“Azərbaycan və Türkiyə peşə təhsili sahəsində əməkdaşlığı genişləndirmək niyyətindədir. Əməkdaşlıq təkcə peşə təhsili ilə məhdudlaşmır, müəllim hazırlığı, pedaqoji ünsiyyət və “qardaş məktəb” layihələri çərçivəsində də çoxalmaqdadır”.

“Azərbaycan müəllimi” xəbər verir ki, bunu Türkiyənin Milli Təhsil Nazirliyinin Peşə və Texniki Təhsil Baş İdarəsinin müdiri Salih Kaygusuz “Azərbaycan və Türkiyənin peşə təhsili sistemlərinin qarşılıqlı təcrübə mübadiləsi” mövzusunda keçirilən görüşdə çıxışı zamanı deyib. 

O bildirib ki, ölkə başçıları səviyyəsində formalaşmış dostluq və güclü əməkdaşlıq mühiti nəticəsində milli və peşə təhsili sahəsində də işlər ən yüksək səviyyədə həyata keçirilir: “Nazir Yusuf Təkin Azərbaycana xüsusi önəm yetirir və əlaqələrin inkişaf etdirilməsi ilə bağlı bizə konkret göstərişlər verir”.

Salih Kaygusuz qeyd edib ki, hazırda Türkiyədə peşə və texniki Anadolu liseylərində 1 milyon 101 min şagird təhsil alır: “Bundan əlavə, 400 minə yaxın şagird peşə təhsili mərkəzlərində, yəni həftənin bir neçə gününü məktəbdə, digər günlərini isə sahə müəssisələrində keçirən modeldə təhsil alır. Ümumilikdə, Türkiyədə peşə və texniki təhsil alanların sayı 1,5 milyona yaxındır. Bəzi sahələrdə gənclərin erkən yaşdan peşəyə yiyələnməsi strateji əhəmiyyət daşıyır. Bu təcrübənin Azərbaycanda da tətbiq olunması üçün işlərə başlanılıb”.

“Hazırda Azərbaycanda Türkiyə modeli ilə iki pilot peşə liseyi layihəsi üzərində çalışırıq. Məktəbləri Türkiyədən gələn müəllim və idarəçilərlə birlikdə idarə edəcəyik. Ümid edirik ki, yaxın vaxtlarda Protokol əsasında fəaliyyət göstərəcək ilk birgə peşə təhsili müəssisəsi açacağıq”, – deyə o əlavə edib.

Salih Kaygusuz görüş çərçivəsində Bakıdakı peşə liseylərində olduğunu da bildirib və oradakı infrastrukturun yüksək səviyyədə təşkil olunduğunu vurğulayıb.