İsveç hökuməti 2026-cı ilin payızından etibarən bütün məktəblərdə və məktəbdənkənar müəssisələrdə mobil telefon istifadəsini qadağan edəcək. 

“Azərbaycan müəllimi” xəbər verir ki, yeni qaydaya əsasən, şagirdlərin telefonları günün əvvəlində toplanacaq və dərs bitdikdən sonra geri qaytarılacaq.

Qadağa 7-16 yaşlı bütün şagirdlərə şamil ediləcək və məqsəd həm tədris prosesində diqqəti artırmaq, həm də təhlükəsizlik tədbirlərini gücləndirməkdir.

İsveçin yeni təhsil naziri Simona Mohamsson açıqlamasında bildirib ki, bu, son 30 ildə ölkə təhsil sistemində həyata keçiriləcək ən böyük islahat paketinin tərkib hissəsidir. Yeni büdcə layihəsində yalnız telefon qadağasının tətbiqi üçün 2026-cı ilə 95 milyon, 2027-ci ilə isə 100 milyon İsveç kronu ayrılıb.

Hazırda İsveç məktəblərinin əksəriyyətində telefonlar dərs başlayanda toplanır, lakin şagirdlər müxtəlif yollarla bu qadağanı aşmağa çalışırlar. Yeni qərar isə vahid qayda kimi bütün məktəblərdə məcburi olacaq.

Qeyd edək ki, son illər Avropa ölkələri arasında məktəblərdə mobil telefon istifadəsinə məhdudiyyətlər artmaqdadır. Danimarka, Norveç, Niderland və Fransa da artıq oxşar tədbirlər həyata keçiriblər. Tədqiqatlar göstərir ki, telefonların qadağan olunması şagirdlərin dərsə diqqətini artırır və tədris nəticələrinə müsbət təsir göstərir.