Müəllimlərin işə qəbulu üzrə (MİQ) keçirilən imtahanlar dünyada qəbul olunmuş standartlardan biridir. Azərbaycanda da artıq illərdir ki, həyata keçirilən bu müsabiqə nəticəsində pedaqoji baxımdan şagirdlərə yüksək səviyyəli təhsil verəcək müəlimlər seçilir.

“Azərbaycan müəllimi” MİQ imtahanından uğurla keçərək kənd uşaqlarına bilik verən müəllimlə söhbət edib.

“Bu nəticələr daim öz üzərimdə çalışdığımı, inkişafa davam etdiyimi göstərir” 

Nürəddin Yüzbəyov hazırda Qusar rayonu Kərim Kərimov adına Hil kənd 1 nömrəli tam orta məktəbdə coğrafiya müəllimi işləyir. Pedaqoji fəaliyyətinə 2017-ci ildə Qusar rayonu Cibir kənd tam orta məktəbində başlayıb və artıq 8 ilə yaxındır ki, müəllim kimi şagirdlərinin inkişafı və uğuru üçün çalışır. 

Nürəddin Yüzbəyov məlumat verir ki, 2018-ci ildə keçirilən müəllimlərin işə qəbulu imtahanında iştirak edərək mümkün 60 balın 52.2-sini toplayıb və Cibir kənd tam orta məktəbindən hazırda çalışdığı Hil kənd tam orta məktəbinə yerdəyişmə edib: “Bu nəticəyə nizamlı və planlı şəkildə hazırlaşmaq, fənn biliklərini təkrar etməklə nail olmuşam. MİQ imtahan sualları əsasən fənn bilikləri və metodiki yanaşmalar üzərində qurulmuşdu. Coğrafiya sahəsində hazırlaşan müəllimlər üçün xəritələrlə işləmək, statistik biliklərə sahib olmaq və müasir qlobal prosesləri izləmək çox önəmlidir. Suallar bəzən düşündürücü olsa da, əsas biliklərə yiyələnən namizəd üçün keçilməz deyil”.

Müəllim əlavə edir ki, bu il keçirilən sertifikatlaşdırma imtahanında 57 bal toplayıb. Bununla yanaşı, bu il təkrar verdiyi MİQ imtahanında isə 85 bal nəticə göstərib. “Bu nəticələr mənim müəllim olaraq daim öz üzərimdə çalışdığımı, yeniliklərə açıq olduğumu və inkişafa davam etdiyimi göstərir”. 

“Bu sistem müəllimləri daim  bilikli və məsuliyyətli olmağa təşviq edir” 

Gənc müəllim fəxr hissi ilə vurğulayır ki, fəaliyyəti dövründə qazandığı ən böyük uğurlardan biri şagirdinin əldə etdiyi nəticədir: “10-cu sinif şagirdim Qəhrəman Məlikov bu il Respublika fənn olimpiadasında coğrafiya fənni üzrə I yerə layiq görülüb və qızıl medal qazanıb. Bu, təkcə onun deyil, həm də müəllimi kimi mənim böyük qürur mənbəyimdir”.

Nürəddin Yüzbəyov deyir ki, MİQ imtahanı gənc müəllimlər üçün təkcə bir iş imkanı deyil, həm də özünü tanıtmaq, imkanlarını yoxlamaq və inkişafa yol açan bir platformadır. Bu sistem müəllimləri daim hazır, bilikli və məsuliyyətli olmağa təşviq edir: “MİQ sayəsində mən də daha perspektivli bir məktəbdə çalışma imkanı qazandım və daha geniş bir mühitdə pedaqoji bacarıqlarımı göstərə bildim. Müasir təhsil sistemi üçün özünü inkişaf etdirən, innovativ müəllimlərin seçilməsi vacib şərtlərdəndir. MİQ müsabiqəsi də bu baxımdan yalnız bilikli və bacarıqlı müəllimlərin seçilməsinə şərait yaradır. Müəllimlərə tövsiyəm odur ki, heç vaxt öyrənməkdən çəkinməsinlər, hətta təcrübələri az olsa belə. İstəkli və məqsədyönlü olduqları təqdirdə uğur mütləq gələcək. Səbir, zəhmət və inam bir müəllimi formalaşdıran əsas sütunlardır”.