“Bu gün ölkədə Böyük Qayıdış proqramı həyata keçirilir, ölkənin təxminən beşdə biri yenidən qurulur. Bu, gənclərə həm təhsil, həm də iş baxımından böyük imkanlar açır”.

“Azərbaycan müəllimi” xəbər verir ki, bunu elm və təhsil naziri Emin Əmruallayev Hacıqabul rayonu V. Məmmədov adına Muğan qəsəbə tam orta məktəbin “Son zəng” tədbirində çıxış edərkən deyib.

Nazir qeyd edib ki, Məzun Günündə çox insanlara təbrik və təşəkkür düşür: “Bu gün valideynlər öz övladlarından bəlkə daha həyəcanlıdırlar. Onlara bu illər ərzində bu gün son dəfə uşaq, daha sonra gənc deyəcəyimiz insanların inkişafında payı olan insanlar kimi təşəkkür edirəm. Təbii ki, hər bir insanın yetişməsində valideynlərlə yanaşı, müəllimlərinin də böyük rolu var. Ona görə müəllimləri təbrik etmək istəyirəm. Məzunlar onların əməyinin və zəhmətinin nəticəsidir. Hər bir müəllim öz məzunlarının nəticələri ilə qürur duyur”.

Emin Əmrullayev əlavə edib ki, hər bir müəllimin, təhsil sisteminin işinin nəticəsi onun məzunlarının həyatlarının növbəti mərhələsində gördükləri işlərdir: “Hər birinizə uğurlar arzulayıram. Kiminsə ali təhsil almaq şansı digərinizdən bəlkə daha çoxdur, kimsə daha uğurlu nəticə göstərəcək, kiminsə nəticəsi bir qədər aşağı olacaq. Amma hamınızın bərabər bir imkanı var, bu da yaxşı vətəndaş, dürüst insan olmaqdır. Bu baxımdan hər birinizə Azərbaycan üçün faydalı vətəndaş olmağı arzulayıram. Ölkə səviyyəsində, ölkə səviyyəsində olmasa da, doğulduğunuz, yaşadığınız yerdə öz yaxınlarınız, ətrafınız üçün faydalı insan olmağı arzu edirəm. Biz istərdik ki, bundan sonra sizin gördüyünüz yaxşı işlərin sədasını daha çox eşidək, təhsildən öyrəndiklərinizi bu vətənə, bu cəmiyyətə qaytara biləsiniz”.