Ali təhsildə keyfiyyət təminatı ölkənin davamlı inkişafı üçün strateji əhəmiyyət kəsb edir. Bu məqsədlə aparılan institusional və proqram akkreditasiyası ali təhsil müəssisələrinin fəaliyyətini dövlət standartlarına uyğun qiymətləndirməklə yanaşı, onların güclü və zəif tərəflərini də üzə çıxarır, inkişaf üçün tövsiyələr təqdim edir.

Təhsildə Keyfiyyət Təminatı Agentliyi “Azərbaycan müəllimi”nin sorğusuna cavabında bildirib ki, ali təhsil müəssisələrində şəffaflığın, hesabatlılığın və daxili keyfiyyət təminatı mexanizmlərinin yaradılması vacibdir. Akkreditasiya isə xarici qiymətləndirmə vasitəsi kimi bu prosesin davamlılığını təmin edir.
Son illərdə keçirilən akkreditasiyalar göstərib ki, bir çox universitetlərdə ortaq çağırışlar mövcuddur:

• Tədris planlarının hazırlanmasında maraqlı tərəflərin iştirakının zəifliyi,
• Bir çox ixtisaslarda seçmə fənlərin azlığı və tələbələrə seçim imkanının məhdudluğu,
• Əks-əlaqə sistemlərinin işlək olmaması,
• Tələbəyönümlü tədris metodlarının tam tətbiq edilməməsi,
• Keyfiyyətyönümlü idarəetmə sistemlərinin yetərincə inkişaf etməməsi,
• Akademik heyətin elmi-tədqiqat fəaliyyətinin zəifliyi və nəticələrin dərs prosesinə inteqrasiyasının məhdudluğu,
• Daxili keyfiyyət təminatı sistemlərinin formal xarakter daşıması.

TKTA-nın rəyinə görə, bu istiqamətlərdə təkmilləşdirmələr zəruridir. Akkreditasiya prosesinin sonunda təqdim edilən tövsiyələr əsasında artıq bir sıra universitetlərdə seçmə fənlərin sayı artırılıb, tələbələrin seçim azadlığı genişləndirilib, daxili keyfiyyət təminatı üzrə ayrıca strukturlar yaradılıb.
Nəticələr göstərir ki, akkreditasiya sadəcə “yoxlama” mexanizmi deyil, həm də ali təhsil müəssisələrinin inkişafına yönəlmiş bir qiymətləndirmədir. Bu yanaşma ilə akkreditasiya təhsildə güvənin təminatı və keyfiyyətin yüksəldilməsi üçün mühüm vasitəyə çevrilir.