Dağlıq Şirvan Regional Təhsil İdarəsi və Şamaxı Rayon İcra Hakimiyyətinin birgə təşkilatçılığı, Ailə, Qadın və Uşaq Problemləri üzrə Dövlət Komitəsinin yanında yaradılan Uşaq Səfirlər Məclisinin Şamaxı rayon nümayəndələrinin təşəbbüsü ilə Şamaxı Şəhər Stadionunun konfrans zalında “Yol hərəkəti qaydalarının öyrənilməsi” mövzusunda maarifləndirici görüş keçirilib.

“Azərbaycan müəllimi” xəbər verir ki, tədbirdə Dövlət Yol Polis bölməsinin baş inspektoru da iştirak edib.

Uşaq Səfirlər Məclisinin rayon üzrə nümayəndələri – Qızmeydan kənd tam orta məktəbin şagirdi Fuad Mərdanlı və Şamaxı şəhər 9 saylı tam orta məktəbin şagirdi Aytən Ədilova çıxış edərək bu cür tədbirlərin şagirdlərin maarifləndirilməsi və yollarda təhlükəsiz davranış vərdişlərinin formalaşdırılması baxımından əhəmiyyətli olduğunu vurğulayıblar.

Dövlət Yol Polis bölməsinin baş inspektoru Vahid Zərbəliyev şagirdlərə “Yol hərəkəti haqqında” qanun, yol nişanları və hərəkət qaydaları barədə geniş məlumat verib, yol hərəkəti qaydalarının öyrənilməsinin həyat və sağlamlıq üçün vacibliyini diqqətə çatdırıb.

Tədbir zamanı mövzu ətrafında geniş müzakirələr aparılıb və şagirdləri maraqlandıran suallar cavablandırılıb.

Maarifləndirici görüşün sonunda iştirakçılara maarifləndirici bukletlər təqdim olunub, onlara yol hərəkəti qaydalarına daim əməl etməyin vacibliyi bir daha xatırladılıb. Tədbir iştirakçıları belə təşəbbüslərin davamlı olmasının arzuolunan olduğunu bildiriblər.