Sözün sehri ilə yaşayan, ədəbiyyatın ruhunu şagirdlərinə sevdirən müəllimlərimiz çoxdur. Onlardan biri də Astara rayonu Ş.Əliyev adına Rudəkənar kənd ümumi orta məktəbinin Azərbaycan dili və ədəbiyyat müəllimi Firuzə Mirzəyevadır.

“Azərbaycan müəllimi” olaraq həm pedaqoji, həm də bədii yaradıcılığı ilə seçilən bu müəllimlə söhbətləşdik.

Bərdə rayonunda anadan olan Firuzə müəllim ilk müəllimlik addımlarını Astara rayonu Ə.Əliyev adına Qapıçıməhəllə kənd ümumi orta məktəbində atıb.

2018-ci ildən isə bu rayonun Ş.Əliyev adına Rudəkənar kənd ümumi orta məktəbində pedaqoji fəaliyyət göstərir. O, müəllimliyə sevgisinin əsas qaynağının anası olduğunu deyir:

“Anam müəllim olub. Onun peşəsinə necə sevgi ilə yanaşdığını görərək böyümüşəm. Xala, bibi, dayılarım da ali təhsilli olublar. Lap uşaqlıqdan gəlincikləri yığıb onlara dərs keçərdim. Beləliklə, ən çox sevdiyim fənn üzrə – ədəbiyyat sahəsində təhsil almağı seçdim. V-VI siniflərdə Viktor Hüqo, Aleksandr Düma, Lev Tolstoy kimi dünya ədəbiyyatı nümayəndələrinin əsərlərini oxuyurdum. Azərbaycan ədəbiyyatının isə demək olar ki, bütün klassik və çağdaş müəlliflərinin yaradıcılığı ilə tanış idim”.

Firuzə müəllim əvvəl ailəsinin təzyiqi ilə IV ixtisas qrupu üzrə qəbul imtahanına hazırlaşsa da, daxilindəki ədəbiyyat sevgisi üstün gəlib:
“Mən III qrup üzrə imtahan verərək öz istədiyim ixtisas üzrə təhsil aldım. Düşünürəm ki, insan öz arzusunu həyata keçirmək üçün mübariz və prinsipial olmalıdır. Həmişə vicdanlı və dürüst olmağa çalışmışam. Şagirdlərimi heç zaman öz övladımdan ayırmamışam”.

Firuzə Mirzəyeva ədəbiyyat dərslərini daha maraqlı və canlı keçirmək üçün müasir təlim texnologiyalarına üstünlük verir:
“Ədəbiyyat dərsi müasir, fəal və şagirdyönümlü olmalıdır. Dərs zamanı bütün şagirdlər prosesə cəlb olunmalıdır. Əsərlərin səhnələşdirilməsi, rollu oyunlar, simulyasiya, proqnozlaşdırma, “Mən kiməm?” kimi oyunlar vasitəsilə şagirdlərin tədqiqatçılıq və yaradıcı təfəkkürünü inkişaf etdirirəm”.

Onun fikrincə, müəllimlik yalnız bilik verməklə bitmir, eyni zamanda sevgi aşılamaq, dəstək olmaq və motivasiya yaratmaq deməkdir:
“Uşaqlara sevgi aşılamaq lazımdır. Onlara uğura gedən yolun iştirakçısı olduqlarını hiss etdirməliyik. Hər zaman onların əlindən tutmalı, yıxıldıqda qalxmağı öyrətməliyik”.

Yeni təhsil proqramları – yaradıcı müəllimlər üçün geniş imkanlar

“Bugünkü müəllim yaradıcı olmalı, daim yenilikləri izləməli və şagirdləri kəşf etməyə təşviq etməlidir. Yeni proqramlar intellektual potensialı formalaşdırır, milli-mənəvi dəyərləri qoruyur. Bu proqramlardan düzgün istifadə edərək, düşünmə qabiliyyətinə malik, vətənə layiqli vətəndaşlar yetişdirmək mümkündür”,- deyir Firuzə Mirzəyeva.

“Şagirdlərimin arasında şeir və hekayə yazanlar var”

Firuzə Mirzəyevanın özü də şeir və hekayə yazır:

“Orta məktəb illərindən yazmağa başlamışam. Bu, şagirdlərimə də təsir edib. Bəziləri utanaraq şeirlərini mənimlə bölüşsə də, sonradan inamla paylaşmağa başladılar. Bəlkə də onların arasından gələcəyin Nizamiləri, Füzuliləri yetişəcək”.

Müəllim yaradıcı nümunələrini dərsdə istifadə etməklə öyrənməni daha maraqlı edir:

“Ana dili və ədəbiyyat dərslərində real həyat hadisələrinə əsaslanan kiçik hekayələrdən istifadə edirəm. Bu, şagirdlərin diqqətini daha çox cəlb edir. Krossvord, söz oyunları və digər aktiv üsullarla dərsləri canlandırıram”.

Bədii təfəkkür – uşaqların daxili dünyasını açan açar

“Bədii təfəkkür və rabitəli nitqin inkişafı üçün ən təsirli metodlardan biri hekayə qurmaq və nəql etmə üsuludur. Ədəbiyyat gecələri, yazıçılarla görüşlər, kitabxana ilə əlaqə, bədii əsərlərin təhlili uşaqlarda maraq oyadır”.

Müəllim belə hesab edir ki, ədəbiyyat incə ruh, ülvi hisslərdir. Əgər uşaq ədəbiyyatı sevərsə, onların arasında zorakılıq və intihar hallarının da qarşısı alınar: “Əsərlər vasitəsilə vətən sevgisi, fədakarlıq kimi dəyərlər şagirdlərə aşılanır. Ədəbiyyat cəmiyyət üçün şəxsiyyət formalaşdırır. Bu şəxsiyyət vətənə və insanlığa faydalı bir fərd kimi yetişir”.

“Uğur qazanan qız şagirdlərimin sayı oğlanlardan çoxdur”

Firuzə müəllim qızların təhsilə cəlb olunması üçün də xüsusi fəallıq göstərir:

“İlk fəaliyyət illərimdə qızların təhsildən geri qalması problemi ilə qarşılaşdım. Bu sahədə çox çalışdım. Bu gün qürurla deyə bilərəm ki, uğur qazanan qız şagirdlərimin sayı oğlanlardan çoxdur. Onların səsi ali məktəblərdən, peşə məktəblərindən, Respublika fənn olimpiadalarının final mərhələsindən gəlir”.

O, “Peşə təmayüllü siniflər” layihəsində də fəal iştirak edib. Qızların aşpazlıq, dərzilik, eləcə də idman sahələrində uğurlar qazandığını böyük qürurla qeyd edir.

“Müəllim hər zaman örnək olmalıdır”

“Müəllim nümunəvi obraz olmalıdır. Şagirdlər bizləri özlərinə örnək kimi görür. Ona görə müəllim yüksək mənəvi dəyərlərə sahib olmalı, həm şəxsi həyatında, həm də peşəsində tərbiyəli, dürüst, sevgi dolu bir insan kimi çıxış etməlidir. Mən bütün müəllimlərə arzu edirəm ki, təkcə dərs deyil, şəxsiyyətləri ilə də örnək olsunlar”.