Salyan rayonu Qaraçala qəsəbə tam orta məktəbində "Məni özün bil!" qrant layihəsi çərçivəsində 6, 7 və 8-ci sinif şagirdləri üçün bullinq və empatiya mövzularında təlimlər keçirilir. 

“Azərbaycan müəllimi” xəbər verir ki, layihənin əsas məqsədi bullinq və insan psixikasında vacib yer tutan empatiya mövzusunda şagirdlərin maarifləndirilməsidir.

Təlimlər təcrübəli mütəxəssis, Bullinq və Gender məsələləri üzrə ekspert Araz Babayev tərəfindən aparılır. O, şagirdlərə bullinqə məruz qaldıqda necə davranmaq, zorakılıq hallarından qorunmaq, zorakılığa məruz qalan insanlara dəstək olmaq və empatiyanın əhəmiyyətini izah edir. Təlimlərdə iştirak edən şagirdlər öz hüquqları, psixoloji müdafiə üsulları və sağlam ünsiyyət bacarıqları barədə məlumatlanırlar.

Layihənin əhatə dairəsinin genişləndirilməsi və davamlılığının təmin edilməsi məqsədilə ətraf zonalardan – Çadırlı kənd ümumi orta ümumtəhsil məktəbi və H. Şahbazov adına Kərimbəyli kənd tam orta ümumtəhsil məktəbinin şagirdləri, psixoloqları və uşaq birliyi rəhbərləri də bu təşəbbüsə qoşulub. Ümumilikdə, layihə çərçivəsində hər qrup üçün 4 təlim olmaqla 40 şagird, 3 məktəb psixoloqu və uşaq birliyi rəhbəri təlimlərdə iştirak edir.

Qeyd edək ki, "Məni özün bil!" qrant layihəsi Salyan rayonu C. Məmmədov adına Qaraçala qəsəbə tam orta məktəbinin təlim-tərbiyə işləri üzrə direktor müavini Güləliyeva Elnarə Ağabək qızı tərəfindən icra olunur. Layihənin eksperti, 3 dəfə qrant müsabiqəsinin qalibi Məmmədli Zeynəb Akif qızıdır.

Bu layihə şagirdlərin psixoloji rifahını gücləndirmək və daha sağlam məktəb mühiti yaratmaq üçün mühüm addımdır. Təlimlərin davamlılığı və digər məktəblərə də yayılması istiqamətində işlər görülməkdədir.