Ölkə üzrə keçirilən müəllimlərin sertifikatlaşdırma imtahanları artıq başa çatmaq üzrədir. Coğrafiya fənni üzrə keçirilən imtahanda Lənkəran–Astara Regional Təhsil İdarəsinin tabeliyində olan ümumtəhsil müəssisələrinin müəllimləri arasında Cəlilabad və Masallı rayonunun iki müəllimi – Azad Mustafayev və Leyla Rəhimli də fərqlənərək nümunəvi nəticə göstəriblər. 

"Azərbaycan müəllimi" onlardan bu prosesin mahiyyəti, imtahan təcrübəsi barədə fikirlərini öyrənib.

"İmtahana özüm hazırlaşdım"

Masallı şəhəri Nəriman Nərimanov adına 2 nömrəli tam orta məktəbin müəllimi Azad Mustafayev bu il keçirilən sertifikatlaşdırma imtahanında maksimal – 60 bal toplayaraq uğurlu nəticəyə imza atıb. O, pedaqoji fəaliyyətə 2012-2013-cü tədris ilində Cəlilabad rayon Kazımabad kənd tam orta məktəbində başlayıb. 2020-2021-ci tədris ilində müəllimlərin iş yerinin dəyişdirilməsi müsabiqəsində uğur qazanaraq Masallı şəhəri 2 nömrəli tam orta məktəbində fəaliyyətini davam etdirib. 2024-cü ildə keçirilən müəllimlərin işə qəbul müsabiqəsində 83.25 bal toplayaraq Masallı rayon M.Hacıyev adına Ərəb kənd ümumi orta məktəbinə də qəbul olunub və hazırda iki məktəbdə pedaqoji fəaliyyətini davam etdirir.

Azad müəllim sertifikatlaşdırma imtahanı barədə fikirlərini bizimlə bölüşdü: “İmtahan çox yaxşı keçdi. Suallardan razı qaldım. Hər səviyyəyə uyğun suallar var idi. İmtahana tam müstəqil şəkildə özüm hazırlaşdım və düşünürəm ki, məsuliyyətli olan, öz üzərində ciddi şəkildə çalışan hər bir müəllim bu uğuru əldə edə bilər”.  

Onun fikrincə, sertifikatlaşdırma imtahanları müəllimlərin peşəkar inkişafına mühüm təsir edir: “Bu imtahanların hər zaman tərəfdarı olmuşam. Çünki bu proses müəllimlərə maddi dəstək olmaqla yanaşı, onların öz bilik səviyyələrini də qiymətləndirməyə imkan verir. Sertifikatlaşdırma müəllimə zəif və güclü tərəflərini görməyi, öz üzərində işləməyi öyrədir. Bu baxımdan çox faydalı bir layihədir”. 

Gənc müəllimdən səmimi təəssüratlar... 

Cəlilabad rayonunun Ocaqlı kənd Ş.Nəzərov adına 1 nömrəli tam orta məktəbində 2021-ci ildən fəaliyyət göstərən gənc müəllim Leyla Rəhimli də sertifikatlaşdırma imtahanında 59 bal toplayıb. Leyla müəllim öz təəssüratlarını bizimlə bölüşüb: “İmtahan mənim üçün çox rahat keçsə də, hazırlıq prosesi olduqca stresli idi. Hazırlıq zamanı əsas diqqəti sinif dərsliklərinə verdim. Bununla yanaşı, Təhsil İnstitutu tərəfindən keçirilən sınaq imtahanının istiqamətləndirici və faydalı olduğunu düşünürəm".

 Leyla müəllim hesab edir ki, sertifikatlaşdırma prosesi müəllimlərin daim yenilənən təhsil tələbləri ilə ayaqlaşması üçün vacib fürsətdir:

“Sertifikatlaşdırmanın müəllimlərin bilik və bacarıqlarının daha da artmasına geniş imkanlar yaratdığını düşünürəm. Müəllimlər təbii olaraq daim dəyişən cəmiyyət və dünya tələbləri ilə ayaqlaşdıqlarını bu imtahan vasitəsilə sübut edirlər". 

Bir neçə gündür davam edən sertifikatlaşdırma imtahanları göstərir ki, Azərbaycan müəllimi müasir dövrün tələblərinə cavab vermək üçün davamlı olaraq öz üzərində çalışan, bilik və bacarıqlarını artırmağa hazırdır. Gənc və təcrübəli müəllimlərin bu prosesdə fəal və uğurlu iştirakı isə təhsilin keyfiyyətinə verilən ümumi dəyərin göstəricisidir.