Sertifikatlaşdırmanın test imtahanı mərhələsi başa çatıb. Lənkəran-Astara Regional Təhsil İdarəsi üzrə Astara, Lənkəran və Masallıda yerləşən 3 mərkəzdə təşkil olunan imtahanlarda ümumilikdə 1452 təhsilverən iştirak edib. 

“Azərbaycan müəllimi” imtahanın sonuncu günündə region üzrə maksimal bal toplayan Astara rayonu Şağlazüzə kənd tam orta məktəbinin fizika müəllimi Həbib Həbibovun təəssüratlarını öyrənib. 

Sertifikatlaşdırma imtahanında 59 bal toplayan Həbib Həbibov Bakı Dövlət Universitetinin məzunudur. Universiteti bitirəndən doğma kəndindəki məktəbdə fizika müəllimi kimi çalışmağa başlayan müəllim sertifikatlaşdırma prosesinin təhsildə obyektivliyin və müəllim peşəkarlığının artırılmasına yönəldiyini düşünür: “İmtahana keçən ildən, ölkəmizdə sertifikatlaşdırma imtahanları keçirilməyə başlayandan hazırlaşıram. İmtahan tam şəffaf və obyektiv keçirildi. Heç bir narazılığım yoxdur. Uğur qazanan bütün müəllimləri təbrik edirəm”.

İmtahana düşən sualların dərs proqramlarına uyğunluğundan danışan Həbib müəllim bildirib ki, kurikulumun tələblərinə uyğun olaraq hər bir dərsdə analiz, tətbiq və dəyərləndirmə mərhələləri labüddür: “Məhz bu səbəbdən düşünürəm ki, builki imtahanlarda da bu tələblər kifayət qədər nəzərə alınmışdı. Əminliklə deyə bilərəm ki, ixtisasını dərindən bilən hər bir müəllim bu imtahandan keçməyə qadirdir”.

Masallı rayonunun Ərkivan qəsəbəsindəki Əlvan Bağırov adına 4 nömrəli tam orta məktəbin biologiya müəllimi Afaq Əliyeva da sertifikatlaşdırma imtahanında 59 bal toplayanlardan biridir: 

“18 ildir ki, pedaqoji fəaliyyətlə məşğulam. İmtahana yalnız metodikadan iki ay hazırlaşmışam. İxtisasım üzrə isə heç bir xüsusi hazırlıq keçməmişəm. Çünki düşünürəm ki, hər bir müəllim ixtisası ilə bağlı daim öz üzərində çalışmalıdır. Bunu mən həmişə öz atamın timsalında da görmüşəm. İxtisasca stomatoloq olan atam daim öz üzərində çalışır, o, iki dəfə sertifikasiya imtahanında yüksək nəticə əldə edib”.

Nəticənin necə olmasından asılı olmayaraq, müəllimin öz işinə həmişə məsuliyyətlə yanaşmalı olduğunu vurğulayan Afaq Əliyeva imtahan sualları ilə bağlı fikirlərini də bölüşüb:

“Suallar, mənim fikrimcə, asan, orta və çətin səviyyəyə uyğun hazırlanmışdı. Maraqlı suallar idi. Məncə, müəllim daim məsuliyyətli olmalıdır. Hər kəs öz işinin öhdəsindən layiqincə gəlməlidir. Təkcə imtahan, öz mənafeyimiz üçün yox, şagirdlərimizin mənafeyi üçün də dövrün tələblərinə uyğunlaşmalıyıq”.