“QS 2026 dünyanın ən yaxşı universitetlərinin reytinqi”ndə 9 universitetimizin yer alması qürurverici haldır.

Bunu "Azərbaycan müəllimi"nə açıqlamasında Azərbaycan Dövlət İqtisad Universitetinin (UNEC) Beynəlxalq əlaqələr və proqramlar üzrə prorektoru iqtisad üzrə fəlsəfə doktoru Hüseyn Həsənov deyib.

O söyləyib ki, ölkə tarixində ilk dəfə olaraq “QS 2026 dünyanın ən yaxşı universitetlərinin reytinqi”ndə 9 universitetimizin yer alması, onlardan altısının ilk dəfə bu nüfuzlu reytinqə daxil olması ölkəmizin yalnız ali təhsil sahəsində deyil, bütövlükdə elmi və akademik nüfuzunun beynəlxalq müstəvidə gücləndiyini nümayiş etdirir:

“Xüsusilə Azərbaycan Dövlət İqtisad Universitetinin 2025-ci ilin iyun ayında açıqlanan “QS World University Rankings 2026” və “THE Impact Rankings 2025” nəticələrinə əsasən, mühüm uğurlara imza atmasının sevindirici hal olmasını qeyd etmək istərdim. Universitetimizin hər iki reytinq üzrə göstərdiyi nəticələr UNEC-in strateji inkişaf istiqamətində atdığı məqsədyönlü addımların və beynəlmiləlləşmə siyasətinin effektivliyini göstərir. 

Təsadüfi deyil ki, bu il UNEC həmçinin “QS Stars” akkreditasiyası üzrə 9 nominasiyadan 7-sindən 5, 2-sindən isə 4 ulduz alaraq beynəlxalq mövqeyini daha da gücləndirmişdir. 

UNEC bu il “QS 2026 dünya universitetlərinin reytinqi”ndə 801–850 aralığında qərarlaşaraq universitet tarixində mühüm bir mərhələni geridə qoydu. Ötən il adıçəkilən reytinqdə 1001–1200 aralığında yer alan UNEC bu nəticə ilə ölkə üzrə ikinci ən yüksək göstəriciyə sahib olub. Bu ali təhsil müəssisəmizin qlobal elm və təhsil məkanında mövqeyinin əhəmiyyətli dərəcədə gücləndiyini göstərir”.

Prorektorun sözlərinə görə, Azərbaycanın ali təhsil müəssisələrinin beynəlxalq reytinqlərdə yüksək templə inkişafı ölkəmizin ali təhsil tarixində əlamətdar hadisə olmaqla, keyfiyyət qiymətləndirilməsi prosesində beynəlxalq standartlara cavab verən inkişaf göstəricilərinin tətbiqindən xəbər verir. 

Hüseyn Həsənov qeyd edib ki, Azərbaycanın ali təhsil sistemində son illərdə həyata keçirilən islahatlar artıq ciddi nəticələr verməyə başlayıb. İxtisaslı müəllim heyətinin artırılması, beynəlxalq əməkdaşlıqların genişləndirilməsi, innovativ tədris metodlarının tətbiqi və xarici tələbələrin cəlbi bu nailiyyətlərin əsasını təşkil edir: “Universitetlərimizin beynəlxalq  reytinqə daxil olması yalnız statistik göstəricilər deyil, həm də gələcək üçün bir çağırışdır: daha yüksək hədəflər üçün davamlılıq və keyfiyyət əsas prioritet olmalıdır”.