İyunun
26-da 7 nömrəli Bakı Peşə Liseyində ölkəmizdə
fəaliyyət göstərən İlk peşə-ixtisas təhsili
müəssisə rəhbərlərinin ümumi yığıncağı
keçirildi. Təhsil Nazirliyinin Texniki peşə
təhsili şöbəsinin müdiri Namiq Məmmədov
yığıncağı açaraq, iştirakçıları Təhsil
Nazirliyinin rəhbərliyi və öz adından salamladı,
Azərbaycan Respublikası Silahlı Qüvvələr günü
münasibətilə təbriklərini çatdırdı. Sonra
yığıncaq iştirakçıları 1 dəqiqəlik sükutla ulu
öndər Heydər Əliyevin və Vətən uğrunda həlak
olanların xatirəsini yad etdilər.
Yığıncaqda Namiq Məmmədov mövcud problemlərin
həllinə dair təkliflərlə çıxış edib, buraxılış
ixtisas imtahanlarının nəticələri barədə məlumat
verdi. İmtahanların nəticələrinin müzakirəsinin,
buraxılan nöqsanların araşdırılmasının
vacibliyini qeyd etdi.
Sonra yeni normativ - hüquqi sənədlər: İlk
peşə-ixtisas təhsili müəssisələrində
imtahanların aparılması, şagirdlərin kursdan
kursa keçirilməsi və buraxılması barədə təlimat,
İlk peşə-ixtisas təhsili pilləsinin dövlət
standartı və proqramı (kurikulum) haqqında,
şagird qəbulu qaydaları haqqında, təhsil
haqqında, dövlət sənədlərinin nümunələri və
onların verilməsi qaydaları haqqında ümumi
məlumat verildikdən sonra, geniş müzakirə
edildi.
Nəzərə
çatdırıldı ki, İlk peşə-ixtisas təhsili
müəssisələrinin illik fəaliyyət planlarında
Dövlət Proqramının icrası ilə bağlı verilmiş
əmrlər, təhlillər və digər məsələlər təhsil
müəssisələrinin rəhbərləri tərəfindən müzakirə
edilərək yerinə yetirilir. Müəyyən çətinliklər
olsa da, Dövlət Proqramına uyğun olaraq, Təhsil
Nazirliyi inkişaf etmiş ölkələrdə texniki peşə
təhsili müəssisələri ilə müxtəlif dövlət və
qeyri-dövlət təşkilatları arasında əlaqələrin
yaradılmasını təmin edir. Belə əlaqələrin
yaradılması, ilk növbədə, peşə təhsili
müəssisələrinə cəmiyyətin inkişafında fəal
iştirak etməyə, baş verən dəyişikliklərə uyğun
inkişaf istiqamətlərini müəyyənləşdirməyə imkan
yaradır.
Qeyd edildi ki, peşə təhsilinin inkişafında
dövlətin iştirakı ilə yanaşı, işəgötürənlər,
həmkarlar ittifaqları və qeyri-hökumət
təşkilatlarının birgə fəaliyyətini təmin
etməliyik. Məhz belə əlaqələr nəticəsində
texniki peşə təhsili sahəsində uğurlar əldə
etmək olar. Müəssisə rəhbərlərinə İlk
peşə-ixtisas təhsili sistemində ixtisaslı
mühəndis-pedaqoji kadrların hazırlıq
səviyyəsinin və pedaqoji kadrların hazırlanması
işinin təşkili vəziyyətinin yaxşılaşdırılması
bir daha müəssisə rəhbərlərinin nəzərinə
çatdırıldı.
İclasda mövcud problemlərin həlli məqsədilə
ixtisas və fənn müəllimlərinin ixtisasartırma
kurslarına cəlb olunması, şagird qəbulunun
qruplarda 20 nəfərə qədər artırılması ilə bağlı
dəyişikliklərin edilməsi, müsabiqə yolu ilə
qəbul qaydalarının işlənilməsi,
mühəndis-pedaqoji heyətin fəaliyyətinin
qiymətləndirilməsi üçün mexanizmin hazırlanması,
zəif nəticə göstərən müəssisələrə şagird
qəbulunun azaldılması və digər məsələlər barədə
təkliflər irəli sürüldü.
Elxan CƏFƏROV,
Təhsil Nazirliyi Texniki peşə təhsili
şöbəsinin aparıcı məsləhətçisi |