Yeni dərs ilinə hazırlıqla əlaqədar paytaxtın Nəsimi rayonunda yerləşən Texniki humanitar liseydə cari təmir işləri yüksək səviyyədə aparılıb. Belə ki, liseyin bütün sinif otaqları, dəhlizləri təmir olunub, pəncərə və qapıların  qırılmış,  sıradan çıxmış şüşə və avadanlıqları yeniləri ilə  əvəz olunub. Sanitar qovşaqlarının sıradan çıxmış su xətləri dəyişdirilib,  sınmış partalar təzələnib, binanın çöl hissəsinin fasadı rənglənib. Liseyin həyətində abadlıq və ağartma  işləri aparılıb.

Təhsil ocağının uğurlarına gəldikdə ötən il liseyin 79 məzunu olub. Onlardan 3-ü Türkiyənin müxtəlif nüfuzlu universitetlərinə qəbul olub. 76-sı isə ölkəmizin ali məktəblərinə sənəd verib, 69 nəfəri tələbə adını qazınıb. 8  nəfər 600-dən yuxarı, 21 nəfər isə 500-dən çox bal toplayıb.

Bakıdakı 225 nömrəli məktəbin kollektivi üçün yeni dərs ili ikiqat bayrama çevrilib. Bu il təhsil ocağı ölkə başçısının sərəncamı ilə "Ən yaxşı umumtəhsil  məktəbi" müsabiqəsinin qalibləri sırasına düşüb. Bununla yanaşı, respublikada yapon dilinin ilk tədris edildiyi təhsil ocağı da  bu məktəbdir. Yeni dərs ilinə hazırlıqla bağlı təhsil ocağında cari təmir işləri yüksək səviyyədə aparılıb.  Məktəbin bütün sinif otaqları, dəhlizləri, laboratoriyaları, kitabxana cari təmir olunub, yararsız elektrik xətləri və avadanlıqları yenilənib. Məktəbin sanitar qovşağında və istilik  sistemində  olan  zədələnmiş borular təmir  olunub.  Həyətdə  abadlıq  və  ağartma işləri aparılıb.  Məktəb yeni dərs ilinə hazırdır.  

R.ZİYADOV