Təhsildə Keyfiyyət Təminatı Agentliyinin təşkilatçılığı ilə Naxçıvan Dövlət Universitetində “Keyfiyyətli təhsil – Müasir çağırışlar” mövzusunda forum keçirilib. 

Universitetdən “Azərbaycan müəllimi”nə bildirilib ki, forumda TKTA-nın İdarə Heyətinin sədri Tural Əhmədov, Agentliyin struktur bölmə rəhbərləri və əməkdaşları, həmçinin Naxçıvan Dövlət Universitetinin 300 nəfərdən artıq akademik və inzibati heyəti, media nümayəndələri iştirak edib.

Forumun məqsədi regionlarda yerləşən ali təhsil müəssisələrinə keyfiyyət təminatına dair faydalı məlumatların verilməsi, daxili keyfiyyət təminatı sisteminin formalaşmasına, eləcə də müəssisələrdə keyfiyyət təminatı strukturunun işinin səmərəli təşkilinə və tədrisin tələbəyönümlü prinsiplər əsasında qurulmasına dəstək olmaqdır.

Naxçıvan Dövlət Universitetinin rektoru Elbrus İsayev təhsildə keyfiyyətin təmin olunmasının əhəmiyyətini vurğulayıb.

Qeyd olunub ki, elmi potensialın gücləndirilməsi və əmək bazarına uyğun kadr hazırlığı universitetin əsas prioritetlərindəndir.  Rektor həmçinin qeyd edib ki, bu il universitetdə keçirilən karyera sərgisi çərçivəsində 2000-dən artıq vakansiya elan olunub və məzunların işlə təmin olunmasında ciddi nailiyyətlər əldə edilib. 

Təhsildə Keyfiyyət Təminatı Agentliyinin İdarə Heyətinin sədri Tural Əhmədov tədbir iştirakçılarına ali təhsil sisteminin müasir çağırışları ilə bağlı vacib məqamları diqqətə çatdırıb. Qeyd olunub ki, təhsil sisteminin inkişafı üçün müasir dövrün tələblərinə uyğun islahatlar aparılması zəruridir. 

Təhsildə Keyfiyyət Təminatı Agentliyinin İdarə Heyətinin Akkreditasiya və lisenziya şöbəsinin müdiri Samir Quliyev “Akkreditasiya prosesinin konseptual müzakirələri”, Təlim və metodologiya şöbəsinin müdiri Elçin Cəfərov “Təhsildə müasir çağırışlar”, Kvalifikasiyaların tanınması şöbəsinin müdiri Elnur Xəlilov “Kvalifikasiyaların tanınması necə həyata keçirilir?” mövzularında çıxış ediblər.

Tədbirin ikinci hissəsində Təhsildə Keyfiyyət Təminatı Agentliyininin əməkdaşları tərəfindən “Tələbəyönümlü yanaşma və effektiv təlim nəticələri” və “Məlumatəsaslı qərarvermə yolu ilə ATM-də keyfiyyət mədəniyyətinin formalaşdırılması” mövzularında praktiki təlimlər təşkil edilib.