Şəmkir rayonu Kimya-biologiya təmayüllü liseyin biologiya müəllimi Samirə Məsimova sertifikatlaşdırma imtahanında maksimum nəticə göstərib. 

“Azərbaycan müəllimi” 60 bal toplayan müəllimlə həmsöhbət olub. 

“Xüsusi hazırlaşmamışdım”

Samirə müəllim bildirir ki, imtahana xüsusi kurs və ya təlim keçmədən qatılıb: “Təxminən 20 gün özüm metodika və pedaqogikadan hazırlaşdım. Fənnimdən ayrıca çalışmağa ehtiyac duymadım. Çünki özümə güvənirdim. Sualların çətinlik səviyyəsi balanslı idi — asan, orta və bir qədər çətin suallar yer almışdı. Amma ümumilikdə çətinlik çəkmədim”.

Samirə müəllim bu uğura özünəgüvənlə çatdığını vurğulayır: “Bəli, özümdən 60 bal gözləyirdim. Bu nəticəni almaq mənim üçün gözlənilməz olmadı. Düşünürəm ki, müəllim daim özünü tanımalı və imtahana nə dərəcədə hazır olduğunu bilməlidir”.

Onun fikrincə, sertifikatlaşdırmanın müəllimlərin inkişafına çox böyük təsiri var. Çünki bu proses müəllimi öyrənməyə sövq edir: “Hər kəs çalışır ki, daha hazırlıqlı olsun. Əslində, bu da ümumilikdə təhsilin keyfiyyətinə müsbət təsir edir”.

“İmtahan yüksək səviyyədə təşkil olunmuşdu”

Samirə müəllimin sertifikatlaşdırma imtahanının təşkilati tərəfləri ilə bağlı fikirləri də müsbətdir: “İmtahan çox rahat keçdi. Hər şey yüksək səviyyədə təşkil olunmuşdu, zalda tam sakitlik hökm sürürdü. Müəllimlərin diqqətini heç nə yayındırmırdı”.

“Hədəfim şagirdlərimizin biologiya üzrə daha yüksək nəticələr əldə etməsidir”

Peşəkar uğurlarla kifayətlənməyən, daim irəliyə baxan Samirə Məsimova gələcək hədəflərindən danışır: “Hədəfim odur ki, işlədiyim liseyin şagirdləri biologiya fənni üzrə yarışlarda, Respublika Fənn Olimpiadası (RFO) və Respublika Fənn Müsabiqəsində (RFM) daha yüksək nəticələr əldə etsinlər. Onların uğuru bizim zəhmətimizin ən gözəl bəhrəsidir”.

“Uşaqlara fənni sevdirməyin sirri – münasibət və qarşılıqlı hörmətdir”

Samirə müəllim deyir ki, uşaqlara fənni sevdirməkdə ən mühüm amil müəllim-şagird münasibətidir: “Əgər arada sevgi, hörmət, anlayış varsa, şagird hər mövzuya maraqla yanaşır. Onlarla dil tapmaq, onların dünyasına daxil olmaq əsasdır”.

Samirə müəllim üçün müəllimlik yalnız bir peşə deyil, vicdan işidir: “Təhsilimizdə vicdanla çalışmaq, şagirdlərin nailiyyət səviyyəsini yüksəltmək bir müəllim kimi əsas məqsədimiz olmalıdır. Şagirdlərimin yüksək nailiyyətləri olub və mən inanıram ki, bu, belə də davam edəcək”.