Bu gün ali təhsil müəssisələrinə qəbul üçün ixtisas seçimi prosesi  başa çatıb. 

"Azərbaycan müəllimi" xəbər verir ki, Dövlət İmtahan Mərkəzinin məlumatına əsasən, ümumilikdə 86 460 abituriyent və subbakalavr elektron sistem vasitəsilə ixtisas seçimini təsdiqləyib. Onların paylanması ixtisas qrupları üzrə fərqlidir və rəqabət hər qrupa görə müxtəlif səviyyədədir.

I qrupun alt qruplarında abituriyent çatışmazlığı: Plan yerləri sənəd verənlərdən daha çox olub

Birinci ixtisas qrupu üzrə 20 385 plan yeri mövcud olduğu halda, 23 919 nəfər ərizəsini təsdiqləyib. Riyaziyyat-kimya alt qrupunda 12 955 plan yeri mövcuddur və burada təxminən 11 800 nəfər iştirak edir. Riyaziyyat-informatika alt qrupunda isə 7 430 yerə qarşı 6 850 nəfər ixtisas seçib. Nəticədə bu qrupda 3 500-ə yaxın abituriyentin müsabiqədə uğur qazanmayacağı gözlənilir.

II qrup üzrə namizədlərin sayı plan yerlərini üstələyib: 4 100-ə yaxın namizəd qəbul ola bilməyəcək

İkinci ixtisas qrupu üzrə 14 935 plan yerinə təxminən 19 000 nəfər ərizə verib. Bu rəqəmlər əsasında 4 100-ə yaxın namizədin qəbul imkanını əldə edə bilməyəcəyi proqnozlaşdırılır.

Ən yüksək rəqabətin müşahidə olunduğu qrup: 6000-dən çox abituriyent qəbul şansını itirib

Üçüncü ixtisas qrupu ölkədə ən yüksək rəqabətin müşahidə olunduğu qrupdur. Burada 15 583 plan yerinin təqdim olunmasına baxmayaraq, 24 414 abituriyent və subbakalavr ixtisas seçimi ərizəsini təsdiqləyib. Dil-tarix alt qrupunda 13 558 yer mövcuddur və təxminən 24 min nəfər bu qrupda iştirak edir. Tarix-coğrafiya alt qrupunda isə 2 025 plan yerinə qarşı 7 620 nəfər müraciət edib. Bu isə 6000-dən çox abituriyentin qəbul şansı qazana bilməyəcəyini göstərir.

IV qrupda 2 200-ə yaxın abituriyent kənarda qalacaq

Dördüncü ixtisas qrupu üzrə 4 732 yer mövcud olub, lakin 6 966 nəfər ərizə verib. Müsabiqədə iştirak edənlərin sayı isə 5 420 civarındadır. Burada qəbul imkanı əldə edə bilməyənlərin sayı 2 200-ə yaxın olacaq. Bu ixtisas qrupunda balı 600-dən çox olan abituriyentlərin sayı 960-980 nəfər arasındadır ki, bu da rəqabətin səviyyəsini əks etdirir.

V qrupda kritik vəziyyət: 4 700 yer üçün 16 500 nəfər mübarizə aparacaq

Beşinci ixtisas qrupu üzrə 4 700-dən bir qədər çox plan yeri mövcuddur, müraciət edənlərin sayı isə təxminən 16 500 nəfərdir. Bu, 11 000-dən çox abituriyentin müsabiqədən kənar qalacağını göstərir.

Dövlət İmtahan Mərkəzinin sədri Məleykə Abbaszadə qeyd edib ki, ölkə üzrə ümumilikdə 60 914 plan yeri mövcuddur və onların təxminən 28 600-ü dövlət sifarişi əsasında təmin edilir. Dövlət sifarişli yerlərə qəbul şansı isə seçimini diqqətlə edən namizədlər üçün daha yüksəkdir.

Ümumilikdə, keçid ballarında müəyyən azalmalar proqnozlaşdırılır. Məsələn, 600-700 bal aralığında keçid balları ötən illə müqayisədə təxminən 5 ballıq azalma göstərə bilər. 500 baldan yuxarı ballarda keçid ballarının səviyyəsi əsasən sabit qalacaq, 400-300 bal aralığında isə ciddi dəyişiklik gözlənilmir.