Bu il İsmayıllı şəhəri 2 nömrəli tam orta məktəbin XI sinfinin dörd şagirdi — Sona Bəkirova, Nihal Mərdanlı, Ziya Muradlı və Cəbrayıl Cabbarov orta təhsilini qızıl nişanla başa vurub. Ümumilikdə 20 nəfərlik sinfin 12 şagirdi buraxılış imtahanlarında 200 baldan, 5 nəfəri isə ali məktəblərə qəbul imtahanlarında 600 baldan yüksək nəticə göstərib.

“Azərbaycan müəllimi” həmin sinfin rəhbəri Fatma Vəliyeva və məzunlarla görüşüb.

Fatma Vəliyeva bu uğuru illərlə qurulan məqsədli zəhmətin nəticəsi hesab edir:

“Bu nəticə sürpriz deyildi. Məktəbdə sağlam mühit, valideyn dəstəyi və məqsədli şagirdlər bu uğurun əsas dayaqları oldu”.

O, təkcə akademik deyil, həm də mənəvi-əxlaqi tərbiyəyə önəm verdiyini və bu balansın nəticələrə ciddi təsir göstərdiyini vurğulayır.

Ağ xalatlı arzular

Buraxılış imtahanlarında yüksək bal toplayan Nihal gələcəyini tibb sahəsində görür:
“İllərlə çəkilən zəhmətin bəhrəsini almaq ilk böyük zəfərim idi”, - deyən Nihal üçün uğurun əsas açarı gündəlik 6–7 saat dərslə məşğul olmaq, intizamlı planlama və müəllimin motivasiyasıdır.

Tarixi sevdirən müəllim

Tarix fənni üzrə olimpiada qalibi Sona deyir: “Fatma müəllim bizə tarix öyrətmirdi, onu sevdirirdi”.

600 baldan yüksək nəticə göstərən Sona humanitar sahədəki uğurlarına baxmayaraq, İT sahəsini seçib. Bu, onun öz yolunu seçmək iradəsinin göstəricisidir.

Gecələr oxunan coğrafiya

Coğrafiya üzrə üç il ardıcıl olimpiada qalibi olan Cəbrayıl üçün uğur əzmin nəticəsidir. “Ən vacibi, əziyyətimin boşa getməməsidir”, - deyir.
Buraxılış və qəbul imtahanlarındakı yüksək nəticələri onun davamlı zəhmətinin sübutudur.

Hüquqa gedən yol 

Ziyanın məqsədyönlü mübarizəsi 8-ci sinifdən başlayıb. O, qızıl nişanı yalnız akademik göstərici kimi deyil, iradəsinin simvolu sayır: “Bu sadəcə medal deyil, səbir və inamın rəmzidir”.

O, hüquq sahəsini seçib və digər gənclərə səslənir: “İnamla addımlayın, yorulsanız belə geri çəkilməyin”.

Sinif rəhbəri Fatma Vəliyeva qeyd edir ki, uğur təkcə bal deyil, şəxsiyyətin formalaşmasıdır: “Əgər müəllim tələb və sevgini bir arada verə bilirsə, qarşısında nəticədən əvvəl insan yetişir”.

Bu gün İsmayıllı şəhəri 2 nömrəli tam orta məktəbin XI sinfi minlərlə gənc üçün nümunəyə çevrilib. Nihal, Sona, Ziya, Cəbrayıl və onların yoldaşları sübut etdilər ki, zəhmət, inam və düzgün istiqamətlə zirvələr əlçatandır.