“Konstitusiya və Suverenlik İli” tədbirləri çərçivəsində Naxçıvanda təhsil işçiləri üçün “Antikorrupsiya davranış modelinin formalaşdırılması” mövzusunda təlim keçirilib. 

“Azərbaycan müəllimi” xəbər verir ki, təlim “Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı” çərçivəsində Baş Prokurorluğun Elm-Tədris Mərkəzi və Elm və Təhsil Nazirliyi tərəfindən keçirilib.  

Təlimdə qonaqları salamlayan Naxçıvan Muxtar Respublikasının təhsil nazirinin müavini Əli Vəliyev təlimin əhəmiyyətindən danışıb, korrupsiya hallarına qarşı mübarizənin və bu sahədə maarifləndirmənin prioritet fəaliyyət istiqamətlərindən biri olduğunu vurğulayıb. O, birgə təlimlərin dövlət qurumlarının əməkdaşlarının peşəkarlığına mühüm töhfə verəcəyini bildirib.

Təlimdə Baş Prokurorluğun Elm-Tədris Mərkəzi, Baş Prokuror yanında Korrupsiyaya qarşı Mübarizə Baş İdarəsi, Naxçıvan Muxtar Respublikası Prokurorluğu, eləcə də Elm və Təhsil Nazirliyinin Daxili nəzarət şöbəsi və Naxçıvan Təhsil Nazirliyinin əməkdaşları tərəfindən “Konstitusiya və Suverenlik İli Azərbaycan dövlətçilik tarixində yeni mərhələ”, “Təhsil sahəsində korrupsiya hüquqpozmalarına qarşı qabaqlayıcı tədbirlərin əhəmiyyəti”, “Korrupsiyanın mahiyyəti və onun cəmiyyətə təsiri, ona qarşı mübarizənin zəruriliyi”, “Korrupsiyaya qarşı mübarizə sahəsində preventiv tədbirlərin nəticəsi” və digər mövzular üzrə çıxışlar edilib. Təlim çərçivəsində Baş Prokurorluğun Elm-Tədris Mərkəzinin Prokurorluq işçilərinin fəaliyyətinin qiymətləndirilməsi və peşə hazırlığının təşkili şöbəsinin rəisi Nigar Qələndərli “Antikorrupsiya davranış modelinin formalaşdırılması” mövzusunda keçirilən təlimin məqsədi, təhsil işçilərində antikorrupsiya davranış modelinin formalaşdırılması ilə bağlı işlərin gücləndirilməsi, işçilərin peşə hazırlığının artırılması, təcrübədə rast gəlinən problem və çətinliklərin qarşısının alınması barəsində geniş məlumat verib. Daha sonra Baş Prokuror yanında Korrupsiyaya qarşı Mübarizə Baş İdarəsinin böyük prokuroru Ziya Hacıyev, Mütəxəssis təhlilləri şöbəsinin rəis müavini Kamil Kamilli, Təşkilati və informasiya təminatı idarəsinin prokuroru İlkin Babazadə və Naxçıvan Muxtar Respublikası Prokurorluğunun Hüquq təminatı və insan hüquqları məsələləri şöbəsinin rəisi Faiq Səfərov təhsil sahəsində korrupsiyanın mahiyyəti, onun cəmiyyətə təsiri, ona qarşı mübarizənin zəruriliyi, ölkəmizdə korrupsiyaya qarşı mübarizə sahəsində həyata keçirilən kompleks və ardıcıl islahatlar, korrupsiya hüquqpozmaları, buna şərait yaradan amillər və qabaqlayıcı tədbirlərin əhəmiyyəti barədə çıxış ediblər.

Qeyd edək ki, təlimin məqsədi təhsil işçilərində antikorrupsiya davranış modelinin formalaşdırılması ilə bağlı işlərin gücləndirilməsi, işçilərin peşə hazırlığının artırılması, təcrübədə rast gələn problem və çətinliklərin qarşısının alınmasıdır. 

Çıxışlardan sonra qarşılıqlı fikir mübadiləsi aparılıb və təhsil işçilərini maraqlandıran suallar cavablandırılıb.