Bu gün ölkəmizdə təhsilə verilən dəyər və yaradılan imkanlar minlərlə gəncin öz uğur hekayəsini yazmasına şərait yaradır. Belə yeniyetmələrdən biri - Qax şəhəri N.Allahverdiyev adına 2 nömrəli məktəb-liseyin 11-ci sinif şagirdi Gülay Mütəllibova 2014-cü ildən oxuduğu bu təhsil ocağında həm elmi, həm də sosial fəaliyyəti ilə fərqlənir. 

O, Uşaq Səfirlər Məclisinin Qax regional nümayəndəsi olmaqla yanaşı, məktəbdə yaradılmış klubun da rəhbəridir. Kitab oxumağa və intellektual yarışlara xüsusi maraq göstərən Gülayın ən böyük ilham mənbələrindən biri bacısıdır. Respublika fənn olimpiadasının (RFO) qızıl medalçısı olan bacısının uğuru onun ədəbiyyata marağını daha da artırıb.

Ədəbiyyat fənni üzrə RFO-da ardıcıl uğurlar əldə edən Gülay ilk dəfə gümüş, daha sonra qızıl medalla zirvəyə yüksəlib. Növbəti il yenidən gümüş medala layiq görülüb və nəhayət, XI sinifdə qızıl medal qazanaraq ikiqat qızıl mükafatçı olub. 

“Olimpiadalarda iştirak edən dövrlərdə yeni dostlar qazandım, fərqli insanlarla tanış oldum, çətinliklərə qarşı dözümlü olmağı öyrəndim. Bəzən yorucu, uzun və tükəndirici olsa da, hər dəfə yanımda olan müəllim və valideynlərim sayəsində motivasiyamı qorudum”,- deyən Gülay təhsil göstəriciləri ilə də fərqlənir.

O, IX sinif buraxılış imtahanında 293.7, XI sinifdə isə 293.3 bal toplayaraq akademik nailiyyətlərinin davamlılığını qoruyub saxlaya bilib. 

Bununla yanaşı, müxtəlif müsabiqə və tədbirlərdə də uğurla çıxış edib. Heydər Əliyevin 100 illiyi münasibətilə keçirilən “Ən yaxşı təqdimat” müsabiqəsində ikinci yerə layiq görülüb, 2023-cü il sentyabr konfransında çıxış edib, 2024-cü ildə Azərbaycan Uşaqlarının VI Ümumrespublika Forumunda iştirak edib.

Hüquq təhsili almağa hazırlaşan Gülay gələcəkdə bu sahədə fərqlənməyi və universitet həyatında da fəallığını qorumağı qarşısına məqsəd qoyub. 

Onun sözlərinə görə, məktəbdə olduğu kimi, universitetdə də intellektual və ictimai fəaliyyətlərə qatılmaq, özünü fərqli sahələrdə inkişaf etdirmək niyyətindədir.

Gülay uğurlarının təməlində dayanan şəxsləri də unutmur:

“Ən böyük təşəkkürüm ailəmə, xüsusilə mənə hər addımda yol göstərən bacıma və əlbəttə ki, Azərbaycan dili və ədəbiyyat müəllimim Nazlı İsmayılovaya, məktəb direktorumuz Aybəniz Məmmədovaya aiddir. Onların dəstəyi mənim bu yolda ən güclü dayağım oldu”.