
ambisiyaları üzərində qurulan mülahizələridir.
Həmin yazılarda "Riyaziyyat - 1" dərsliyi
ilə bağlı qeyd olunan nöqsanlar prinsipial xarakter daşımır.
Ə.Osmanlının müəllifi olduğu
dərslikdə şagirdlər daha çox
əzbərləməyə sövq edilirdisə,
əksinə yeni "Riyaziyyat - 1" dərsliyində
şagirdlər daha çox düşünməyə, axtarıb
tapmağa istiqamətləndirilir. Bakı şəhərindəki daha bir
tədris müəssisəsindən - İ.Əfəndiyev adına
"Elitar" gimnaziyadan daxil olmuş məktub da
məsələyə obyektiv münasibət bildirilməsi
baxımından diqqəti cəlb edir. Məktubun müəllifi,
gimnaziyanın riyaziyyat müəllimi K.Cəfərli yazır
ki, pedaqoji elmlər namizədi Əlövsət Osmanlının
"Riyaziyyat - 1" komplekti haqqında mətbuatda
dərc etdirdiyi məqalələri oxuyub, onların
qərəzli tonda yazılmasından dərin təəssüf
hissi keçirdim. Hər bir insanın pedaqoji işə töhfə
vermək, hansısa variantı üstün hesab etmək, yeni
təkliflər irəli sürmək istəyinə heç
kəs müdaxilə edə bilməz. Amma təkliflər
qərəz libasına bürünəndə cılız
və dəyərsiz görünür. Mənim fikrimcə,
N.Qəhrəmanova və C.Əsgərovanın müəllifləri
olduğu "Riyaziyyat - 1" dərsliyi milli
dəyərlər zəminində hazırlanıb, Avropa
təhsil sisteminə və fənn kurrikulumunun müddəalarına
uyğundur, düzgün və ardıcıl struktura malikdir, mövzular
detallaşdırılıb və müvafiq sinif şagirdlərinin
yükünə tamamilə uyğundur, çalışmalar şagird
təfəkkürünün inkişafına təsir baxımından
normal seçilmişdir, çalışmaların rəngli
təsviri, məntiqi düşüncəyə əsaslanan
suallar, mövzuların əlaqələndirilməsi üçün
vacib sayılan, həm də ümumiləşdirici çalışmalar,
şagirdlərin dinləmə qabiliyyətinin formalaşması
üçün seçilmiş tapşırıqlar müəlliflərin
dərslik üzərində ciddi işləmələrindən
xəbər verir. Gəncə Şəhər Təhsil İdarəsinin
müdiri Mahal Əliyevin imzası ilə redaksiyamıza
daxil olmuş yazıda isə dərsliklərin məzmun
və poliqrafik tərtibatı ilə bağlı
Gəncə şəhəri ümumtəhsil
məktəblərinin pedaqoji işçilərinin rəy
və təklifləri ümumiləşdirilib. Məktubdan
məlum olur ki, Gəncə şəhərinin təhsil işçiləri
hazırda ölkəmizdə həyata keçirilən dərslik
siyasətini, yeni fənn kurrikulumlarına əsasən hazırlanmış
dərslikləri bəyənir və müdafiə
edirlər. Məktubda son illər hazırlanaraq çap olunmuş
ayrı-ayrı dərsliklər barədə Gəncə
şəhər müəllimlərinin ümumiləşdirilmiş
rəy və mülahizələri öz əksini tapıb. Sumqayıt şəhər 16 nömrəli
məktəbin ibtidai sinif müəllimi, əməkdar müəllim
Rəşid Hümbətov redaksiyamıza göndərdiyi
yazıya "Yeni" dərslik, yaxud köhnə
dərsliyin üzü köçürülmüş variantı" başlığı
qoyub. Məktubunun əvvəlində son illər ölkəmizdə
təhsil sahəsində aparılan islahatlardan,
əldə olunan uğurlardan söz açan müəllif son vaxtlar
müxalifətyönümlü mətbuat orqanlarının
səhifələrində təhsilimizin inkişafına,
kurrikulum islahatı ilə əlaqədar yazılan
dərsliklərə, Təhsil Nazirliyinin Dərslikləri
Qiymətləndirmə Şurasına böhtan dolu yazılarla
rastlaşmasından təəssüf hissi keçirdiyini bildirir.
