Ölkə başçısının “Azərbaycan Respublikası Elm və Təhsil Nazirliyinin tabeliyindəki elmi müəssisələrin fəaliyyətinin optimallaşdırılması və səmərəliliyinin artırılması ilə bağlı əlavə tədbirlər haqqında” müvafiq sərəncamına əsasən, bir sıra elmi-tədqiqat institutları struktur baxımından optimallaşdırılır. Sərəncamda bəzi elmi müəssisələrin bazasında yeni institutların yaradılması, 3 istehsalat birliyinin ləğvi nəzərdə tutulur. Birləşdirilən elmi müəssisələrin əsasında bir neçə publik hüquqi şəxs yaradılacaq.

Milli Məclisin Elm və təhsil komitəsinin üzvü Tamam Cəfərova “Azərbaycan müəllimi”nə bildirib ki, elm sahəsində aparılan struktur islahatları zaman-zaman öz effektini verib. Bütün dünyada elm təşkilatları zamanın tələbinə uyğun rasionallaşdırılır. 

Azərbaycan Milli Elmlər Akademiyasının bəzi institutlarının bir müddət əvvəl Elm və Təhsil Nazirliyinin, daha sonra bəzi elmi müəssisələrin universitetlərin tabeliyinə verilməsi ali məktəb və tədqiqat müəssisələri arasında elmi inteqrasiyanın güclənməsinə təkan  verib: 

“Məsələn, son 5 ildə "Scopus" və "Web of Science" bazalarında indeksləşən məqalələrin əhəmiyyətli qismi məhz ölkəmizin elmi müəssisələrin alimlərinin tədqiqatlarının nəticələridir”.

T.Cəfərova qeyd edib ki, Riyaziyyat və Mexanika, Fizika, Kimya Problemləri, Tarix və Arxeologiya institutları elmi ənənələri ilə seçiliblər: 

“Prezident İlham Əliyevin ETN-nin tabeliyindəki elmi müəsissələrin fəaliyyətinin optimallaşdırılması və səmərəliliyin artırılması ilə bağlı sərəncamı elmin gələcək inkişafına hesablanıb. İslahat xarakteri daşıyan sərəncam çərçivəsində əməkdaşların sosial rifahı, həyat səviyyəsi və elmi yaradıcılığı üçün daha yaxşı şəraitin yaradılması əsas prioritetlərdəndir. Düşünürəm ki, institutların birləşdirilməsi elmi tədqiqatlara yeni nəfəs verəcək. Alimlərimiz arasında əməkdaşlığı dərinləşdirəcək. Onların tədqiqatlarının sinergetik mahiyyətini dəyişəcək. İnstitutların səmərəliliyi artdıqca gənc tədqiqatçılar üçün yeni imkanlar yaranacaq, Azərbaycan elminin beynəlxalq aləmdə nüfuzu daha da artacaq. Bunlar hər birimizin istəyidir”.