Ölkəmizin ümumi təhsil müəssisələrində cari tədris ilinin sonuna yaxınlaşırıq. İstər məktəb rəhbərliyi, müəllimlər, şagirdlər, istərsə də ailələr üçün bu günlər böyük intizar və səbirsizliklə gözlənilir. Ümumtəhsil müəssisələri ənənəvi olaraq tədris ilinə “Son zəng” tədbiri ilə yekun vurur. Zəngin “sonuncu” olması simvolik olduğu kimi, bu tədbirin özünün də simvolik olması diqqətdən qaçırılmamalıdr: “Son zəng” təkcə tədris ilinə yekun vurmaq anlamı daşımır, həm də istər müəllimlər, istər məzunlar, istərsə də bu günü narahatlıq və sevinclə qarşılayan, övladların gələcək həyata ilk addımlarına şahidlik edən valideynlər üçün də bir hesabat mərhələsidir. Hesabatı düzgün vermək lazımdır ki, növbəti prioritetlər daha aydın, ona çatmaq yolları daha rəvan olsun…

Bu mənada məktəblərdə keçirilən "Son zəng" tədbiri şagirdlərin məktəb həyatındakı vacib bir mərhələnin – orta təhsilin başa çatmasının rəsmi və simvolik qeydi kimi qiymətləndirilməlidir.

"Son zəng" məktəbdən, müəllimlərdən və şagirdlik həyatından rəsmi ayrılıq mərasimidir. Bu, eyni zamanda yeni bir mərhələyə – ali təhsilə, əmək fəaliyyətinə və ya digər həyat yollarına keçidin simvoludur. Tədbir zamanı şagirdlər müəllimlərinə, valideynlərinə və məktəb kollektivinə təşəkkür edir, onlara minnətdarlıqlarını bildirirlər. Məktəb rəhbərliyi və qonaqlar çıxış edərək şagirdlərə gələcək həyatlarında uğurlar arzulayır, onları motivasiya edirlər.

“Son zəng” məktəb ictimaiyyətində ortaq yaddaş və ənənələrin formalaşmasına xidmət edir, şagirdlər arasında birlik və kollektiv yaddaşın güclənməsinə səbəb olur. 

Tədbirin əsas simvollarından biri son zəngin səsləndirilməsidir. Bu zəng təhsilin bir pilləsinin tamamlanmasını və yenisinə keçidi təmsil edir.

Qısacası, "Son zəng" tədbiri təhsil həyatının mühüm bir dövrünün bağlanması, cəmiyyətə inteqrasiyanın başlanması və emosional, yaddaqalan bir xatirənin yaradılmasıdır. Bu baxımdan təhsil prosesinin bütün iştirakçılarını – məktəbi, müəllimləri, şagirdləri və ailələri - bu günü daha yaddaqalan, məzmunlu, hər hansı izafi tədbirlərdən, lüzumsuz tədarüklərdən kənar şəkildə təşkil etməyi arzu edirik.

Məktəb həyatı hər bir məzunun onbirillik tədris dövründə qazandığı biliklərin, əldə etdiyi səriştə və bacarıqların, nümunəvi vətəndaşlıq davaranışlarının, gözəl mənəvi  keyfiyyətlərin aşılandığı mühitdir. Bu mühiti toyxana mərasimləri kimi bəzəmək, şoulara yer verməklə əyləncəyə çevirmək və bunun üçün lüzumsuz maddi israflara yol vermək qəti yolverilməzdir.

Məzunların gələcək yolunu “Son zəng” tədbirini bəzəyən xarici effektlər deyil, cəmiyyətdə tanınan, hamının hörmət etdiyi şəxsiyyətlərin ürək sözləri, ağsaqqal xeyir-duası, nəsihəti, alim tövsiyəsi işıqlandıracaq.