Elm və Ali Təhsil üzrə Dövlət Agentliyinin müvafiq əmrlərinə əsasən, Azərbaycan Dövlət İqtisad Universitetinin nəzdində Sosial-İqtisadi Kollecin direktoru vəzifəsinə təyin olunan Mübariz Hacıbəyov və Azərbaycan Dövlət Pedaqoji Universitetinin nəzdində Azərbaycan Dövlət Pedaqoji Kollecin direktoru vəzifəsinə təyin olunan Amalya Sezgin kollektivə təqdim ediliblər.

Agentlikdən “Azərbaycan müəllimi”nə bildirilib ki, təqdimat görüşlərində Elm və Ali Təhsil üzrə Dövlət Agentliyinin məsul şəxsləri iştirak ediblər. Görüşlər zamanı yeni təyinatların kolleclərdə kadr islahatının vacib mərhələsi olduğu, təhsil müəssisələrində müasir yanaşmaların və strateji idarəetmə mexanizmlərinin əhəmiyyəti vurğulanıb.

Qeyd edək ki, Mübariz Hacıbəyov ali təhsilini Bakı Dövlət Universitetində başa vurub. 2017-ci ildə isə riyaziyyat elmləri doktoru elmi dərəcəsini alıb. O, Elm və Ali Təhsil üzrə Dövlət Agentliyində şöbə müdiri vəzifəsinədək Elm və Təhsil Nazirliyinin tabeliyində olan Riyaziyyat və Mexanika İnstitutunda çalışıb və Milli Aviasiya Akademiyasında Ali riyaziyyat kafedrasının professoru vəzifəsini icra edib.

Amalya Sezgin bakalavriat təhsilini Azərbaycan Dillər Universitetində, magistratura təhsilini isə ABŞ-nin Corc Vaşinqton Universitetində tamamlayıb. Daha sonra Vaşinqton Universiteti və Azərbaycan Dövlət Pedaqoji Universitetinin birgə həyata keçirdiyi ikili diplom proqramı üzrə ikinci magistratura təhsilini alıb. 2023-cü ildən Azərbaycan Memarlıq və İnşaat Universitetində baş müəllim kimi fəaliyyət göstərir. Hazırda Bakı Slavyan Universitetində doktorantura təhsilini davam etdirir.