Qazaxıstanda 17 yaşlı məktəbli Arlan Raxmetjanov startapına 1,5 milyon dollar sərmayə cəlb edib. 

“Azərbaycan müəllimi” xəbər verir ki, Almatıdan olan gənc proqramçı informasiya texnologiyalarına marağını 10 yaşında kəşf edib, 16 yaşında isə ilk startapını – “Hanlan Tech” şirkətini qurub.

“Hanlan Tech” iOS tətbiqləri və veb-saytların hazırlanması ilə məşğuldur. Şirkətin ilk məhsullarından biri “Extracurrify” adlı mobil tətbiq şagirdlərə şəxsi inkişaf məqsədlərinə uyğun onlayn kurslar, olimpiadalar və müsabiqələri seçməyə kömək edir. Proqramda həmçinin süni intellektli çat-bot vasitəsilə istifadəçinin büdcəsi, maraqları və coğrafi mövqeyinə uyğun universitetlərin siyahısı da təqdim olunur. Buraxılışının ilk həftəsində tətbiq 1500 dəfə yüklənib, veb-versiya isə 17 min ziyarətçi toplayıb.

Daha sonra Arlan süni intellekt əsasında işləyən “DresserAI” layihəsini irəli sürüb. Bu servis istifadəçiyə hava şəraiti və moda trendlərini nəzərə alaraq geyim tövsiyələri verir. Layihəni qardaşı ilə birlikdə idarə edən gənc hazırda investor axtarışındadır.

A.Raxmetjanov həmçinin məktəblilər üçün “Doorway to Venture Capital: An Introduction for Young Students” (“Venture kapitalına giriş: məktəblilər üçün bələdçi”) adlı kitab yazaraq “Amazon” və digər platformalarda satışa çıxarıb. Kitab ona böyük gəlir gətirməsə də, müəllifin əsas məqsədi biliklərini paylaşmaq olub.

Arlan bu yay Silikon vadisində gənc sahibkarlar üçün prestijli “LaunchX” akselerasiya proqramına qatılacaq. O həmçinin Pensilvaniya Universitetinin Uorton Biznes Məktəbinin “Wharton Essentials of Entrepreneurship” kursuna qəbul alıb.

Gənc startapçı təhsilini Stenford Universitetində davam etdirmək arzusundadır.