R.Hümbətov həmin yazıların çoxunun müəllifi
olan Ə.Osmanlıya müraciətlə yazır: "Hörmətli
Əlövsət müəllim, insanın, şəxsiyyətin
böyüklüyü odur ki, o, yeniliklə köhnəliyi, yaxşı
ilə pisi müqayisə edir, düzgün nəticə çıxarır
və həqiqəti etiraf edir. Siz həqiqəti etiraf
etmək əvəzinə, itirilmiş "şöhrətinizi"
geri qaytarmağa çalışırsınız. Sizi narahat
edən odur ki, on ildən çox bir vaxtda müəlliflərindən
biri olduğunuz "Riyaziyyat-1" dərsliyi Təhsil
Nazirliyinin Dərslikləri Qiymətləndirmə Şurası
tərəfindən qəbul olunmamasıdır. Bu,
əslində Sizi narahat etmək əvəzinə,
rəqabətə, II, III, IV siniflər üçün yazılacaq
"Riyaziyyat" dərsliklərini yazmağa hazırlamalı
idi. Təəssüflər olsun ki, bunun əvəzində
Siz Nayma Qəhrəmanova və Cəmilə Əsgərovanın
yazdıqları "Riyaziyyat" dərsliyinə qara
yaxmağa başladınız. Vəziyyət isə Sizin
dediyiniz kimi deyildir. Mövcud dərslik sinif müəllimləri
tərəfindən yaxşı qarşılanmış
və müsbət rəy qazanmışdır. Həmin
dərsliyin uğuru onun dil sadəliyində, başqa
fənlərlə əlaqələndirilməsində,
məntiqində, şagird təfəkkürünün inkişafına
imkan yaratmasındadır. Mən Sizin hazırladığınız
dərsliyi də əldə etmişəm, diqqətlə
səhifələri vərəqləmiş, hər bir
materialla tanış olmuşam. Əfsuslar olsun ki, yuxarıda
sadaladığımız uğurları Sizin
"Riyaziyyat-1" dərsliyində görmürük. Sizin kitabınızın
dili həddindən artıq quru və cansıxıcıdır. Dərsliyi vərəqlədikcə görürük
ki, Sizin həmmüəllifi olduğunuz "Riyaziyyat-1"
dərsliyi köhnə dərsliyin bir çox hallarda üzü köçürülmüş
yeni nəşrindən başqa bir şey deyil. Kitabda köhnə
dərslikdə olan şəkil və illüstrasiyalardan
dəfələrlə istifadə olunmuşdur. Bakı şəhər Pedaqoji Kadrların
İxtisasının Artırılması və Yenidən
Hazırlanması İnstitutunun əməkdaşları Raisə
Bağırova və Arif Əhmədov öz
məktublarını tamamilə Ə.Osmanlının
həmmüəllif olduğu riyaziyyat dərsliyinin
təhlilinə həsr ediblər. Məktubda oxuyuruq: "Ə.Osmanlının digər müəlliflərlə
birlikdə tərtib etdiyi birinci siniflər üçün
"Riyaziyyat" dərsliyinə baxarkən onun yeni
təlim metodlarına uyğun gəlmədiyini aydın
şəkildə görürük. Dərslik ənənəvi
təhsil proqramına əsaslanıb. Mövzularda və çalışmalarda
heç bir yazılı izahat yoxdur. Bu da mövzuların
mənimsənilməsində şagirdlər üçün böyük
çətinlik yaradır. Kürdəmir RTŞ metodkabinetinin direktoru Seyidhüseyn
Qasımov, RTŞ-ın məsləhətçisi İsmayıl
Mehdiyev, Beyi kənd orta məktəbinin ibtidai sinif müəllimi
Səməd Bədəlov da redaksiyamıza göndərdikləri
məktubda son vaxtlar "Azadlıq" qəzetinin bir sıra
saylarında müəllifləri Nayma Qəhrəmanova və
Cəmilə Əsgərova olan "Riyaziyyat-1"
dərsliyi barədə "Pedaqogika" nəşriyyatının
direktoru Əlövsət Osmanlının yazılarını
oxuyub dərin təəssüf hissi keçirdiklərini bildirir,
Milli Kurrikulum əsasında yazılmış dərslik
haqqında söylənilən bəzi qərəzli
fikirlərin onları ciddi narahat etdiyi üçün bu
barədə fikirlərinin ölkənin pedaqoji
ictimaiyyətinə çatdırılmasını xahiş
edirlər. Məktub müəllifləri yazırlar ki,
yeni "Riyaziyyat-1"
dərsliyi nəzəri və praktik biliklərin
əsaslarının sistemli və anlaşıqlı
şəkildə izah olunduğu əsas vasitədir. Burada
şagirdlərin təfəkkürünü inkişaf
etdirməklə əqli fəaliyyətin əsas üsulları
formalaşdırılır və nəticədə şagirdlərin
şəxsiyyət kimi inkişafına xidmət edilir. Hazırladı: Yusif ƏLİYEV
|